Sahil Kərimli: “Putinin bu tələbi Ermənistanı çətin seçim qarşısında qoyub, mürəkkəb vəziyyətə salıb”
Ermənistanın Baş naziri Nikol Paşinyanla Rusiya Prezidenti Vladimir Putin arasında baş tutan telefon danışığında Putin Ermənistanda Avropa İttifaqına qoşulmaq və ya Avrasiya İqtisadi Birliyində qalmaq məsələsi ilə bağlı mümkün qədər tez ümumxalq referendumunun keçirilməsinin zəruriliyini vurğulayıb.
Paşinyan isə bildirib ki, praktikada referendum keçirilməsi yalnız Ermənistanın Avropa İttifaqına üzvlük üçün rəsmi müraciətindən sonra və bu məsələ əsaslı hala gəldikdə mümkündür.
Poltoloq Sahil Kərimli baki-xeber.com-a bildirdi ki, Ermənistanın konstitusiyasında dəyişikliklər edilməsi və referendum keçirilməsi məsələsi zəruri məsələlərdən biridir. “İlk növbədə Azərbaycanla sülh müqaviləsi imzalamaq istiqamətində ölkəmizin haqlı və ədalətli tələbləri var, Ermənistan konstitusiyasının preambulasında Müstəqillik Bəyannaməsinə istinad tamamilə yığışdırılmalıdır. Burada Azərbaycana və Türkiyəyə qarşı ərazi iddiaları var, bu ərazi iddiaları Ermənistan konstitusiyasından birmənalı olaraq çıxarılmalıdır. Yalnız bundan sonra Azərbaycanla Ermənistan arasında uzunmüddətli və ədalətli sülh müqaviləsi imzalana bilər. Təbiidir ki, konstitusiyanın dəyişdirilməsi ilə bağlı referendumun keçirilməsi və Ermənistanın Avropa İttifaqına üz tutması, paralel olaraq da Avrasiya İqtisadi İttifaqı ilə münasibətləri davam etdirib, yaxud etdirməyəcəyi məsələsi də ümumxalq səsverməsinə çıxarılmaldır. Bu da Erməni xalqının iradəsindən aslı olacaq. Təbiidir ki, Rusiyanın da bu istiqamətdə çox ciddi təsirləri var. Rusiya nəhayət Ermənistanı dalana sıxışdırıb. Əsas məqsəd də ondan ibarətdir ki, Ermənistan öz yolunu konkret olaraq müəyyənləşdirməlidir. Ya gələcəkdə öz siyasətini Avropa İttifaqı, yaxud Avropa İttifaqı ilə deyil, Rusiya ilə davam etdirməlidir. Çünki burada söhbət Avrasiya İqtisadi İttifaqından gedir. Putinin bu tələbi Ermənistanı çətin seçim qarşısında qoyub, mürəkkəb vəziyyətə salıb.
Ümumiyyətlə, Ermənistan bu gün çətin dilemma qarşısındadır, dalana dirənib. Həm Rusiyanın, həm də Avropanın təzyiqləri altında Ermənistanın hazırkı rəhbərliyin hansı qərarı verəcəyi sual altındadır”-deyə S.Kərimli vurğuladı.
Politoloq hesab edir ki, burada Putinin gizli məqsədinin olduğu istisna deyil və o, Ermənistanın Aİ-yə doğru irəliləməsinə mane olmağa çalışa bilər.
S.Kərimlinin sözlərinə görə, bununla bağlı yaxın vaxtlarda Ermənistanın baş naziri Nikol Paşinyan çox çətin və məsuliyyətli qərar vermək məcburiyyətində qalacaq.
İradə SARIYEVA
