İran Omanın Hörmüz boğazı üzərində nəzarətin bərabər bölüşdürülməsi təklifini rədd edib. "The Wall Street Journal" qəzetinin məlumatlı mənbələrə istinadən verdiyi məlumata görə, Oman Hörmüz boğazı üzərində bərabər nəzarət yaratmaq üçün müvəqqəti bir plan təklif edib, lakin Tehran qlobal neft təchizatı üçün çox vacib olan su yolunun əsas hissəsinə nəzarət etməsini tələb edib.
Nəşr qeyd edir ki, bunu etməklə Tehran ABŞ-la münaqişəyə son qoymaq üçün danışıqların sürətlə bərpa olunması ümidlərini də təhlükəyə atıb.
Öz növbəsində, İran xarici işlər nazirinin müavini Kazem Qəribabadi qəzetə bildirib ki, Oman İranın boğazın böyük hissəsi üzərində nəzarəti ona vermək təklifini dəstəkləməsə, Tehran Vaşinqtonla danışıqların növbəti mərhələsinə razılıq verməyəcək.
Onun sözlərinə görə, Omanın planı “İranın təhlükəsizlik problemlərini həll etmir”. Qəribabadi bildirib ki, dəhlizə giriş tamamilə İranın nəzarəti altında olmalıdır, çıxış nəqliyyat dəhlizinin bir hissəsi isə Omanın nəzarəti altında qala bilər.
"Əgər onlar bu təklifi qəbul etsələr, biz növbəti mərhələyə keçəcəyik" – deyə nazir müavini qeyd edib.
Tahir TAĞIYEV
