Akif Nağı: “Bu reallığı əks etdirən bir açıqlamadır”
İran Avstraliyadakı keçmiş səfiri Məhəmmədhəsən Qədiri Əbyanə "Dideban-e Iran" saytına bildirib ki, ABŞ İrana quru hücumuna hazırlaşır və bu hücum ABŞ Konqresinə seçkilərdən əvvəl, hətta yaxın günlərdə baş verə bilər. Qədiri Əbyanə vurğulayıb ki, bu hücumun məqsədi İran ərazisinin bir hissəsini, o cümlədən adaları, sahil zonalarını və bəzi sərhədyanı bölgələri işğal etməkdir. O əlavə edib ki, ABŞ Konqres seçkilərindən əvvəl hərbi qələbə qazanmaq üçün belə bir addıma ehtiyac duyur, lakin bu hücum "uğursuzluqla nəticələnəcək". Qədiri Əbyanə Vaşinqtonla anlaşmanı "təhəyyül" adlandıraraq bildirib ki, danışıqlar yolu ilə ABŞ ilə razılığa gəlməyin mümkün olduğunu düşünənlər hələ də illüziya içindədirlər.
Sabiq səfirin dedikləri nə qədər real ola bilər?
Azad Vətən Partiyasının sədri Akif Nağı baki-xeber.com-a bildirdi ki, İran tərəfindən edilən bu açıqlamalar bir neçə məqsəd güdür. “Bir tərəfdən İran cəmiyyətində Amerika, İsrail təhlükəsi ab-havasını saxlamağa çalışırlar ki, onlar sabah hücum edəcəklər, buna hazır olmaq, bir olmaq lazımdır, hökumətə qarşı hansısa mənfi mövqe sərgiləmək olmaz. Yəni İran cəmiyyətini hələ də xarici düşmənə qarşı birləşmək tezisi ilə bir araya gətirməyi, onları nəzarətdə saxlamaq məqsədi güdür. Bu məsələnin bir tərəfidir. Digər tərəfi isə ondan ibarətdir ki, bu bir qabaqlayıcı mövqedir. Qabaqlayıcı mövqe ilə göstərmək istəyirlər ki, Amerika hücuma keçəcəkdir. Bu bir təbliğatdır, strategiyasıdır. Bu təbliğatla dünyanı özlərinə tərəf çevirməyə çalışırlar ki, dünya Amerikaya qarşı mənfi mövqedə olsun, beynəlxalq ictimai rəy Amerikaya qarşı yönəlsin. Bu istiqamətdə bu məqsədlə gedirlər. Eyni zamanda bu söhbət çox gedir ki, Amerika rəhbərliyi quru əməliyyatlarına gedəcək, yoxsa yox? İranı müəyyən qədər müdafiə edən Rusiyadır, Çindir. Yəni bu ölkələr müəyyən çərçivə daxilindəİranı müdafiə edirlər ki, Amerikaya qarşı onları istifadə edərsinlər. O təbliğat da gedir ki, Amerika quru əməliyyatlar mərhələsinə keçməlidir. Bu da Amerika üçün çox ciddi təhlükələr yarada bilər. Ona görə də hesab edirəm ki, bu cür açıqlamaların verilməsi Trampı quru əməliyyatların başlamasına təhrik etmək məqsədi güdür. Əgər Amerika quru əməliyyatlarına başlayarsa birincisi, İran cəmiyyəti üçün yeni bir situasiya yaranacaqdır.
Əvvəlki tezis bir qədər öz təsirini itirib. İndi deyirlər ki, biz Amerikaya, İsrailə qarşı birləşməliyik. Bu tezis bir qədər artıq kütləviləşib ki, nə qədər gözləmək olar, nə qədər dözmək olar? Vəziyyət də ağırdır. İranın prezidenti Məhsud Pezeşkiyan artıq etiraf edir ki, ölkədə iqtisadi vəziyyət pisdir, sosial problemlər, çətinliklər var, insanlar narazıdır. Artıq insanların narazılığı ciddi problemə, təhlükəyə çevrilir. Yəni bu reallığı əks etdirən bir açıqlamadır. Onu gördük ki, həmin o gün düşmənə qarşı birləşmək tezisi bir qədər adiləşibdir. Amma yeni şəraitdə ki, Amerika, İsrail əsgərinin çəkmələri artıq İran ərazisinə keçir, buna qarşı mübarizə aparmaq lazımdır. Bu İrana cəmiyyəti səfərbər etmək üçün yenidən lazımdır. Eyni zamanda burada başqa bir məsələ də var ki, müəyyən qruplaşmalar mövcuddur. Onlar klassik müharibədə üz-üzə dayana bilməzlər Amerika ordusu ilə. Amma o cür diversiya, təxribat qrupları ilə Amerika ordusuna qarşı uzun, üzücü əks-əməliyyatlar keçirə, müharibə edə bilərlər. Yəni bu, İrana sərf edən bir variantdır. Eyni zamanda Çinə və Rusiyaya sərf edən variantdır ki, bu yolla Amerikanı İran bataqlığına salsınlar və ABŞ ciddi çətinliklərlə üzləşsinlər. Yəni bir neçə istiqamətdə bu cür açıqlamalar verilir. Əsas da bunların hamısını birləşdirən odur ki, İran özünün üstünlüyünü göstərməyə çalışır. Amerika strateji təşəbbüsün İranın əlində olduğunu göstərməyə çalışır. İstənilən hücuma da hazırıq. Yəni bu da çox vacib bir məsələdir. Amerika strateji təşəbbüsün İranın əlində olduğunu göstərməyə çalışır. İstənilən hücuma da hazırıq. Yəni bu da çox vacib bir məsələdir. Onu seçkilərlə də bağlayırlar. Konqresə aralıq seçkilər keçirilməlidir. Bu Amerika cəmiyyəti üçün çox vacib bir məsələdir. Amma bir qədər əvvəl Tramp bildirdi ki, bunu seçkilərə bağlamağa ehtiyac yoxdur. Yəni Amerikanın siyasəti var, partiyaların mövqeyi var, seçicilərin münasibəti var. Ona görə də İran guya seçkilərin taleyini həll edir. Tramp bu təsir vasitəsini İranın əlindən almağa çalışır. Ona görə də İran tərəfi çalışır ki, bu cür açıqlamalarla həmin təsir imkanlarını əllərində saxlasınlar”.
A.Nağı hesab edir ki, bu bir neçə istqamətdə gedən məsələdir. “Hesab edirəm ki, bu İran tərəfindən aparılan növbəti bir təbliğat kampaniyasıdır, informasiya savaşında İranın növbəti bir cəhdidir. Həm beynəlxalq ictimai rəyi, həm də Amerika cəmiyyətinin rəyini öz xeyirlərinə dəyişdirməyə çalışırlar. Amma inanmıram ki, bu cür açıqlamalar İranın istədiyi nəticələri versin”-deyə A.Nağı qeyd etdi.
İradə SARIYEVA
