Ceyhun Məmmədov: "Uğurlar, nailiyyətlər artdıqca, ermənilərin də aqressiyası çoxalacaq"
Ermənilər bəlli səbəblərdən "Qarabağ" klubunun qələbələrini həzm edə bilmirlər. Guya bunun qarşısını almaq üçün yeni formul icad ediblər. Erməni saytları klubumuz haqqında nəsə yazmağa məcbur olanda klubu belə təqdim edirlər: "Qarabağ-Ağdam". Ermənilər bununla demək istəyirlər ki, bu "Qarabağ"ın, "onların Qarabağ"ına aidiyyəti yoxdur. Çox maraqlıdır ki, bəzi rus saytları da klubun adını ermənilərin istəyinə uyğun təqdim edib.
Yəqin ki, beynəlxalq arenada "Qarabağ"ın uğurları artdıqca, erməni lobbisi çalışacaq ki, Avropa mətbuatında da klubumuzun adı fərqli yazılsın.
Bunun üçün hansı addımların atılması zəruridir?
İdman eksperti Ceyhun Məmmədov qəzetimizə açıqlamasında bildirdi ki, bu təsadüfi ola bilməz: "Belə yanlış təqdimata imkan verilməməlidir. Klubun rəsmi adı "Qarabağ"dır və belə də yazılmalıdır. Yalnız mötərizədə təmsil etdiyi şəhərin və ölkənin adı göstərilə bilər. Bilirsiniz ki, "Qarabağ" klubu böyük uğura imza atıb və ölkəmizin futbol tarixində heç kimin göstərə bilmədiklərini edir. Artıq dünyanın ən tanınmış klublarının yarışdığı mərhələyə qədəm qoymuşuq. Bilirsiniz ki, qloballaşan dünyada informasiya sürətlə yayılır və klubumuzun bu uğuru bütün dünyanı bürüyüb. Əldə edilən qələbə ilə yanaşı, klubun adı da olduqca cəzbedici və əhəmiyyətlidir. Ermənilər Dağlıq Qarabağa iddia edir. Hamı da bilir ki, həmin ərazi tarixi Azərbaycan torpağıdır. Ancaq ermənilər bütün tarixi saxtalaşdırmağa cəhd edirlər. Hətta Qarabağın adını belə dəyişib öz istədikləri kimi təqdim edirlər. Amma bütün bunlar uğursuzluqla nəticələnir. "Qarabağ" klubunun parlaması isə onları ciddi narahat edir. Çünki bu adla maraqlananlar görür ki, klub Azərbaycana məxsusdur. Bilməyənlər üçün nəticə bu olur ki, deməli, Qarabağ Azərbaycanındır. Bu səbəbdən də onun adını komandaya qoyublar. Adın dəyişməsilə ermənilər fikri mahiyyətdən uzaqlaşdırmağa çalışırlar. Rusiya mətbuatında çoxlu sayda erməni çalışır. Yəqin ki, onlar da eyni mərkəzdən təlimat alaraq belə ediblər. Bunun qarşısını almaq üçün klubun adından rəsmi açıqlama verilməlidir. Eyni zamanda, Azərbaycan Futbol Federasiyası məsələyə münasibət bildirməlidir. Çünki bu gedişlə biz "Qarabağ"ın daha möhtəşəm uğurlarına şahid olacağıq. Təbii ki, uğurlar, nailiyyətlər artdıqca, ermənilərin də aqressiyası çoxalacaq. Onları qabaqlamalıyıq".
Məhəmmədəli QƏRİBLİ
