Şəmsəddin Əliyev: "Nazir vətəndaşları qrafik üzrə qəbul edir"
Son vaxtlar bəzi çox az oxunan saytlarda bir sıra vətəndaşların daxili işlər naziri Ramil Usubova müraciətləri yayılır ki, nazir onları qəbul etsin. Məlumat var ki, bəzi saytların rəhbərləri vətəndaşları aldadır. Yəni guya onların saytında müraciətləri çıxan kimi, R.Usubov həmin şəxsləri qəbul edəcək.
Bu arada Daxili İşlər Nazirliyi elektron kütləvi informasiya vasitələrində ayrı-ayrı şəxslərin qəbulla əlaqədar daxili işlər nazirinə ünvanladıqları müraciətlərə münasibət bildirib. Nazirliyin mətbuat xidmətinin rəisi Ehsan Zahidov bildirib ki, bu saytlar vətəndaşları aldatmaqla məşğuldur: "Belə hallara biz də rast gəlirik. Az tanınan bir neçə sayt var ki, sanki məhz bu sahədə ixtisaslaşıblar. Kiminsə müraciətini ictimailəşdirməklə, vəd verirlər ki, nazir səni dərhal qəbul edib dinləyəcək. Bununla da onlar rəhbərlik etdikləri mətbuat vasitəsini həm öz qanuni vəzifəsindən yayındırmış olurlar, həm də vətəndaşı aldadırlar. Çünki iş qrafiki daim sıx olan daxili işlər nazirinin KİV-də gedən hər müraciət əsasında qəbullar keçirməsi mümkün deyil. Hamıya məlumdur ki, nazir R.Usubov ayda iki dəfə vətəndaşların qəbulunu keçirir. Bunlardan biri, ölkə başçısı İlham Əliyevin tapşırığına əsasən, mərkəzi icra hakimiyyəti orqanları rəhbərlərinin vətəndaşların qəbulu cədvəlinə uyğun olaraq, respublikanın müxtəlif bölgələrində, ikincisi isə DİN-in inzibati binasında keçirilir. Onu da qeyd edim ki, cənab nazirin ayda iki dəfə olan qəbul günləri barədə əvvəlcədən bütün KİV-də elanlar verilir".
E.Zahidov qeyd edib ki, bundan əlavə, DİN-in rəsmi veb saytında (www.mia.gov.az) daimi fəaliyyət göstərən onlayn müraciət forması və nazirliyin rəsmi elektron poçt ünvanı (info@mia.gov.az) birbaşa müraciət etmək istəyən vətəndaşların ixtiyarındadır: "Buyurub rəsmi qaydada müraciət etsinlər. Əmin ola bilərlər ki, onların müraciətinə operativ və obyektiv şəkildə baxılacaq və özlərinə də bu barədə məlumat veriləcək. Kim ki, müraciətini KİV-lər vasitəsilə ictimailəşdirməklə cənab nazirin qəbuluna düşəcəyinə inanırsa, səhv edir. Bir daha deyirəm ki, belə müraciətlərə baxılmayacaq".
Bütövlükdə, belə hallara yol verilməsi nə dərəcədə doğrudur? Məsələyə münasibət bildirən "Polisə Dəstək" İctimai Birliyinin rəhbəri Şəmsəddin Əliyevin sözlərinə görə, vətəndaşlar ictimai rəyə təsiri olmayan bu kimi saytların təsiri altına düşməməlidir: "Belə saytlar insanları aldadaraq yanlış yola çəkirlər. Nazir vətəndaşları qrafik üzrə qəbul edir. Heç bir maneə olmadan vətəndaşlar qrafik üzrə qəbula gəlirlər. Vətəndaşlar yaxşı olardı ki, hər zaman bu qaydadan istifadə etsinlər. Yoxsa hansısa qeyri-ciddi sayt rəhbərinin dediklərinə aldanmaq, orada müraciətini yaymaq doğru deyil. O cür saytlar insanları aldadaraq özlərini DİN orqanlarına sırımaq istəyirlər. İnsanları aldadırlar ki, guya onlar DİN-ə daha yaxın olduqlarına görə onların müraciəti yayılsa, nazir onları qəbul edəcək. Tamamilə yanlış yanaşma olduğuna görə vətəndaşlar ayıq-sayıq olmalı və buna uymamalıdırlar. Mətbuatda nazirin qəbulu ilə bağlı məlumatlar onsuz da dərc olunur və bütün bunlar qrafik üzrə olur. O üzdən, vətəndaşlar qanuni və sivil yolla müraciət etsələr, daha yaxşı olar". Vidadi ORDAHALLI
