Avqustun 14-də Bakıda 41-ci Dünya Skaut Konfransı öz işinə başlayıb. AZƏRTAC-ın da informasiya dəstəyi verdiyi bu beynəlxalq tədbir Gənclər və İdman Nazirliyinin dəstəyi ilə keçirilir. Dünyanın 157 ölkəsindən ümumilikdə 1500-dən çox skautun qatıldığı tədbirdə Dünya Skaut Hərəkatı Təşkilatı (DSHT) üzvlərinin nümayəndələri, müxtəlif ölkələrdən yüksək vəzifəli rəsmilər iştirak edirlər.
Azərbaycan 2013-cü ilin fevralında DSHT-nin əsas tədbirləri olan və üç ildə bir dəfə keçirilən Dünya Skaut Konfransı və Dünya Skaut Gənclər Forumuna ev sahibliyi edəcək tərəf kimi namizədliyini irəli sürüb. Seçim nəticəsində qalib ölkə elan olunmuş Azərbaycan növbəti dəfə dünya miqyasında əhəmiyyətli beynəlxalq tədbirlərə ev sahibliyi edən ölkəyə çevrilib.
Konfransda müzakirə olunan əsas mövzular skaut təşkilatlarının gələcək inkişafı, strategiya və fəaliyyətlərinin yaradılması, eləcə də təşkilatın rəhbər orqanlarına sədrin və üzvlərin seçilməsindən ibarətdir.
13-cü Dünya Skaut Gənclər Forumu və 41-ci Dünya Skaut Konfransı miqyasına görə Avrasiya Skaut Regionunda keçiriləcək ilk irimiqyaslı və müsəlman ölkələri arasında ikinci ən böyük tədbirlərdir.
Qəbələdə keçirilən Dünya Skaut Gənclər Forumunun iştirakçıları gənc liderlik, fəal vətəndaşlıq mövqeyi, skautinqin dünyada baş verən qlobal dəyişikliklərə təsirinə dair mövzular ətrafında müzakirələr aparılıb, eləcə də tədbirin bütün iştirakçıları arasında gənclər proqramlarının həyata keçirilməsi sahəsində təcrübə mübadiləsi aparıblar.
Xatırladaq ki, 2000-ci ildən etibarən Dünya Skaut Hərəkatı Təşkilatında ölkəmizi Azərbaycan Skautlar Assosiasiyası təmsil edir.
Dünya Skaut Hərəkatı Təşkilatı fəal vətəndaşlara çevrilən, yaşadıqları cəmiyyətdə müsbət dəyişikliklər edən milyonlarla gənci bir araya gətirən dünyada aparıcı gənclər hərəkatından biridir. 1907-ci ildə lord Baden-Pauel tərəfindən təsis edilmiş Dünya Skaut Hərəkatı Təşkilatı (DSHT) sıralarında 40 milyondan artıq insanı birləşdirən 165 Milli Skaut Təşkilatının konfederasiyasıdır. Azərbaycan Skautlar Assosiasiyası, həmçinin Azərbaycan Respublikasının Gənclər Təşkilatlarının Milli Şurasının üzvüdür və 2000-ci il avqustun 20-dən Assosiasiya Dünya Skaut Hərəkatı Təşkilatına qoşulub.
Təşkilat 1997-ci il oktyabrın 11-də təsis edilib və hazırda onun Azərbaycanın 16 regionundan 1750-dən artıq üzvü vardır. Dünya Skaut Gənclər Forumu skautinqin gələcəyinə laqeyd olmayan 18-26 yaş arası gənc liderlər arasında iş, ünsiyyət və ideya mübadiləsi üçün platformadır. Dünya Skaut Konfransı Skaut hərəkatının “hesabat-seçki assambleyası” adlanan ali idarəedici orqanıdır və burada Dünya Skaut Təşkilatının bütün iştirakçı ölkələri təmsil olunurlar.
Tanzaniyanın sabiq Prezidenti: “Azərbaycan skautları ölkələrində keçirilən möhtəşəm tədbirlərlə fəxr edə bilərlər”
Mən və oğlanlarım skaut hərəkatının fəal üzvləriyik. Tanzaniyanın Prezidenti olarkən həm də Milli Skaut Assosiasiyasına rəhbərlik edirdim. Biz çalışırdıq ki, skaut hərəkatı inkişaf etsin, buna görə də onun fəaliyyətinə hər cür dəstək verirdik. Hərəkatın sıraları da yeni üzvlərlə genişlənirdi. Bu sözləri AZƏRTAC-a müsahibəsində Tanzaniyanın sabiq Prezidenti, Bakıda keçirilən Dünya Skaut Konfransının iştirakçısı Cakayya Kikvete deyib.
“Mən skaut hərəkatını çox önəmli hesab edirəm. Bu hərəkat gənclərdə vətənpərvərlik hissini artırmaqla, onların cəmiyyət qarşısında borcunu izah edir, cəmiyyət üçün lazımlı işlər görməyi təlqin edir. Skaut hərəkatı gəncləri yaxşı vətəndaş və məsuliyyətli lider yetişdirmək yolunda təlimləndirən mühüm bir təşkilatdır”, - deyə sabiq Prezident qeyd edib.
Azərbaycanda ilk dəfə olduğunu bildirən qonaq deyib ki, Bakı çox gözəl şəhərdir. Paytaxtınızın çox gözəl təşkil olunmuş planlaşdırması var: “Rənglərdən tutmuş binaların dizaynına qədər hər bir şey bir-birini tamamlayır. Şəhərin yaşıllığı ona əlavə rəng qatır. Mən Azərbaycanın paytaxtının gözəlliyi barədə sonsuza qədər danışa bilərəm. Baxmayaraq ki, mən burada birinci dəfəyəm. Amma qəti qərara almışam ki, tezliklə daha uzun müddətə burada qalmaq üçün geri qayıdım. Azərbaycan skautları ölkələrində keçirilən möhtəşəm tədbirlərlə fəxr edə bilərlər”.
Sabiq Prezident inandığını bildirib ki, bu tədbirlər bitəndən sonra Azərbaycan skautlarının cərgəsi nəzərəçarpacaq dərəcədə genişlənəcək.
Əhməd əl-Hindavi: “Azərbaycanda keçirilən Dünya Skaut Konfransı iştirakçıların sayına görə tarixə düşəcək”
Azərbaycanda keçirilən Dünya Skaut Konfransı Avrasiya regionunda bir ilkdir və iştirakçıların sayına görə tarixə düşəcək. Bu sözləri AZƏRTAC-a müsahibəsində Dünya Skaut Hərəkatının baş katibi, Bakıda keçirilən Dünya Skaut Konfransının iştirakçısı Əhməd əl-Hindavi deyib.
Azərbaycan dövlətinə, xalqına, Azərbaycan Skautlar Assosiasiyasına yüksək qonaqpərvərliyə görə minnətdarlığını bildirən qonaq deyib: “Konfrans iştirakçıları nəinki skaut hərəkatının inkişafının şahidi olacaq, həmçinin Dünya Skaut Hərəkatının beynəlxalq aləmdə gənclərin əsas təhsil hərəkatına çevrilməsi üçün vacib qərarlar qəbul edəcəklər. Bu konfrans imkan verəcək ki, bütün milli, regional və qlobal skaut təşkilatlarının liderləri bir yerdə toplaşaraq təşkilatın əsas konsepsiyası olan “Baxış–2023” layihəsini daha da inkişaf etdirsinlər. Layihə 2023-cü ilədək dünyada skautların sayının 200 milyona çatdırılmasını nəzərdə tutur”.
“Mən bir neçə dəfə Bakıda olmuşam. Hər dəfə də Azərbaycan xalqının qonaqpərvərliyindən aldığım təəssüratlarla qayıdıram. Mən şadam ki, konfrans Azərbaycanda - Odlar Yurdunda keçirilir. Bu da konfrans iştirakçılarına müzakirələr üçün əlavə enerji verəcək. Konfransın keçirildiyi Bakı Konqres Mərkəzi və Heydər Əliyev Mərkəzi arxitekturanın şedevr nümunələridir. Bu da öz növbəsində keçirilən tədbirlərin uğuruna yüksək əhval-ruhiyyə qatır”, - deyə Əhməd əl-Hindavi bildirib.
Tariq Şafi: “Bakıda skaut hərəkatının gələcək inkişafı ilə bağlı faydalı müzakirələr aparılır”
Dünya Skaut Konfransının Azərbaycanda təşkil olunması bizi çox sevindirir. Çünki Azərbaycan həmişə yüksək təşkilatçılıq bacarığı ilə seçilib. Konfransın mükəmməl təşkili bir daha bunu sübut edir. Bu sözləri AZƏRTAC-a müsahibəsində Dünya Skaut Hərəkatının pakistanlı iştirakçısı Tariq Şafi deyib.
O bildirib ki, Bakı konfransında skaut hərəkatının gələcək inkişafı istiqamətində faydalı müzakirələr aparılır. Azərbaycanlı həmkarlarımızın yüksək peşəkarlığı bizi sevindirir. Ölkənizdə bu sahənin inkişafı üçün əlverişli şərait və imkanlar var.
Azərbaycanda ilk dəfə olduğunu diqqətə çatdıran qonaq deyib: “Qəbələ və Bakı ilə tanış olmaq imkanı əldə etmişəm. Gördüklərim məni heyran etdi. İnsanlar yüksək mehribanlığı və qonaqpərvərliyi ilə seçilir. Azərbaycan Şərq və Qərbin vəhdətini təşkil edir”.
Dünya Skaut Hərəkatı Təşkilatının baş katibi: “Konfransın Azərbaycanda keçirilməsinə şadam”
İndiki konfrans skautinq tarixində xüsusi yer tutur. Azərbaycanda və bütövlükdə Avrasiya regionunda ilk dəfə keçirilən bu konfrans iştirakçıların və dünyanın hər yerindən təmsil olunan milli skaut təşkilatlarının rekord sayına görə əvvəlkilərdən fərqlənir. Bunun nəticəsində konfrans iştirakçıları nəinki son bir neçə ildə skaut hərəkatının inkişafı ilə tanış olacaq və təcrübə mübadiləsi aparacaq, həm də Dünya Skaut Hərəkatı Təşkilatının beynəlxalq aləmdə gənclərin əsas təhsil hərəkatına çevrilməsi üçün vacib qərarlar qəbul edəcək. Hesab edirəm ki, bu konfrans skaut hərəkatının milli, regional, qlobal liderlərinə bir yerə toplaşaraq təşkilatın əsas konsepsiyası olan “Baxış–2023” layihəsini daha da inkişaf etdirməyə imkan yaradacaq. Layihə 2023-cü ilədək dünyada skautların sayının 200 milyona çatdırılmasını nəzərdə tutur.
Bu fikirləri Dünya Skaut Hərəkatı Təşkilatının (WOSM) baş katibi Əhməd əl-Hindavi AZƏRTAC-a müsahibəsində deyib. “Azərbaycanda bir neçə dəfə olmuşam və hər dəfə də bu ölkədən xalqınızın qonaqpərvərliyindən aldığım təəssüratlarla qayıtmışam. Konfransın Azərbaycanda – Odlar yurdunda keçirilməsinə çox şadam. Bu da konfrans iştirakçılarına müzakirə zamanı əlavə enerji verməlidir. Forumun və konfransın yüksək səviyyədə təşkilini, o cümlədən Azərbaycan Skautlar Assosiasiyasının, bütün yerli tərəfdaşların, dövlətin gördüyü işləri və bütövlükdə bu tədbirlərdə Azərbaycan xalqının qonaqpərvərliyini qeyd edə bilərəm. Harada oluruqsa – Forumun keçirildiyi gözəl Qəbələdə və ya Bakıda biz Azərbaycan xalqının səmimi münasibətini duyuruq və bu bizi ruhlandırır. WOSM-un adından Azərbaycan Skautlar Assosiasiyasına tədbirlər ərəfəsində gördüyü işə görə və Azərbaycan xalqına dostcasına münasibətinə görə təşəkkür etmək istəyirəm. Xüsusilə qeyd etmək istəyirəm ki, konfransın keçiriləcəyi yerlər – Bakı Konqres Mərkəzi və Heydər Əliyev Mərkəzi nadir memarlıq inciləridir”, - deyə WOSM rəhbəri qeyd edib.
dövlətin gördüyü işləri və bütövlükdə bu tədbirlərdə Azərbaycan xalqının qonaqpərvərliyini qeyd edə bilərəm. Harada oluruqsa – Forumun keçirildiyi gözəl Qəbələdə və ya Bakıda biz Azərbaycan xalqının səmimi münasibətini duyuruq və bu bizi ruhlandırır. WOSM-un adından Azərbaycan Skautlar Assosiasiyasına tədbirlər ərəfəsində gördüyü işə görə və Azərbaycan xalqına dostcasına münasibətinə görə təşəkkür etmək istəyirəm. Xüsusilə qeyd etmək istəyirəm ki, konfransın keçiriləcəyi yerlər – Bakı Konqres Mərkəzi və Heydər Əliyev Mərkəzi nadir memarlıq inciləridir”, - deyə WOSM rəhbəri qeyd edib.
