Bəzən vəzifəmizin, peşəmizin bizə verdiyi səlahiyyət çərçivəsində qanunlarımıza söykənərək göstərdiyimiz xidmət vətəndaşlar tərəfindən "yaxşılıq" kimi başa düşülür və bizlər onların qəlbində, xatirində "yaxşı adam", "yaxşı polis" kimi qalırıq. Əlbəttə, bu bizi sevindirir. Bəli, yaxşılıq, xeyirxahlıq hər birimizin fitrətində olmalıdır.
İnsan insana əl tutmalı, köməyini əsrigəməməlidir. Amma vətəndaşlarımız da bilməlidir ki, daha doğrusu, bunu biz onlara deməliyik ki, üzləşdiyi problemin həllinə çalışmağımız, dəymiş ziyanı ödətdirməyimiz, pozulmuş haqlarını müdafiə etməyimiz, yolda qalanda köməyinə çatmağımız onun xatirində "yaxşı adam" kimi qalmaq üçün deyil, bu bizim vəzifə borcumuzdur.
Bu mənada hər bir məmur, hər bir vəzifə sahibi vicdan hissini itirməməli, ona həvalə edilən işin vətəndaş məmnunluğuna xidmət etməli olduğunu bilməlidir. Əgər bizə etimad göstərilibsə, etibar edilibsə, xalqa xidmət etməyə borcluyuq. Unutmayaq ki, gördüyümüz işin yaxşısı da, pisi də xalqın nəzərindən qaçmır...
Elə DİN-in ünvanına göndərilən çoxsaylı məktublarda da polisimizdən razılıq hissi, vətəndaş məmnunluğu öz əksini tapır.
Bakı şəhər sakini, Qarabağ müharibəsi veteranı, ikinci qrup əlil, ehtiyatda olan polkovnik-leytenant Seyidağa Mövsümov Xəzər RPİ-nin Qeydiyyat və Şəxsiyyət Vəsiqəsi şöbəsinin əməkdaşlarına müraciətinə həssas yanaşmalarına, ona göstərdikləri diqqətə və səmimi münasibətə görə təşəkkürünü bildirir.
Suraxanı rayon sakini Rauf Mehdiyev göndərdiyi minnətdarlıq məktubunda yazır ki, ailəsi ilə birikdə Qusarda yerləşən "Şahdağ" istirahət mərkəzinə gedərkən yolda avtomobilində nasazlıq yaranıb. Çətin vəziyətdə qalan vətəndaşların köməyinə Qusar RPŞ-nin Şahdağ Polis Bölməsinin əməkdaşları çatıb. Yaranmış nasazlıq polis əməkdaşlarının səyi nəticəsində aradan qaldırılıb.
Professor Hidayət İsayev DİN-ə ünvanladığı təşəkkür məktubunda üzləşdiyi problemin həllində köməklik göstərdiyinə, xoş münasibətinə və nümunəvi rəftarına görə Baş Dövlət Yol Polisi İdarəsinin YPXA-nın 1-ci tağımının timsalında Azərbaycan Polisinə təşəkkürünü bildirir.
Gəncə şəhər sakini Rauf Əliyev hüquqlarının pozulmasına görə etdiyi müraciətə DİN tərəfindən çevik reaksiya verildiyi və aparılan araşdırmalardan sonra hər şeyin qanun çərçivəsində öz həllini tapdığı üçün təşəkkürünü bildirir.
Övladlarının daxili işlər orqanlarına tam şəffaf və demokratik şəkildə qəbul olunmasına görə Tərtər rayon sakinləri İlham Qədirov, Vidadi Bayramov və Qalib Almasov DİN rəhbərliyinə təşəkkürünü bildirir.
Mingəçevir şəhər sakini Yusif Əkbərov etdiyi şikayətə vaxtında baxıldığına və göstərilən köməyə görə ŞPŞ-nin rəhbərliyinə təşəkkürünü bildirir.
Bakı şəhər sakinləri Gülafət Zəkəryəyeva və Neman Kərimov DİN-ə ünvanladıqları məktublarında cinayət işinin ibtidai istintaqı zamanı göstərdiyi yüksək peşəkarlığa və operativliyə görə Nəsimi RPİ İstintaq Şöbəsinin baş müstəntiqi, polis mayoru Ceyhun Rəhimova minnətdarlıqlarını bildirirlər.
Hafiz TƏMİROV polis mayoru
