Mehman Muradlı: "Çünki bu tip övlad tərbiyə edən məmurların onları islah etməkdən başqa yolu qalmır"
Son günlər bəzi məmur övladlarının və ya doğmalarının sürdüyü harın həyat tərzi və bunun da nəticəsində ortaya çıxan xoşagəlməz hallar mediada geniş müzakirə edilməkdədir.
Qeyd edək ki, ölkə başçısı İlham Əliyev dəfələrlə keçirdiyi müşavirələrdə bildirib ki, məmurlar və onların ailə üzvləri öz davranışı ilə cəmiyyətə örnək olmalıdırlar. Prezident deyib ki, harınlığa, qudurğanlığa yol verənlərə qarşı heç bir güzəştdən söhbət gedə bilməz. Son günlər ərzində baş verən proseslər bunu bir daha sübut etdi. Reallıq göstərdi ki, belə hallarla bağlı məmurlara heç bir güzəşt edilmir. Yeri gələndə onlar tutduğu vəzifədən uzaqlaşdırılır, harın əməllərə yol verən övladları, qohumları isə həbs olunurlar.
Pozucu, tərbiyəsiz məmur övladlarının qanunla cəzalandırılması nə kimi tərbiyəvi və islahedici rol oynayır?
Hüquqşünas Mehman Muradlı qəzetimizə bildirdi ki, bu hadisələrin hər biri məmurlar və onların övladları üçün örnək olmalıdır: "Bir neçə gün gedən müzakirələri yaxından izləyən bir şəxs olaraq bəzi yanaşmalarla bağlı iradım da var. Təəssüf ki, bəzən kin-küdurət, qınaq bütün məmurlara yönəldilir. Mən çox tərbiyəli, savadlı məmur övladları da tanıyıram. Yəni məsələni bu kontekstdə ümumiləşdirmək olmaz. Təbii ki, söhbət harınlamışlardan, qanunu pozanlardan gedir. Hüquqşünas praktikamda belə hallarla çox rastlaşmışam. Həmin hadisələr tez ictimailəşdiyi səbəbindən rezonans böyük olur. Azərbaycanda məmur övladlarının iştirakı ilə baş verən analoji hadisələrdə heç kim məsuliyyətdən kənarda qalmayıb. Onlarla belə misal çəkə bilərəm. Hətta elə hallar olub ki, övladlarının pozğun əməlinə görə valideynlər ən yüksək postlardan çıxarılıb. Ölkə başçısı dəfələrlə bu barədə şəxsən xəbərdarlıqlar edib. Ancaq bəzən görürsən ki, belə tövsiyələrdən nəticə çıxarmayanlar da olur. Bu səbəbdən də görünür ki, onlara qarşı qanun ən sərt üzünü göstərir. Hesab edirəm ki, son hadisələr çoxları üçün dərs olacaq. Çünki bu tip övlad tərbiyə edən məmurların onları islah etməkdən başqa yolu qalmır. Gedişat göstərir ki, Azərbaycanda heç kimə qanundan qorunmaq üçün xüsusi immunitet verilmir və hamı qanunlar qarşısında bərabərdir".
Məhəmmədəli QƏRİBLİ
