Tağı Qəmbərov: "Bu cür zərurətlər qanunun bir qədər mükəmməlləşməsini tələb edir"
Prezident İlham Əliyev "Azərbaycan Respublikası Milli Məclisi deputatının etik davranış qaydaları haqqında" Azərbaycan Respublikasının 2017-ci il 30 iyun tarixli, 766 VQ nömrəli Qanununun tətbiqi barədə Sərəncam imzalayıb.
Sərəncamla Nazirlər Kabinetinə Azərbaycan Respublikası qanunlarının və Azərbaycan Respublikası Prezidentinin aktlarının "Azərbaycan Respublikası Milli Məclisi deputatının etik davranış qaydaları haqqında" Azərbaycan Respublikasının Qanununa uyğunlaşdırılması ilə bağlı təkliflərini üç ay müddətində hazırlayıb Azərbaycan Respublikasının Prezidentinə təqdim etmək; Nazirlər Kabinetinin normativ-hüquqi aktlarının həmin qanuna uyğunlaşdırılmasını üç ay müddətində təmin edib Azərbaycan Respublikasının Prezidentinə məlumat vermək; mərkəzi icra hakimiyyəti orqanlarının normativ-hüquqi aktlarının həmin qanuna uyğunlaşdırılmasını nəzarətdə saxlayıb bunun icrası barədə beş ay müddətində Azərbaycan Respublikasının Prezidentinə məlumat vermək tapşırılıb.
Sərəncama əsasən, Ədliyyə Nazirliyi mərkəzi icra hakimiyyəti orqanlarının normativ-hüquqi aktlarının və normativ xarakterli aktların "Azərbaycan Respublikası Milli Məclisi deputatının etik davranış qaydaları haqqında" Azərbaycan Respublikasının Qanununa uyğunlaşdırılmasını təmin edib Nazirlər Kabinetinə məlumat verməlidir.
Hüquqşünas Tağı Qəmbərov qəzetimizə bildirdi ki, bu qanun əvvəlcə də olub: "Prezidentin imzaladığı sərəncam həmin qanunun tətbiqi ilə bağlıdır. Yəni Prezident yeni qanunla bağlı öz tövsiyələrini verib. Yəqin ki, son vaxtlar bəzi millət vəkillərinin etdiyi məsuliyyətsiz çıxışlar və ya deputat mandatına uyğun gəlməyən davranışları bu qanuna yeniliklərin edilməsini zəruri edib. Göründüyü kimi, etik kodeksin digər qanunlarla uyğunlaşdırılmasına dair tapşırıqlar verilir. Detallar açıqlanmadığı üçün, bunu tam şərh edə bilmirik. Ancaq hesab edirəm ki, bu yeniliklər deputatların məsuliyyətini daha da artırmağa xidmət edəcək və yəqin ki, əvvəlki sənəddən bir qədər tələbkarlığı ilə fərqlənəcək. Tam qüvvəyə minəndən sonra yəqin ki, deputatların buraxdığı səhvlərə intizam komissiyasında yenilənmiş tələblərə uyğun şəkildə baxılacaq. Hesab edirəm ki, buna böyük ehtiyac vardı. Parlamentin intizam komissiyasının sədri deyir ki, payız sessiyası başlayan kimi, iki deputatın məsələsinə baxılacaq. Biri parlamentin iclaslarına qatılmır, digəri isə məsuliyyətsiz çıxışlar edir. Bu cür zərurətlər qanunun bir qədər mükəmməlləşməsini tələb edir. Deputat toxunulmazlığının olması heç də o anlama gəlmir ki, millət vəkili bütün məsuliyyətdən azaddır. Həmin səlahiyyətə uyğun da etik kodeks var ki, ona bütün deputatlar mütləq əməl etməlidir".
Məhəmmədəli QƏRİBLİ
