Günel Fərhadqızı: "Həmin müşavirələrdə, həmçinin, ölkənin gələcək inkişaf perspektivləri, yaranmış problemlərdən çıxış yolları müzakirə edilir"
Məlum olduğu kimi, bu günlərdə ölkə başçısı Azərbaycanın müxtəlif regionlarına səfərlər edib. Prezidentin səfərləri zamanı geniş regional müşavirələr keçirilir. Həmçinin, ilin sosial-iqtisadi göstəricilərinə dair ölkə başçısının iştirakı ilə rüblük müşavirələr də təşkil edilir.
Fikir versək görərik ki, həmin tədbirlərin hər birində geniş təhlillər aparılır, rəqəmlər səsləndirilir, bir sözlə, müxtəlif informasiyalar verilir. Prezidentin müşavirələrdə və başqa tədbirlərdə geniş çıxışları Azərbaycanın sosial-iqtisadi və ümumən daxili siyasəti barədə hansı səviyyədə məlumat mənbəyi sayıla bilər?
İqtisadçı Günel Fərhadqızı qəzetimizə bildirdi ki, ölkə başçısının keçirdiyi toplantılarda çox ətraflı təhlillər aparılır: "Bu faktın özü göstərir ki, ölkə başçısı iqtisadiyyatın bütün sahələrindəki vəziyyətlə yaxından tanışdır və onun inkişaf perspektivlərini görür. Azərbaycan Prezidenti İlham Əliyevin şimal-qərb bölgəsinə səfəri bir daha göstərdi ki, regionların inkişafı hər zaman dövlət başçısının diqqətindədir.
Dövlət başçısı Qaxda keçirilən respublika müşavirəsində də bildirdi ki, 2004-cü ildən indiyə qədər bölgələrdə müşahidə edilən inkişaf tarixi nailiyyətdir. Azərbaycanda heç vaxt qısa zaman ərzində bu qədər iş görülməyib. Xüsusilə infrastruktur layihələrinin reallaşdırılması, ərzaq təhlükəsizliyi ilə bağlı məsələlər hər zaman dövlət başçısının diqqət mərkəzində olub və həmin siyasət sayəsində ölkəmizdə son 6 ay ərzində iqtisadiyyatda 1,7 faiz artım qeydə alınıb, qeyri-neft sektorunda 4,4 faiz, kənd təsərrüfatı sahəsində 2 faiz artım mövcuddur. Ən mühüm məsələlərdən biri, heç şübhəsiz ki, ixrac potensialımızın genişləndirilməsi, idxaldan asılılığın azaldılması ilə bağlıdır. Məhz Prezident İlham Əliyevin həyata keçirdiyi siyasət sayəsində ölkəmizin ixracatında son 6 ay ərzində 36 faizlik artım qeydə alınıb və xüsusilə qeyri-neft ixracatında 27 faiz artım var, idxaldan asılılıq isə 15 faiz azalıb. Sadalanan rəqəmlər bir daha onu göstərir ki, yürüdülən siyasət düşünülmüş, məqsədyönlü siyasətdir və bu siyasət regionlarımızın yüksək inkişafını təmin edir. Ölkə başçısı tərəfindən səsləndirilən rəqəmlər, faktlar ölkənin iqtisadi inkişafını səciyyələndirən ən bariz göstərici sayıla bilər. Həmin müşavirələrdə, həmçinin, ölkənin gələcək inkişaf perspektivləri, yaranmış problemlərdən çıxış yolları müzakirə edilir".
Məhəmmədəli QƏRİBLİ
