Ceyhun Məmmədov: "Ümidvarıq ki, ölkəmiz bundan sonra da mötəbər yarışlara ev sahibliyi edəcək"
"Dəniz Kuboku - 2017" beynəlxalq yarışlarının təntənəli açılış mərasimində Azərbaycan Prezidenti İlham Əliyevin təbrik məktubu oxunub. Məktubu yarış iştirakşılarının diqqətinə müdafiə naziri Zakir Həsənov çatdırıb.
Dövlət başçısının məktubunda qeyd olunub ki, bu yarışların Xəzərdə Azərbaycanın ərazi sularında keçirilməsi təsadüfi deyil: "Azərbaycan artıq idman ölkəsi kimi tanınır və bu missiya bu gün də uğurla davam etdirilir. Bu yarışların ölkəmizdə keçirilməsi Azərbaycanın dünyada artan nüfuzunun, ordu quruculuğu sahəsində qazanılan uğurların nəticəsidir. Mən əminəm ki, bu yarışlar hərbçilərdə həmrəylik hissi oyatmaqla yanaşı, yarış iştirakçılarının yadında xoş xatirə kimi qalacaq".
Prezident İlham Əliyev qeyd edib ki, bu yarışlar Xəzər dənizinin sülh, mehriban qonşuluq hövzəsi kimi qalmasına öz töhfəsini verəcək: "İnanıram ki, bu yarışlar səmimi dostluq və qardaşlıq şəraitində keçiriləcək. Bütün komanda üzvlərinə uğurlar arzulayıram. Qoy güclü zəfər qazansın".
Göründüyü kimi, Prezident belə bir hərbi idman yarışının Azərbaycanda keçirilməsini ölkəmizin artan nüfuzu və idman ölkəsi olması ilə əlaqələndirir. Prezident məhz bu təqdimatı hansı amillərə əsaslanaraq edir?
İdman mütəxəssisi Ceyhun Məmmədov qəzetimizə açıqlamasında bildirdi ki, ölkə başçısı bu məsələdə Azərbaycanın oynadığı rolu çox doğru olaraq qeyd edib: "Təbii ki, son illər ərzində Azərbaycan dünyanın ən mühüm idman yarışlarına ev sahibliyi edib. Çox geniş tamaşaçı və iştirakçı sayını əhatə edən həmin tədbirlərə ev sahibliyi etmək üçün ölkənin zəngin potensialı və infrastrukturu olmalıdır. Azərbaycan həmin yarışları çox yüksək səviyyədə keçirdi. Bura Avropa və İslam Həmrəyliyi Oyunlarını, eləcə də Formula-1 yarışlarını əlavə edə bilərik. "Dəniz Kuboku - 2017" yarışları onların yanında çox kiçikdir. Təşkilati baxımdan bizə ciddi əziyyət verməyəcək. Ancaq məna baxımından olduqca önəmlidir. Çünki burada söhbət hərbi gəmilərin iştirak etdiyi idman yarışmasından gedir. Məlumdur ki, bu yarışlarda Azərbaycan, Rusiya, İran və Qazaxıstan hərbi dəniz qüvvələrinin gəmi heyətləri, müşahidəçi qismində isə Türkiyə, Səudiyyə Ərəbistanı və Bəhreyn silahlı qüvvələrinin nümayəndələri iştirak edirlər. "Dəniz Kuboku - 2017"də Azərbaycan Hərbi Dəniz Qüvvələri G-124, G-122 gözətçi gəmiləri, Rusiya Hərbi Dəniz Donanmasının Xəzər Flotiliyası "Qrad Sviyajsk" kiçik raket, "CB-45" xilasetmə yedək gəmisi, İran Hərbi Dəniz Qüvvələri "Peykan" və "Cövşən" raket katerləri və Qazaxıstan Hərbi Dəniz Qüvvələri "Qazaxıstan" və "Sarıarka" raket-artilleriya və "Jayık" hidroqrafiya gəmiləri ilə iştirak edirlər. 300-ə yaxın şəxsi heyətin iştirak etdiyi "Dəniz Kuboku - 2017" yarışları 3 mərhələdə - artilleriya atəşlərinin yerinə yetirilməsi, gəminin dayanıqlığı uğrunda mübarizə və xilasetmə hazırlığı və dəniz hazırlığı üzrə keçirilir. Hesab edirəm ki, Prezidentin məktubunda bu yarışlara Azərbaycanın hansı səbəbdən ev sahibliyi etməsi ilə bağlı düzgün təsbit verilib. Ümidvarıq ki, ölkəmiz bundan sonra da mötəbər yarışlara ev sahibliyi edəcək".
Məhəmmədəli QƏRİBLİ
