Azərbaycanda könüllülər, partiyalar, hətta məhkumlar ermənilərlə döyüş üçün ayağa qalxdı

Tarix: 05.04.2016 / 02:39
Bölmə: Gündəm

Ordumuzun əks-zərbələri ilə tam iflasa uğradılmış erməni təxribatı cəmiyyətimizin döyüş ruhunun kükrəməsinə səbəb olub. Əli silah tuta bilən hər kəs orduya öz dəstəyini verməyə çalışır, dəstə-dəstə gənclər cəbhə xəttinə axışır. Azərbaycanın müxtəlif yerlərindən cəbhə bölgəsinə könüllü olaraq vuruşmaq üçün axın edənlərin qarşısını almaq məqsədilə döyüş bölgəsinə yaxın ərazilərdə polis və hərbi blokada postları yaradılıb.

Bu barədə İnterfax-Azərbaycan yerli sakinlərə istinadən məlumat yayıb. Müdafiə Nazirliyinin mətbuat xidmətinin rəhbəri Vaqif Dərgahlı isə bildirib ki, hazırda Azərbaycan ordusu ona verilən tapşırıqların öhdəsindən gələ bilir.

O bildirib ki, cəbhəyanı zonalardan insanlar qruplar şəklində gəlir və ermənilərlə döyüşməyə hazır olduqlarını bildirirlər.

Dünən Klassik Xalq Cəbhəsi Partiyasının qərargahında 9 siyasi partiyanın mövcud hərbi - siyasi durumla bağlı müzakirəsi olub. Müzakirələrdə Aydınlar Partiyası, Azadlıq Partiyası, Azərbaycan Xalq Partiyası, Böyük Azərbaycan Partiyası,Vətəndaş və İnkişaf Partiyası, Azərbaycan Demokrat Partiyası, Milli Konqres Partiyası, Ümid Partiyası, Klassik Xalq Cəbhəsi Partiyası iştirak edib. Toplantıda şəhidlərin xatirəsi sayğı duruşu ilə yad edilərək, onların ailələrinə və yaxınlarına baş sağlığı verilib. Yaralıların tezliklə şəfa tapmaları üçün dualar edilib.

Azərbaycan Ordusunun işğal olunmuş torpaqların bir hissəsini azad etməsi uğurlu addım kimi qeyd olunub. Azərbaycan hakimiyyətindən işğal olunmuş bütün torpaqlarımızın tam azad olunmasını təmin etmək üçün siyasi, diplomatik, hərbi və digər tədbirləri daha səylə və ardıcıl davam etdirməsi tələb edilib. Toplantıda bəzi partiyalar tərəfindən hərbi səfərbərliklə bağlı təkliflər də səslənib.

Bakı Dövlət Universitetində (BDU) silahlı təxribat nəticəsində həlak olmuş hərbçilərimiz anılıb. BDU-nun İctimaiyyətlə əlaqələr şöbəsindən "Trend"ə verilən məlumata görə, aprelin 1-dən 2-nə keçən gecədən başlayaraq Ermənistanın Azərbaycana qarşı növbəti silahlı təxribatı nəticəsində həlak olmuş hərbçilərimizin və mülki şəxslərin ruhunu yad etmək və ordumuza dəstək məqsədi ilə Bakı Dövlət Universitetində 6 minədək tələbə-əməkdaşın iştirakı ilə tədbir keçirilib.

Həlak olanların xatirəsinin bir dəqiqəlik sükutla yad edilməsi ilə başlanan tədbirdə rektor, akademik Abel Məhərrəmov şəhidlərimizin doğmalarına səbr diləyib.

Bildirib ki, Ermənistan hərbi qüvvələri artıq bir neçə gündür ki, Azərbaycan kəndlərini, yaşayış məntəqələrini böyük miqyaslı silahlar - top və pulemyotlardan atəşə tutur, hərbi mövqelərimizə ardıcıl zərbələr endirir. Azərbaycan Ordusu vətəndaşların təhlükəsizliyini və öz mövqelərini qorumaq üçün Ermənistan silahlı qüvvələrinə lazımi cavabı verib.

ATƏT-in Minsk Qrupuna həmsədrlik edən ölkələrin dövlət başçılarının və digər beynəlxalq təşkilatların atəşkəsin yenidən təmin edilməsi çağırışlarına cavab olaraq Azərbaycan hücumları birtərəfli qaydada dayandırıb. Lakin Ermənistan atəşkəs çağırışlarına məhəl qoymur və ağır silahlarla Azərbaycanın mövqelərinə atəş açmağa davam edir.

Rəsmi Bakı Ermənistan-Azərbaycan, Dağlıq Qarabağ münaqişəsinin sülh yolu ilə və beynəlxalq hüquq normaları çərçivəsində həllinə tərəfdardır.

Azərbaycan münaqişənin həlli ilə bağlı məsələnin reallaşdırılması üçün üzərinə düşənləri yerinə yetirsə də, növbəti təxribat törədilib və qarşısı qətiyyətlə alınıb. Prezident İlham Əliyevin dediyi kimi, "bizə qarşı yenə təxribat törədilərsə onlar yenə də öz cəzalarını alacaqlar. Biz Ermənistan torpağını işğal etməmişik. Biz öz torpağımızda vuruşuruq. Əgər erməni əsgəri ölmək istəmirsə, Azərbaycan torpağından rədd olsun. Mən bunu dəfələrlə demişəm, bir daha demək istəyirəm".

BDU-nun kafedra müdiri, akademik Vasim Məmmədəliyev şəhidliyin ən uca zirvə olduğunu, onların əziz xatirəsinin hər zaman qəlbimizdə yaşayacağını bildirib.

Aprelin 2-də Azərbaycan Respublikası Prezidentinin yanında Təhlükəsizlik Şurasının iclasını əks etdirən film-rolikin nümayişindən sonra tələbələr prezident, Ali Baş Komandan İlham Əliyevin ətrafında sıx birləşdiklərini, vətənimizi yad tapdağından azad etməyə hər an hazır olduqlarını bildirib, Azərbaycan əsgərinə müraciət qəbul ediblər.

Əsgərlərimizin böyük bir məsuliyyət üzərinə götürdüyünü bildirən tələbələr Ali Baş Komandan əmr verərsə hər birinin ön cəbhəyə gedib doğma torpaqlarımızı azad edənədək vuruşmaq əzmində olduqlarını ifadə ediblər.

Tədbir iştirakçıların Azərbaycan himninin səsləndirilməsi və "Qarabağ bizimdir, bizim olacaq" şüarları ilə başa çatıb.

Həbsdəki polkovnik də Prezidentə müraciət edib

Hazırda Ədliyyə Nazirliyi Penitensiar Xidmətin 1 saylı Bakı İstintaq Təcridxanasında saxlanan Müdafiə nazirinin sabiq müavini, polkovnik Mehman Səlimov dövlət başçısına müraciət edib.

"Qafqazinfo"ya daxil olan müraciətdə M.Səlimov qeyd edir ki, bu gün İstintaq Təcridxanasında saxlanan şəxslər bir nəfər kimi silaha sarılaraq düşmənlə döyüşə getmək istəyir: "Cənab Ali Baş Komandan, mən Azərbaycan ordusunun yaradılmasında, əsgər-zabit heyətinin formalaşmasında xüsusi xidmətlər göstərmişəm və Qarabağ döyüşlərində iştirak etmişəm. 1999-cu ilə qədər Müdafiə nazirinin şəxsi heyətlə iş üzrə müavini vəzifəsində çalışmışam. Bu gün həbsdəyəm. Şübhə etmirəm ki, haqq öz yerini tapacaq, mənim günahsızlığım sübut olunacaq və bundan sonra da bütün varlığımla Azərbaycana xidmət edəcəm.

Bununla belə, mən həbsdə rahat yata bilmirəm. Sevinirəm ki, bu gün güclü Azərbaycan ordusu düşmənə sarsıdıcı zərbələr vurur, ermənilər pərən-pərən olub. Artıq terrorçu Ermənistan dövləti Azərbaycanın qarşısında diz çöküb.

Məhz Sizin qətiyyətiniz, siyasətiniz, peşəkarlığınız, ordumuzun gücü sayəsində düşmən xeyli geri çəkilib.

Cənab Ali Baş Komandan, bu gün həbsxanada onlarla gənc mənə müracitə edir ki, döyüşmək istəyirik. Mən ehtiyatda olan polkovnik kimi Sizdən xahiş edirəm ki, mənim, eyni amanda burada həbsdə olan onlarla gəncin xahişini nəzərə alasınız və bizi cəbhəyə düşmənlə döyüşə göndərəsiniz. Bir hərbçi üçün ən şərəfli yol döyüş meydanıdır. Xahiş edirəm, dövlətimə, millətimə yenidən xidmət göstərməyim üçün məni buradakı dustaqlarla birlikdə cəbhə xəttinə göndərəsiniz. Biz ölməyə yox, öldürməyə hazırıq! Son qanıma qədər döyüşə hazıram. Vaxtilə erməni ordusuna vurduğum zərbələri bir daha təkrarlamaq istəyirəm".

Qeyd edək ki, Mehman Səlimov Cinayət Məcəlləsinin 179-cu (mənimsəmə) maddəsi ilə təqsirləndirilərək həbs edilib. Hazırda Bakı Ağır Cinayətlər Məhkəməsində onun ittiham olunduğu cinayət işi üzrə məhkəmə prosesi davam edir.

Göyçaydan Röyal Hacıyev adlı bir qardaşımız yazır...

"Mən Göyçaydan yazıram. Dünən Tərtər rayonunun Marquşevan kəndinə qədər getdik, imkanımız daxilində dostlar arasında topladığımız yardımı çatdırmaq istəyirdik. Orada post qurulmuşdu, artıq dərəcədə xahiş etməyimizə baxmayaraq, bizi geri qaytardılar və bizə deyildi ki, siz ordumuza güvənin, narahat olmayın, əsgərlərimiz üçün dövlətimiz tərəfindən bütün ərzaqlar gətirilir. Dərhal geri qayıtmağımızı istədilər. Bir daha qürur duyduq dövlətimizlə. Həqiqətən fəxr edirəm ki, AZƏRBAYCANLIYAM".

Aşağıdakı sətirlər isə başqa bir soydaşımızın şahidi olduğu və qürur duyduğu mənzərəni gözlər önünə sərir:

"Axşam saat 7-8 aralığında Tərtərə Bakıdan 4 maşın gənc gəlmişdi - el arasında Cip deyilən maşınlarda. Hamısı 25-30 yaşlarında gənclər idi. Maşınlara Azərbaycan bayraqları taxıb, könüllü döyüşməyə gəlmişdilər. Hərbçilərimiz onlara ehtiyac olmadığını deyib rayonu tərk etməyi xahiş etdilər. Onlar isə inad göstərdilər, ön cəbhəyə getmək üçün silah istədilər. Sonda polis çağırıldı və iki polis maşınının müşayiətilə rayondan çıxarıldılar (videoya çəkmişik). Tərtər körpüsünün üstünə çatanda gəncin biri yüksək səslə "Onda gedirik Ağdam tərəfdən döyüşməyə" - dedi. Mənim özümə 20-dən çox gənc zəng etdi ki, gəlmək istəyirik Tərtərə. İnsanlarımız döyüş istəyir, qələbə istəyir.

Millətimizlə qürur duydum!"

Namiq QULİYEV

DİGƏR XƏBƏRLƏR

Tarix: 30.10.2026 / 06:41

Yəhudilər erməni monastırına tüpürdülər

Tarix: 29.10.2026 / 17:00

Bir Millət, İki Dövlət, Bir Ürək: Türkiyə Cümhuriyyətinin 103-cü ildönümü münasibətilə İctimai Nəzarət Təşkilatının Təbrik Bəyannaməsi

Tarix: 28.10.2026 / 12:51

ROZA TÖREKULOVNA AYTMATOVANIN ƏZİZ XATİRƏSİNƏ

Tarix: 28.10.2026 / 08:35

Türkiyədəki “sərmayə olayı” Pasifik Holding-i də vurdu - aktivləri donduruldu

Tarix: 28.10.2026 / 06:26

Türkiyədə səs-küylü “Starlink əməliyyatı” - 85 nəfər saxlandı

Tarix: 27.10.2026 / 13:54

"Bakı bu cür beynəlxalq forumlar vasitəsilə mədəniyyətlərarası dialoqa mühüm töhfə verə bilər" - Ozodbek Nazarbekov

Tarix: 27.10.2026 / 13:30

Penitensiar Xidmətə yeni rəis təyin edildi

Tarix: 27.10.2026 / 10:28

Dubay məhkəməsi Rusiya neftinin satışından 700 milyon dollardan çox vəsaiti dondurub - işin içində azərbaycanlılar da var…

Tarix: 26.10.2026 / 06:58

Vuçiç seçkidə məğlubiyyətini rəsmən bəyan etdi

Tarix: 24.10.2026 / 08:38

Serbiyada etirazlar pik həddə - gənclər Vuçiçi devirməyə qərarlıdır

Tarix: 22.10.2026 / 15:01

44 günün fövqündə: milli iradənin və tarixi yaddaşın təntənəsi

Tarix: 20.10.2026 / 22:19

İran XİN sözçüsü Azərbaycana tövsiyə verməyə qalxdı - həm də insan haqları mövzusunda…

VİDEO

Tarix: 17.10.2026 / 17:10

Aydın Quliyev Mətbuat Şurasında seçkilərə qatılmamasının səbəblərini qurultayda açdı... - VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 02.11.2026 / 23:02

Bunu səfir Birol Akgünə açıq məktubum kimi də oxuya bilərsiniz - Aydın QULİYEV yazır...

Tarix: 29.10.2026 / 17:35

Məhkəmə hakimlərinin yeni "Etik Qaydaları"nda bir vacib məqam unuduldu...

Tarix: 29.10.2026 / 17:05

Ramiz Mehdiyevin təltiflərdən məhrum edilməsinin hüquqi mexanizmləri var...

Turizm regionlarımızın inkişaf mənbələrindən birinə çevrilir...