Məlum olduğu kimi, ermənilər Hindistan Milli Azadlıq Hərəkatının lideri Mhatma Qandiyə İrəvanda heykəl qoyublar. Bu heykəli qoymasaydılar daha yaxşı olardı. Çünki M.Qandinin abidəsinə qarşı Ermənistanın paytaxında dəfələrlə təxribatlar, hücumlar, qırmızı boyalarla rəngləmələr və yanğınlar törədilib. Son günlər də M.Qandinin İrəvandakı abidəsinə qarşı yanğın törədildiyi haqda məlumatlar yayılıb.
Qeyd edək ki, bundan əvvəl 24 aprel tarixində də M.Qandinin heykəli yandırılmışdı. Mətbuat yazır ki, Ermənistanın İstintaq Komitəsinin ölkə paytaxtının Açapnyak və Davtaşen dairələri üzrə İstintaq İdarəsi Hindistan Milli Azadlıq Hərəkatının lideri Mhatma Qandinin İrəvandkı heykəlinin yandırılması faktı üzrə cinayət işinin ilkin araşdırmasının başa çatdığı barədə məlumat yayıb. "Report"un məlumatına görə, İstintaq komitəsinin mətbuat xidməti məhkəmədən əvvəlki araşdırmanın gedişatında hadisənin başvermə şəraiti ilə bağlı bir sıra əhəmiyyətli faktların aydınlaşdırılması, həmçinin, cinayətkarın İrəvanın 61 yaşlı kişi sakini olması barədə məlumat yayıb. Guya ki, həmin şəxs spirtli içkinin təsirindən bu cinayəti törədib...
Tarixçilər isə M.Qandinin İrəvandakı abidəsinin revanşistlər tərəfindən hədəfə alındığını deyir. Ekspertlər qeyd edir ki, Qandinin heykəli İrəvanda 2020-ci ildə ucaldılıb və həmin vaxt ermənilərdən bir çoxu heykəlin qoyulmasına etiraz edib. Eksperetlərin sözlərinə görə, revanşistlər Mhatma Qandinin, Mustafa Kamal Atatürk başda olmaqla, Türkiyənin o vaxtkı rəhbərliyi ilə münasibətlərinin yaxşı olması və ermənilərin saxta soyqırımı iddialarını qəbul etməməsi səbəbindən abidəsinin götürülməsini istəyir.
“...heyflərini abidədən çıxırlar”
Azərbaycan Milli Elmlər Akademiyası (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev baki-xeber.com-a bildirdi ki, M.Qandiyə qarşı erməni şovinistlərində, revanşistlərində, daşnaklarında kəskin bir nifrət var, onlar bu nifrəti hər fürsətdə ifadə edirlər. “Dünyada hər bir xalqın özünün yetişdirdiyi böyük şəxsiyyətlər, sərkərdlər olub, onlar xalqlarının tarixində böyük rol oynayıblar və tarixdə qalıblar. Mhatma Qandi də sülhpərvər bir siyasətçi kimi həm Hindistan, həm də dünya tarixində mühüm işlər görüb. Ermənistanda Mhatma Qandiyə abidə qoyulması bilirsiz nə ilə bağlı idi? Ermənistan dünya siyasətinə qoşulmaq, özünü “humanist”, “sülhpərvər”, “sivil” kimi qələmə vermək, eyni zamanda da bu ölkənin az qala hər yerindəki faşist heykəllərini unutdurmaq üçün Qandiyə abidə qoydular. Ermənilər özlərini Hindistan qaraçılarının nəsilindən hesab edirlər. Həm də hindlilərlə qohumluqlarını qabardaraq Qandini öz “qohumlar”ı elan etmək istəyirdilər. Bilirsiz ki, dünyanın bütün sülhpərvər kəsimləri İrəvanda Qandiyə heykəl qoyulmasını böyük təəccüb və sualla qarşıladı. Daşnaklar və revanşistlər isə abidəyə böyük təpki göstərdilər, etirazlarını hakimiyyətə də bildirdilər, lakin abidənin götürülməsinə nail ola bilmədilər, ona görə də tez-tez abidəyə qarşı bu cür təxribtlatlar törədirlər. Ermənistandakı şovinistlər, daşnaklar, revanşistlər Qandinin abidəsinə qarşı ona görə belə qeyri-insani davranış sərgiləyirlər ki, o, vaxtlə saxta erməni soyqırımını tanımaqdan imtina edib və belə bir olayın baş vermədiyini deyib. Bunu da ermənilər uzun illərdir ki, heç cür qəbul edə bilmirlər və heyflərini abidədən çıxırlar. Daşnaklar Qandini öz təxribatlarına, saxta soyqırım miflərinə alət edə bilmədilər, bu səbəbdən də revanşistlər ona nifrət bəsləyirlər. Bu gün də revanşistlər deyir ki, Qandinin heykəli götürülməlidir, heykəl yerindədir, amma başına minbir oyun gətirilir. Bu ölkədə it yiyəsini tanımır, ona görə də hər cür mənfiliklər baş verir. Abidə yandırılır, Ermənistan höküməti bunu inkar etmək üçün, guya bunun əvvəlki dönəmdə bir əyyaş tərəfindən içkili vəziyyətdə törədildiyini deyir. Görürsüz, bu ölkə necə yalançı, məkrli siyasət yürüdür, onlar bir dənə də olsun doğru söz demirlər. Ermənstan iqtisadiyyatı batıb gedir, dünyanın müxtəlif banklarına milyardlarla borcları var. ”-deyə Q.Hacıyev qeyd etdi.
İradə SARIYEVA
