“Əgər vaksinasiya olmasaydı, virusa yoluxanların və ölənlərin sayı qat-qat çox olacaqdı”
Azərbaycanda son günlər koronavirusa yoluxanların sayı günbəgün artmaqdadır. Təkcə son sutkada koronavirus (COVID-19) infeksiyasına 1242 yeni yoluxma faktı qeydə alınıb, 345 nəfər müalicə olunaraq sağalıb. Analiz nümunələri müsbət çıxan 8 nəfər vəfat edib.
İndiyədək ölkədə ümumilikdə 349316 nəfərin koronavirus infeksiyasına yoluxması faktı müəyyən edilib, onlardan 334258 nəfər müalicə olunaraq sağalıb, 5051 nəfər vəfat edib, aktiv xəstə sayı 10007 nəfərdir. Son sutka ərzində yeni yoluxma hallarının müəyyənləşdirilməsi ilə əlaqədar 10819, ötən müddət ərzində isə ümumilikdə 4094565 test aparılıb.
Bu arada məlum olub ki, koronavirusa yoluxanların sayında qəribə bir təzad yaranıb. Məsələ ondadır ki, 6 avqust 2020-ci ildə Azərbaycanda koronavirusa yoluxma halı cəmi 144 nəfər, vaksin vurulan insan sayı 0 olub. 6 avqust 2021-ci ildə isə əhalinin 20 faizindən yuxarı vaksinasiya olunduğu halda ölkədə koronavirusa yeni yoluxma halı 1242 nəfər olub. Nə baş verir? Sözügedən müqayisə doğrudurmu?
Məsələyə münasibət bildirən Tibb Universitetinin Farmakologiya kafedrasının dosenti Aydın Əliyevin fikrincə, rəqəmlərlə bağlı bu cür müqayisələrə birmənalı yanaşmaq doğru deyil: “Məsələ ondadır ki, keçən illə indiki arasında belə fərqin olması bir sıra amillərlə bağlıdır. Keçən ilin avqustunda yoluxma sayı ona görə az idi ki, virus yeni yayılırdı, ölkədə karantin rejimi ilə əlaqədər ciddi məhdudiyyətlər var idi. Təmaslar çox aşağı, təcridolunma səviyyəsi yüksək idi. Bu il isə situasiya fərqlidir. O mənada ki, koronavirusun müxtəlif variantları ortaya çıxıb. Virus mutasiyaya məruz qalır və hələ bilmədiyimiz variantları da çoxalır. Üstəlik nəzərə alınmalıdır ki, toylara, bu kimi digər məclis və toplantılara icazə verilib. Yay fəsli ilə əlaqədar təmaslar artıb. Bütün bunlar, istər-istəməz, koronavirusa yoluxanların sayının artmasına öz təsirini göstərir. Ancaq bu o demək deyil ki, vaksinasiyanın faydası yoxdur. Əgər vaksinasiya olmasaydı, virusa yoluxanların və ölənlərin sayı qat-qat çox olacaqdı. Ona görə də statistik rəqəmləri müqayisə edib vaksinasiyanın əhəmiyyətini aşağı salmaq olmaz. Çünki ötən il situasiya fərqli idi, bu il tamam fərqlidir. Bununla yanaşı, ötən ildən fərqli olaraq, bu il karantin qaydaları yumşalandan sonra insanlarda arxayınçılıq yaranıb. Bu amilin də yoluxmanın artmasında xüsusi rolu var. Hesab edirəm ki, bu düz deyil. Qaydalara son dərəcə ciddi yanaşmaq lazımdır. Heç kəs istəməz ki, karantin qaydaları sərtləşdirilsin. Ancaq gərək insanlar da qayda-qanuna əməl etsin. Karantin qaydalarının yumşaldılmasından sui-istifadə etməsin. Nəzərə almaq lazımdır ki, insanlar bir-biri ilə çox yaxın təmasda olduqda bunlar baş verir. Ona görə təmaslar minimuma endirilməlidir”.
Bir sözlə, tanınmış həkim hesab edir ki, qaydalara ciddi əməl olunsa, yoluxmaların sayı azalacaq.
Vidadi ORDAHALLI
