Gün ərzində psixologiyamıza təsir edən bir çox amil var. Hava, planlarımız, ətraf mühit və s. bizə müsbət və ya mənfi təsir göstərir. Sadalananların sırasına əlavə edə biləcəyimiz gündəlik vərdişlərimizdən biri olan qidalanmanın psixologiyamız, şüuraltımız üzərində çox təsirli olduğunu bilirdinizmi?
İnsan psixologiyası qəbul edilən qidadan çox asılıdır. Bəzi qidaların insanı sakitləşdirdiyi, bəzilərinin isə aqressivləşdirdiyi danılmaz reallıqdır. Çünki qidaların tərkibindəki maddələr orqanizmdəki hormonların səviyyəsini dəyişdirərək, özümüzü xoşbəxt və ya kədərli hiss etməyimizə səbəb olur.
Sosioloq-jurnalist Lalə Mehralı “Bakı-Xəbər” qəzetinə qidaların insanın əhval-ruhiyyəsinə olan təsirindən danışıb.
“İnsan gün ərzində nə ilə qidalanırsa psixologiyasına və fiziki sağlamlığına təsir eləyir. Dövrün bəlası - fast fud qidalanma məsələsi burada çox böyük rol oynayır. Sürətli yemə, sürətli həyat, sürətli davranış insanlarda narahatlıq, qərarsızlıq yaradır”, - sosioloq-jurnalist deyib.
Lalə Mehralının sözlərindən belə çıxır ki, insan bədənində zülalı təmin edən qida kimi bilinən ət, heç də bizim düşündüyümüz kimi faydalı qida kateqoriyasına aid edilmir. Onun sözlərinə görə, ət insanda aqresiya yaradır.
“Ət xörəklərini, ətli yeməkləri sevən insanların həm düşüncəsi, həm psixologiyası, həm də fiziki sağlamlığı ləng inkişaf edir. Daha çox təbii qidalara ağartı məhsullarına, tərəvəz tipli qidalanmaya üstünlük verənlər daha çevik, denerjili və dinamik olurlar. Siz ətrafınıza diqqət etsəniz, vegetarianların həddindən artıq dinamik insanlar olduqlarını görərsiniz. Ət insanda düşüncə, analiz və zəka inkişafına mane olur. Əti çox yeyən insanların kritik anlarda vəziyyətdən çıxma qabiliyyəti zəif olur. Ətsiz qidalanma ilə qidalanan insanlar daha sülhsevər, sevgi dolu olurlar. Yəni bir növ ət aqressiya yaradır”, - o bildirib.
Məsələ ilə bağlı psixoloq Fərqanə Mehmanqızı qəbul etdiyimiz qidaların uşaqlıq yaşlarından şüuraltımızda kodlaşdırılıdığını deyir.
“İnsanın ümumiyyətlə hər bir yediyi yemək uşaqlıqdan şüuraltında kodlaşdırılmış qida olur. Yəni bədənin nəyə, hansı vitaminə ehtiyacı olduğu onda artıq şüuraltı kodlaşdırılıb”,- F. Mehmanqızı söyləyib.
Onun sözlərinə görə, düzgün qidalanmamaq, pəhrizi doğru saxlamamaq da şüuraltıya, psixologiyaya təsir edir.
“Gərək qidalanmanı elə qaydaya salasan ki, zərər görməyəsən. Pəhriz saxlamaq istəsək, psixologiyamızın gücü çatacaq pəhriz saxlamalıyıq, Yanlış pəhriz insanı stressə, depressiyaya sala bilir”, - psixoloq vurğulayıb.
Məryəm Bayram BDU-nun Jurnalistika fakültəsinin IV kurs tələbəsi, praktikant
