Separatçı tör-töküntüsü yenə də qanunsuz davranışlarını davam etdirir. Oyuncaq “prezident” Araik Arutyunyan getdikdən sonra separatçılar yeni “prezident” və “parlament” “seçkiləri” keçirirlər. Mətbuatda yazılanlara görə, sentyabrın 9-da, yəni bu gün Qarabağda separatçı qurumun “parlamenti” “prezident” “seçməlidir”. Bəzi şərhçilərə görə, Qarabağ separatçılarının “lideri” olmaq uğrunda bir neçə nəfər “mübarizə aparır”.
Oyuncaq rejimdə “keçiriləcək seçki” ilə bağlı Azərbaycan Xarici İşlər Nazirliyi artıq bəyanat verib. “Bu qeyri-qanuni qurumun "prezidentinin" planlaşdırılan qondarma "seçkiləri" son dərəcə təxribatçı addımdır”. Bu fikir Xarici İşlər Nazirliyinin (XİN) sentyabrın 8-də yaydığı açıqlamada yer alır. XİN-də Azərbaycanda akkreditə olunmuş diplomatik korpus üçün bölgədə cari vəziyyətlə əlaqədar brifinq keçirilib. Brifinqlə bağlı məlumatda habelə qeyd edilib ki, Azərbaycanın suverenliyinin və ərazi bütövlüyünün bu cür açıq şəkildə pozulması heç bir halda məqbul və qəbuledilən deyil.
Beynəlxalq vasitəçilər Xankəndidə indiki qondarma “seçkinin” qarşısını almalı idilər, bəs niyə almadılar?
“Alyans” strateji araşdırmalar mərkəzinin rəhbəri Abutalıb Səmədov baki-xeber.com-a şərhində “bu gün Qarabağda keçiriləcək “prezident seçkisi” bizim üçün tam əhəmiyyətsiz bir hadisədir. Bu addım Qarabağda vəziyyəti gərginləşdirməkdən başqa heç nəyə xidmət etmir. Şübhə yoxdur ki, dünya da bu addıma seyrçi mövqeyindən yanaşacaq, yenə də “humanitar fəlakət” nağılları danışılmaqda davam ediləcək. Halbuki, beynəlxalq ictimaiyyət, beynəlxalq vasitəçilər bu qondarma “seçkinin” keçirilməsinin qarşısını almalı idilər. Amma gördüyünüz kimi, buna hər hansı cəhdlər edilmədi.
Çox təəssüf ki, dünya birliyi bölgədəki reallıqları görmək istəmir və baş verən hadisələri “humanitar məsələ” kimi izah etməyə çalışır. Əslinə qalsa söhbət Azərbaycanın suverenliyinə, ərazi bütövlüyünə qəsddən gedir və ermənilər qəti şəkildə Azərbaycanın tərkibində yaşamayacaqlarını deyirlər. Ağdam yolu ilə gətirilən humanitar yardımı qəbul etməməyin kökündə də bu amil dayanır. Azərbaycandan gələn yardımı qəbul etmək, Azərbaycanla reinteqrasiyaya hazır olmaq kimi yozula bilər və bu son 30 ildə bölgədə baş verən hadisələrdən təngə gəlmiş sadə ermənilərdə Azərbaycanın tərkibində sakit yaşamaq ümidləri yarada bilər. Qarabağda “hakimiyyəti” ələ almış cinayətkar dəstəni təbiidir ki, bu qane etmir” - deyə bildirdi.
A.Səmədovun vurğuladığına görə, Azərbaycanın ərazi bütövlüyünü və suverenliyini tanıdığını deyən Ermənistan da ikibaşlı oynamağa davam edir, bir tərəfdən Praqda və Soçidə Azərbaycanın ərazi bütövlüyünü və suverenliyini tanıdığını deyir, o biri tərəfdən Qarabağda yaşayan ermənilərin “müstəqillik günü”nü təbrik edir, onlara “dövlətlərarası” kredit ayırır. O, bildirdi ki, qondarma “seçki” də Ermənistanın ayırdığı “əlverişli kredit” hesabına keçirilir. A.Səmədov vurğuladı ki, bu il Ermənistan Qarabağa təqribən 370 milyon dollar “dövlətlərarası” kredit ayırıb. “Dünya birliyinin heç vaxt ağlına gəlməyib ki, soruşsun, Ermənistan hansı dövlətə kredit ayırır? Qarabağ deyilən “dövlət” varmı? Çox təəssüf ki, hələ Paşinyana bu sualı vermək nə ABŞ-ın, nə də onun Avropa İttifaqındakı müttəfiqlərinin ağlına gəlmir. Qərbin bu münasibətindən faydalanan separatçı ermənilər öz şoularını davam etdirirlər, Qarabağdakı ermənilərin acından “öldüyünü” deyirlər, onu da əlavə edirlər ki, “biz qürurlu insanlarıq və Azərbaycandan gələn yardımı qəbul etmərik”. Ermənilərin nə qədər “qürurlu” olduğunu, öz məqsədlərinə çatmaq üçün hansı dərəcədə özlərini alçaltmağa qadir olduğunu bütün dünya bilir. Ümumiyyətlə, ermənilər qürurdan danışacaq axırıncı insanlardır...”
...Çox təəssüf ABŞ-ın bu məsələdə qəti mövqe tutmaq istəmədiyini deyən A.Səmədov təəssüflə qeyd edir ki, ABŞ-a nisbətən Rusiya çox aydın mövqe tutur, açıq şəkildə deyir ki, Ağdam yolu açılmalıdır və bundan sonra Laçın yolu ilə yüklərin daşınması məsələsi müzakirə oluna bilər. A.Səmədov əlavə etdi ki, amma ABŞ bu qədər aydın mövqe ortaya qoymayıb, ilk növbədə açıq olan Laçın yolu ilə humanitar yüklərin daşınmasına “imkan verilməsini” tələb edir, Azərbaycan isə bu addımı atmayacağını deyir. “Çünki bu addım sadə ermənilərin maraqlarına uyğun gəlmir. Azərbaycanın bu təzyiqlərə cavab verərək humanitar yükləri Laçın yolu ilə buraxması Qarabağda həmin cinayətkar dəstənin mövqeyini bir az da möhkəmləndirə və sadə insanları çaşdıra, onları Qarabağ ermənilərini girov saxlayan cinayətkar dəstənin “haqlı olduğuna” inandıra bilər ki, bu son nəticədə sadə erməni vətəndaşlarımızın faciələrinin davam etməsinə gətirib çıxara bilər. Azərbaycan bu proseslərə son qoymaq istəyir. Və hamıya başa salmaq istəyir ki, Qarabağdakı ermənilər Azərbaycanın tərkibində, onun suverenliyi altında yaşayacaq, ermənilərin hüquq və təhlükəsizliyi təmin olunacaq, separatizmin kökü qazınacaq. Həm ermənilərə, həm də Azərbaycanda yaşayan digər xalqlara böyük fəlakət gətirən separatizmin kökləri tamamilə kəsiləcək. Bundan sonra bir də Qarabağda bu cür qanlı fəlakətlər törətmək imkanı saxlanılmayacaq. Bundan sonra Qarabağ erməniləri, yaxud onları yoldan çıxaran bir qrup cinayətkar dəstə Azərbaycanın ərazi bütövlüyünü və suverenliyini pozmağa cəsarət göstərə bilməyəcəklər. Bu həqiqətləri həm dünya birliyi, həm də ermənilər nə qədər tez dərk etsələr bir o qədər hamı üçün yaxşı olacaq. Çox təəssüf ki, hələlik ilk növbədə ABŞ Ermənistana və Qarabağdakı ermənilərə öz qəti sözünü deməkdən çəkinir. Bu da həm reinteqrasiya proseslərini, həm də Qarabağ ermənilərinin hüquq və təhlükəsizliklərinin təmin olunmasını ləngidir” - deyə A.Səmədov qeyd etdi.
Sonda onu da qeyd edək ki, Samvel Şahmaryan, separatçıların yeni rəhbəri "seçilib".
İradə SARIYEVA
