Azərbaycan Ermənistanla sülh müqaviləsinin bağlanması üçün müvafiq addımlar atsa da qarşı tərəf prosesi əngəlləməkdə davam edir. Bu gün Ermənistan sülh prosesində iştirak görüntüsü yaratmağa, reallıqda isə status-kvonu saxlamağa və danışıqlarda tərəqqi əldə olunmadığı halda bütün günahı Azərbaycan tərəfinin üzərinə qoymağa çalışır.
Azərbaycan isə yuxarıda qeyd olunduğu kimi sülh prosesinə sadiqdir, Ermənistana müvafiq müqavilə, sərhədlərin delimitasiyası və kommunikasiyaların yenidən açılmasını təklif edib. Hansısa güzəştə heç bir vəchlə razı olmayan Ermənistan və Azərbaycanın suveren ərazisində fəaliyyət göstərən separatçı qurum bütün bunları əngəlləyir.
Belə bir vaxtda Ermənistan növbəti radikal addımlar atır. Söhbət hərbi müstəvidə yaradılan gərginlikdən gedir. Qeyd edək ki, Ermənistan Azərbaycanla sülh müqaviləsi imzalamamaq üçün təxribatları artırır, şərti dövlət sərhədi boyunca mütəmadi şəkildə atəşkəsi pozaraq, beynəlxalq ictimaiyyətin fikrini bölgəyə yönəltməyə çalışır. Qanunsuz silahlı birləşmələrini Qarabağdan hələ də çıxarmayan, Azərbaycanın ərazi bütövlüyünü sözdə tanıyıb, əməldə əks addımlar atan İrəvan separatçı rejim vasitəsilə Rusiya sülhməramlı kontingentinin yerləşdiyi ərazidə də gərgin durumun olmasına cəhd edir. Görünür, Ermənistan İkinci Qarabağ müharibəsində aldığı dərslərdən nəticə çıxarmayıb. Fransa, İran və bəzi başqa ölkələrdən aldığı dəstəklə Ermənistan regionda Azərbaycanın yaratdığı reallıqları dəyişməyə can atır. Hətta hərbi dairələrdəki mənbələr Ermənistanın Azərbaycanla şərti sərhəddə 1,2,3 və 4 saylı hərbi korpusları fəal şəkildə gücləndirdiyi, son həftələr İran ərazisindən zirehli texnika və artilleriya mərmilərinin çatdırılması barədə məlumatları təsdiqləyirlər. Məsələ ilə bağlı “Caliber” portalının məlumatında bildirilir ki, təmir və texniki hissələr durmadan işləyir, təmir oluna bilən hər şeyi işə salmağa çalışırlar: "Ermənistan Azərbaycanın Qarabağ bölgəsi ərazisində də silahlı qüvvələrini yüksək döyüş hazırlığı səviyyəsinə çatdırıb. Təkcə son bir həftədə ehtiyatda on minə qədər hərbçi çağırılıb və bunun fonunda erməni hərbi ekspertlərin guya ölkədə səfərbərliyin aparılmaması ilə bağlı açıqlamaları “Azərbaycana dezinformasiya kampaniyasından başqa bir şey deyil”deyə dünya ictimaiyyətini çaşdırırlar. Yaxın vaxtlarda həm öz daxili siyasi hesablamaları, həm də geosiyasi öhdəlikləri olan Nikol Paşinyan rejimi tərəfindən ciddi hərbi təxribat gözləməyə əsas var. Qarabağda resursların məhdud olduğunu nəzərə alsaq, çox güman ki, orada diversiya xarakterli təxribat əməliyyatları aparıla bilər, eyni zamanda əsas döyüş əməliyyatları düşmən tərəfindən bizim Ermənistanla şərti sərhədimizə keçəcək”. Artıq Ermənistanın paytaxtı İrəvandan böyük hərbi karvan Azərbaycanla şərti sərhədə gətirilib. Hərbi birləşmələrin yerdəyişməsi Ermənistanın Azərbaycana qarşı növbəti hərbi təxribata hazırlaşdığını sübut edir. Şübhəsiz ki, Ermənistan hərbi təxribatlarının miqyasını artırarsa, Azərbaycan ordusu təhlükəsizliyi təmin etmək məqsədilə bunun qarşısını çox sərt şəkildə alacaq.
Qeyd edək ki, artıq neçə gündür Azərbaycanın Müdafiə Nazirliyi Ermənistanla sərhəddə ordumuzun mövqelərinin atəşə tutulduğunu bildirir. Ekspertlər hesab edir ki, Kəlbəcər, Naxçıvan, Laçın, Zəngilan istiqamətində hərbi toqquşmalar mümkündür. Amma qeyd edildiyi kimi Azərbaycanın istənilən təxribata cavabı sərt olacaq. Bunu erməni tərəfi də yaxşı bilir, amma müəyyən xarici güclərin diqtəsi ilə təxribatçı fəaliyyətinə də son vermir. Türkiyənin “Yeni şafak” qəzeti də bu fonda yazır ki, indi Fransanın təhriki ilə İrəvan regionda vəziyyəti gərginləşdirir. Qeyd edilir ki, Fransa prezidenti Emmanuel Makron İkinci Qarabağ müharibəsindən sonra Ermənistanla Azərbaycan arasında yaşanan hər gərginlikdə İrəvanın tərəfində çıxış etməkdə davam edir. Məqalədə vurğulanır ki, Fransa Birinci Qarabağ müharibəsində də Ermənistana dəstək verməsi ilə yadda qalıb: “2020-ci ildə Ermənistan Türkiyənin İdlib və Liviyadakı müharibədə fəal iştirakından istifadə edərək yenidən Azərbaycana hücum edib. Azərbaycan ordusu əks-hücumla həm Ermənistanın təxribatlarına cavab verdi, həm də öz doğma torpaqlarını erməni işğalından azad etdi. Ermənistanı açıq şəkildə müharibəyə təhrik edənlər sırasında Fransa da vardı, onun məğlubiyyətində payı var. İkinci Qarabağ müharibəsi Ermənistan üçün böyük məğlubiyyətdir, ancaq Azərbaycan və Türkiyə nəticənin ağlabatan səviyyədə saxlanmasına, yeni düşmənçilik törətməməsinə diqqət yetirdilər”. Məqalədə Fransanın Qarabağda yaşayan ermənilərə yardım göndərməsinə də toxunulub: “Fransa açıq şəkildə Azərbaycan ərazisinə daxil olmaq və İkinci Qarabağ müharibəsinin nəticələrini öz xeyrinə dəyişmək istəyir. Azərbaycan tərəfinin yardım maşınları ilə bağlı açıqlamaları da məntiqlidir. Bildirilib ki, Azərbaycan öz ərazisində yaşayan insanlara onların tələblərinə uyğun yardım göstərə bilər. Fransa isə humanitar yardım məqsədinə uyğun hərəkət etmir. Emmanuel Makron Parisin maraqları üçün Ermənistanın xeyrinə siyasi məqsədlər güdür. Bu, Cənubi Qafqazda hərbi və siyasi gərginliyi artırır”. Məqalədə o da qeyd edilib ki, Fransa Cənubi Qafqazda erməniləri yenidən təxribata çəkməklə fürsət axtardığını nümayiş etdirdi. Amma sonda bundan zərər görən əsas tərəf yenə Ermənistan özü olacaq.
Nahid SALAYEV
