Ermənistan Təhlükəsizlik Şurasının katibi Armen Qriqoryan erməni mediasına bildirib ki, Ermənistan və Azərbaycan arasındakı sülh müqaviləsinin mətnində Dağlıq Qarabağın adı çəkilir, amma bu hələ yekun sənəd deyil:
“Hazırda danışıqlar aparılır. İctimaiyyət və jurnalistlər konkretlik gözləyir, başa düşürəm, amma mən də bu müəyyən mənada danışıqlar prosesi olduğuna bizim də başa düşülməyimizi gözləyirəm. Danışıqlarda belə bir nüans olur: əgər hər şey razılaşdırılmayıbsa, deməli, hələ heç nə razılaşdırılmayıb”.
Təhlükəsizlik Şurasının katibi açıqlamasında həmçinin vurğulayıb ki, hazırda Ermənistan tərəfi Azərbaycanla sülh müqaviləsinin mətni üzərində işləyir. Onun sözlərinə görə, ən qısa zamanda Ermənistan tərəfi mətni yenidən Azərbaycana təhvil verəcək: "Hazırda transferin necə baş tutacağını deyə bilmərəm, amma məsələ aydın olanda, ictimaiyyətin bundan xəbər tutacağını düşünürəm".
Maraqlıdır, Azərbaycan tərəfi ən yüksək səviyyədə dəfələrlə bəyan edib ki, sülh müqaviləsində “Dağlıq Qarabağ” adının çəkilməsi mümkün deyil. Erməni rəsmisi isə sənəddə “Dağlıq Qarabağ”la bağlı qeydlərin olduğunu bildirir.
Bunu necə anlamaq olar?
Politoloq Qabil Hüseynli “Bakı-Xəbər”ə bildirdi ki, müzakirələr kompromislərin olacağından xəbər verir: “Onlar Qarabağın dağlıq hissəsində yaşayan erməniləri və ordakı qondarma rejimin Azərbaycanın tərkib hissəsi olduğunu, proseslərin Azərbaycan Konistitusiyasına uyğun olaraq tənzimlənməsini qəbul edirlər. Amma iddia edirlər ki, guya sülh müqaviləsində orda yaşayan ermənilərin mədəni hüquqları, insan haqları barədə mütləq nələrsə öz əksini tapmalıdır. Biz bunu qəbul etmək istəmirik. Amma eyni zamanda bəyan edirik ki, bu məsələlərdə hansısa kompromisə getmək olar. Onsuz da beynəlxalq müşahidəçilər Azərbaycanın ermənilərlə bağlı insan hüquqlarına necə hörmət göstərə biləcəyini qeyd edirlər. Azərbaycan da bunu qəbul edir. Amma əsas məsələ: yurisdiksiyadır. Azərbaycan süverenliyinin həmin ərazilər üzərində yayılması məsələsidir ki, hər halda Ermənistanın indiki höküməti bunu qəbul edir. Amma insan haqları və digər mədəni hüquqlar haqqında iddialar irəli sürülür. Azərbaycan Prezidenti bu məsələdə təkidlidir, Azərbaycanın haqlarının tamamilə qəbul edilməsini tələb edir. Düşünürəm ki, əgər ermənilər konstruktiv mövqe tutacaqsa, kompromisə gəlmək mümkün olacaq. Yəni ermənilərin Azərbaycan cəmiyyətinə inteqrasiyası, erməni cəmiyyətinin Azərbaycan vətəndaşlağını qəbul etmələri şərti ilə onların bəzi haqları və hüquqları məsələsi ilə bağlı beynəlxalq nəzarətin təmin edilməsində Azərbaycan müəyyən kompromisə gedə bilər. Amma hər hansı statusdan söhbət gedə bilməz. Bu məsələlər ətrafında hələ uzun məsləhətləşmələr, kompramislər gözlənilir”.
Ermənistan həmişə belə manevrlərlə prosesi sabotaj edir. Dəfələrlə olub ki, hansısa razılıq əldə edilib, ancaq sonda ermənilər aranı qatıb. Azərbaycanın mövqeyi isə stabil olaraq qalır. Biz Qarabağdakı ermənilərə Azərbaycanın digər bölgələrindən fərqli hüquqlar və imtiyazlar verməyəcəyik. Şərtlərimizi qəbul edənlər vətəndaş kimi burada yaşayacaqlar, qəbul etməyənlər üçün isə yol açıqdır. Ermənistan Qarabağda yaşayan ermənilər üçün insan haqlarının qorunmasını tələb edirsə, buna biz də ikiəlli razıyıq. Belə bir təminatın veriləcəyinə biz ən ali səviyyədə söz vermişik. Buna görə də, yaxşı olar ki, ermənilər qeyri-mümkün olan tələbləri irəli sürməklə prosesi yubatmasınlar.
Məhəmmədəli QƏRİBLİ
