Türkiyə Prezidenti Rəcəb Tayyib Ərdoğan ölkənin ən çox zərər görmüş regionuna səfəri çərçivəsində zəlzələ nəticəsində vəfat etmiş şəxslərin sayını açıqlayıb. Qeyd edək ki, zəlzələ qurbanlarının sayı durmadan artır.
Hökumətin zəlzələyə cavabı və hazırlıq səviyyəsi ölkədə siyasi gərginliyi də artırıb. Ərdoğanın bu seçkilərdə əsas rəqibi "Altılı masa" adlandırılan, mərkəz-solçu və sağçı partiyalardan ibarət olan Millət İttifaqıdır. Kılıçdaroğlunun da adı həmin ittifaqdan prezidentliyə namizədlər arasında hallanır. Twitter hesabında paylaşdığı videoda müxalifət lideri Prezident Ərdoğanla heç bir platformada görüşməyəcəyini açıqlayıb və hökuməti zəlzələdən sonra özünü təbliğ etməkdə günahlandırıb.
İstər siyasi düşərgələr arasındakı gərginliyin artması, istərsə də zəlzələnin fəsadları ilə bağlı sadə xalqın tələbləri fonunda qarşıdan gələn prezident seçkisi Ərdoğan hakimiyyəti üçün nə vəd edir?
Aydın Quliyev: “Hazırkı şərtlər daxilində Ərdoğanın 14 may seçkisində seçilməsi də, seçildiyi təqdirdə seçki dönəmini uğurla başa vura bilməsi də çox müşgül olacaq”
“Bakı-Xəbər” Media Qrupun rəhbəri, siyasi şərhçi Aydın Quliyev özünün sosial şəbəkə hesabında bu mövzu ilə bağlı münasibətini belə açıqlayıb: “Hazırkı şərtlər daxilində Ərdoğanın 14 may seçkisində seçilməsi də, seçildiyi təqdirdə seçki dönəmini uğurla başa vura bilməsi də çox müşkül olacaq...”
Abutalıb Səmədov: “Hakim partiyanın seçkilərdə uğur qazanacağını düşünmək qeyri-mümkündür”
Azərbaycan Naminə Alyans Partiyasının sədri Abutalıb Səmədov isə “Bakı-Xəbər”ə açıqlamasında bildirdi ki, Türkiyədə baş verən zəlzələ son yüz ilin ən dəhşətli zəlzələsidir: “Bundan əvvəl 1999-cu ildə güclü zəlzələ olmuşdu və çox təəssüf ki, o zəlzələdən zəruri nəticələr çıxarılmadı. Hətta o dövrdə buraxılan səhvlərdən dəfələrlə artıq səhvlər buraxıldı. Xilasedicilər vaxtında əraziyə yeridilmədi, çadırlar vaxtında qurulmadı. Əhalinin yeməklə, istiliklə təmin olunması üçün lazım olan addımlar atılmadı, xarici ölkələrdən xilasedicilər vaxtında ölkəyə gəlmədilər, onlar üçün lazımi şərait yaradılmadı. Və nəticədə, tələfat sayı artıq 30000 - i keçmək üzrədir, ola bilsin ki, yenə artsın. Bu şəraitdə bu il Türkiyədə həm prezident, həm parlament seçkiləri keçirilməlidir. Zəlzələdən əvvəl də hakimiyyət partiyasının nüfuzu o qədər yüksək deyildi. Rəy sorğuları göstərirdi ki, prezident seçkilərində Rəcəb Tayyib Ərdoğanı udmaq şansı olan bir neçə namizəd var. “Altılı masa” onların hansının namizədliyini irəli sürmək barədə yaxın günlərdə qərarını verməlidir. Ola bilsin ki, zəlzələ bu qərarı bir qədər ləngidər. Təbii ki, müxalifət zəlzələ baş verdikdən sonra buraxılan səhvlərdən gen-bol istifadə edir. Bu səhvlər deyilməməlidirmi? Yəqin ki, deyilməlidir. Həqiqətən də hamı etiraf edir ki, çox ciddi yalnışlara yol verildi. Tam hazırlıqsız yaxalandı Türkiyə. Binaların keyfiyyətsizliyi, onların tikilməsinə göz yumulması, məsuliyyətsizlik bir tərəfə, zəlzələ baş verdikdən sonra hansı addımların atılması, nəticələrin aradan qaldırılması, insanların xilas olması üçün operativ işlərin görülməsi sayəsində çox ciddi nöqsanlar ortaya çıxdı. Son nəticədə bu qədər əhali həlak oldu. Müxalifət də bundan istifadə edir”.
Partiya sədri hesab edir ki, belə şəraitdə Ərdoğanın, onun rəhbərlik etdiyi hakim partiyanın seçkilərdə uğur qazanacağını düşünmək qeyri-mümkündür: “İqtisadiyyat onsuz da kifayət qədər ağır vəziyyətdə idi. İnflyasiya hardasa 80 %-ə çatmışdı. Bu zəlzələ əlavə Ümumi Daxili Məhsulun 10 % -i səviyyəsində, 84 - 85 milyard dollara qədər ölkəyə ziyan vurdu, iqtisadi vəziyyət bir az da pisləşəcək. Və bu, seçkilərin nəticəsinə öz təsirini göstərəcək. Rəcəb Tayyib Ərdoğanın bir siyasətçi kimi natiqlik qabiliyyətini, bacarığını, seçkilərdə son 20 ildə daim qələbə qazandığını nəzərə alsaq, zəlzələdən əvvəl müəyyən ümidlər var idisə ki, seçkini uda bilər, artıq o ümidlərə yer qalmadı. Bu zəlzələ eyni zamanda hakim partiyanın nüfuzunu da darmadağın etdi, çox ağır, böyük zərbə vurdu. Burda nəticə çıxartmalı bir mühüm məqam da Azərbaycanla bağlıdır. 2000-ci ilin noyabrında Azərbaycanda 6.8 bal gücündə zəlzələ oldu və çox ağır anlar yaşadıq. Biz Türkiyə zəlzələsindən zəruri dərsləri çıxarmalıyıq. Biz hazırıqmı? Türkiyədə buraxılan səhvlərin buraxılmaması üçün hər şeyi nəzərə almışıqmı? Əgər Azərbaycanda ilk növbədə 8 və ya 9 ballıq zəlzələ olarsa, biz tam hazırlıqlı bu zəlzələnin nəticələrini aradan qaldıra bilərikmi? 2000-ci ildə zədələnən binalar tamamilə bərpa olundumu, təhlükəsizdirmi? Son dövrdə tikilən binalar 9 bal gücündə zəlzələyə davamlıdırmı? Bütün xidmətlər zəlzələnin nəticəsinin aradan qaldırılması üçün hər an hazırdırlarmı? Bütün bunları düşünməliyik və ciddi nəticələr çıxarmalıyıq. Çox təəssüf ki, biz bu nəticələri qardaş Türkiyədə baş verən bu böyük faciədən çıxartmaq məcburiyyətindəyik”.
Məhəmmədəli QƏRİBLİ
