Qardaş Türkiyədə baş verən dəhşətli zəlzələdən dolayı hümanitar yüklərin daşınması məqsədilə Türkiyə-Ermənistan sərhədinin açılmasına bəziləri bir fürsət kimi baxır. Hətta bəz politoloqlar və şərhçilər bunu Türkiyə ilə Ermənistanın arasında yolların ümumiyətlə açılması kimi qəbul etməyə və qəbul etdirməyə başlayıblar. Bu hadisə baş verəndən bu məsələni təlqin etməkdədirlər.
Türkiyə-Ermənistan sərhədinin humanitar yardımdan başqa digər məqsədlər üçün həmişəlik açılması indiki şəraitdə Azərbaycanın mənafeyinə uyğundur, ya yox?
Aydın Quliyev:“Türkiyə-Ermənistan sərhədinin humanitar kömək xaricində başqa əməkdaşlıqlar üçün açılması Azərbaycanın və bütün türk dünyasının həyati mənafelərinə ziddir, ziyanlıdır və buna əsla imkan verilə bilməz”
“Türkiyə-Ermənistan sərhəd-keçidinin humanitar yardımlar üçün indiki açılması həmişəlik və hər cür əməkdaşlıq üçün açılım olsa, bu, Azərbaycana böyük ziyandan başqa heç bir faydası olmayan hadisə olacaq”. Bunu “Bakı-Xəbər” Media Qrupunun rəhbəri, politoloq Aydın Quliyev öz Facebook səhifəsində yazıb.
“Qardaş ölkənin fəlakətli durumunu bir an unutmadan xaricdən humanitar yardımlar üçün bütün imkanların və yolların açılması zəruridir. Lakin söhbət tək humanitar yardımlardan gedir, düşmən ölkə olsa da, Ermənistanın da yardımları daxil... Zəlzələdən sonrakı müddətdə ehtiyac olduğu vaxta qədər Türkiyə -Ermənistan sərhəd keçidinin humanitar yardımlar məqsədilə açıq saxlanması başadüşüləndir. Lakin Azərbaycanda bəzi “dil pəhləvanı” ekspertlər tapılıb ki, artıq Türkiyə-Ermənistan sərhədlərinin çoxçeşidli və həmişəlik açılmasından və bu açılımın "iqtisadi-siyasi faydalarından" yekə nağıllar qoşmağa başlayıblar. Belələri üçün, sanki zəlzələ Türkiyə-Ermənistan sərhədlərinin açılmasını zəruri və mümkün edən həlledici motiv oldu...
Özünüzə gəlin, bəylər!
Zəlzələnin acılarını bizlər də yaşayırıq, qardaş ölkəyə canımızı da fəda etməyə hazırıq. Lakin Türk dövlətlərinin və türk toplumlarımızın böyük real mənafelərini zəlzələ ağrılarından üstün görə bilmirsinizsə, siyasətlə məşğul olmayın və özünüzə yuxa kimi ürəyin əsas sayıldığı başqa peşələr tapın.
Türkiyə-Ermənistan sərhədi zəlzələyə görə bağlanmayıb ki, zəlzələ üstündə də açılsın... 1988-ci ildə də Türkiyə Ermənistanın zəlzələ qurbanlarına humanitar yardım etmişdi, nə əcəb Ermənistan bu humanizmə rəğmən azəri türklərinə qarşı misilsiz vəhşiliklərdən çəkinmədi, üstəlik, Bakıdan yardım aparan təyyarəni vurdular?!
Türkiyə -Ermənistan sərhədlərinin bağlanmasına nədən olmuş səbəblər tam aradan qalxmayınca, bu sərhəd humanitar yardımdan başqa heç bir halda hərtərəfli əlaqələr üçün açıla bilməz. Bu sərhəd ötən əsrin 90-cı illərində Ermənistanın Azərbaycana təcavüzü səbəbilə bağlanıb. Təcavüz məgər bitdi ki, bəziləri artıq Ermənistan-Türkiyə sərhədinin açılmasının guya Azərbaycana heç bir ziyanı olmayacağı barədə məsuliyyətsiz və yaramaz bəyanatlar verməyə başlayıblar?..
Türkiyə-Ermənistan sərhədinin humanitar kömək xaricində başqa əməkdaşlıqlar üçün açılması Azərbaycanın və bütün türk dünyasının həyati mənafelərinə ziddir, ziyanlıdır və buna əsla imkan verilə bilməz...” - deyə A.Quliyev vurğulayıb.
Fikrət Sadıqov: “...Şərtlər var ki, Ermənistan onları yerinə yetirməyincə sərhədlərin həmişəlik açılmasından söhbət gedə bilməz”
Sabiq diplomat, politoloq Fikrət Sadıqov “Bakı-Xəbər”ə şərhində qeyd etdi ki, sərhədlər həmişəlik açılmayıb, qısa müddət üçün açılıb. “Mən əminəm ki, bu müvəqqəti haldır və sərhədin açılması humanitar yardımların gətirilməsi ilə bağldır. Çünki daha geniş kontekstdə bu yolların açılması Ermənistanın bir sıra şərtləri yerinə yetirməsi ilə bağlıdır.
Düzdür, danışıqlar gedir, yük daşımaları ölkələr arasında həyata keçirilir, amma bu heç də o demək deyil ki, bunların arasında artıq bütün yollar açılıb, eyni zamanda da diplomatik əlaqələr bərpa olunub. Onu da yaddan çıxarmamalıyıq ki, onların heç hələ diplomatik əlaqələri də yoxdur. Yəni Ermənistan tərəfindən Türkiyəyə belə bir yadımın gətirilməsi müəyyən dərəcədə görüntü xarakteri daşıyır. Çünki 1988-ci ildə Türkiyə də Ermənistana çox güclü şəkildə, genişmiqyaslı formada hümanitar yardım göstərmişdi. Görünür bu, ermənilərin yaddaşında qalıb. Amma bunu onlar, əlbəttə, ona görə edirlər ki, Türkiyə yumşalsın və Ermənistanın mövqeyinə daha yumşaq şəkildə yanaşsın. Şübhə etmirəm, bu heç də o demək deyil ki, bütün məsələlər həll olunub və yollar, sərhədlər geniş formatda açılacaq, bunların diplomatik münasibətləri də artıq bərpa olunacaq”.
F.Sadıqov bir daha vurğuladı ki, Türkiyə-Ermənistan sərhədi həmişəlik açılmayıb və bu, müvəqqəti xarakter daşıyır. “Bu sərhədlər həmişəlik açılana oxşamır, bunu görmürəm. Bu birdəfəlik aksiyadır və zəlzələ ilə bağlıdır. Görünür, Ermənistan da müəyyən dərəcədə kənarda qalmaq istəmir. Yenə də təkrar edirəm ki, Ermənistan Türkiyədən yumşaqlıq gözləyir. Amma belə şərtlər var ki, Ermənistan onları yerinə yetirməyincə sərhədlərin həmişəlik açılmasından söhbət gedə bilməz. Rəsmi Ankara dəfələrlə bəyan edib ki, Ermənistan-Türkiyə münasibətlərinin yaxınlaşması bir sıra hallarda Ermənistan-Azərbaycan münasibətlərinin bərpa olunmasından və danışıqların nəticələrindən asılıdır” - deyə F.Sadıqov qeyd etdi.
İradə SARIYEVA
