Avropa İttifaqı Şurası Ermənistanda mülki missiya yaratmaq barədə qərar verdikdən sonra bu adla regiona öz qüvvələrini yeritməyə hazırlaşır. Hər halda, Avropa Parlamentinin fransalı üzvü, Fransanın Avropa məsələləri üzrə keçmiş naziri Natali Luazonun açıqlamaları bu qənaətə gəlməyə əsas verir.
Natali Luazo bu xüsusda bildirib: “Mən daha genişmiqyaslı və ölçülü yeni Avropa İttifaqı missiyasını qətiyyətlə dəstəkləyirəm. Şadam ki, Fransa missiyaya 8 jandarm verəcək. Missiya fevralın 20-də başlayacaq və mən həmin gün Ermənistanda olacam. Mən Ermənistanın missiyaya dəstəyini və əməkdaşlığını alqışlayıram. Bu ərazidə gözlərimiz, qulaqlarımız olacaq və onun varlığı yeni “hücumlar”ın qarşısını almalıdır”. Luazo əlavə edib ki, Avropa İttifaqı etimad, sabitlik və təhlükəsizliyi artırmaq üçün Ermənistandadır və buna görə də xoş niyyətlə bütün maraqlı tərəflərlə danışığa açıq olacaq. Lakin Fransanın missiyaya 8 jandarm verməsi artıq qurumda güc strukturlarının olması anlamına gəlir. Bundan ən çox narazı qalan isə Rusiyadır. Rusiyanın “Milli müdafiə” jurnalının baş redaktoru, rusiyalı hərbi ekspert İqor Korotçenko da qeyd edir ki, Fransanın Ermənistan-Azərbaycan sərhədində yerləşdiriləcək Aİ missiyasının tərkibində jandarmalar göndərməsi Cənubi Qafqazın sabitliyinə mənfi təsir göstərəcək: “Çünki Aİ-nin monitorinq missiyası kəşfiyyat və polis xarakteri daşıyır. Sözügedən missiya diplomatik pərdə altında gizlənən peşəkar polis zabitləri, kəşfiyyatçılar və hərbi kəşfiyyat xidmətlərinin nümayəndələridir. Ona görə də bu missiyanın Ermənistan ərazisinə gəlişi və onun fəaliyyəti təhrikedici mənfi xarakter daşıyacaq. Aİ missiyasının məqsədi Ermənistan ərazisində NATO-nun daimi hərbi mövcudluğunu legitimləşdirmək, eyni zamanda da möhkəmləndirməkdir. Təbii ki, Ermənistanın KTMT-dən çıxması və Rusiya ilə müttəfiqlik münasibətlərinin pozulması üçün lazımi siyasi şəraitin hazırlanması da bura daxildir”. Ekspert bildirib ki, Rusiya artıq buna diplomatik şəkildə reaksiya verib: “Sergey Lavrovun erməni cəmiyyətində səs-küy yaradan kifayət qədər sərt müsahibəsi Kremlin reaksiyasının göstəricisidir. Başa düşürük ki, Ermənistan Qərblə müttəfiqlik münasibətləri qurmaq, Rusiyanı və onun maraqlarını regiondan sıxışdırıb çıxarmaq kursuna doğru gedir. Rusiya öncə diplomatik reaksiya verdi, əsas cavab tədbirlərinə gəlincə, hazırda Kremlin qərarqəbuletmə mərkəzlərində müvafiq müzakirələr aparılır. Çünki Moskva Aİ missiyasının burada yerləşdirilməsini alqışlamayacaq və ya buna səssiz qalmayacaq”. Rusiya Müasir Dövlət İnkişafı İnstitutunun direktoru, siyasi ekspert Dmitri Solonnikov bildirib ki, Ermənistan nəticələri fikirləşməlidir: “Avropa İttifaqının missiyasını dəvət etmək Ermənistanın beynəlxalq münasibətlərin subyekti kimi suveren hüququdur. Hər bir ölkə öz sərhədini qorumaq üçün müxtəlif dövlətlərin, beynəlxalq təşkilatların nümayəndələrini dəvət edə bilər. Burada əsas məsələ, Ermənistanın bu addımının nəyə gətirib çıxacaracağıdır”. Onun sözlərinə görə, bu, Ermənistanı Rusiyadan qoparmaq siyasətinin davamıdır: “Heç kəsə sirr deyil ki, Paşinyan ABŞ-dan maliyyələşən QHT-lərin köməyi ilə hakimiyyətə gəlib. Bunlar Soros Fondu və digər təşkilatlardır. Bu maliyyəçilər əvvəlcədən qarşılarına Ermənistanı beynəlxalq münasibətlərin Rusiyayönümlü spektrından Amerikayönlü spektrına çevirmək vəzifəsini qoyublar. Bu proses tədricən həyata keçirilir, necə ki, Ukraynada bunu etdilər. Tədricən Ukraynanı Rusiyadan qopardılar. Bir an içində Ermənistanı da Rusiyadan qoparmaq mümkün deyil. Bir müddətdir ki, Paşinyanın əli ilə Ermənistanın üzünü Rusiyadan çeviriblər. Ölkədə daim anti-Rusiya təbliğatı aparılır, anti-Rusiya informasiya kanalları yaradılır. İnsanların şüur altında Rusiyanın düşmən obrazı yaradılır. Bundan sonra isə artıq texnoloji addımlar atmağa başlayırlar. Avropa İttifaqının missiyasının dəvət olunması məhz texnoloji addımdır. Avropa İttifaqı nə deməkdir? Bu, hərbi planda NATO-ya söykənən siyasi təşkilatdır. Hamı yaxşı başa düşməlidir ki, bu, NATO ölkələrinin missiyasıdır. Oradakılar isə NATO-nun mülki geyimdə olan zabitləri olacaq”.
Rusiya Siyasi Tədqiqatlar İnstitutunun direktoru, politoloq Sergey Markov Avropa İttifaqının Ermənistan-Azərbaycan sərhədində yerləşdiriləcək missiyasının Fransa və Ermənistanın birgə layihəsi olduğunu diqqətə çatdırıb: “Bu, Azərbaycana və Ermənistana düşmən layihədir. Onlar heç də neytral müşahidəçi deyillər. Bu müşahidəçilər əvvəlcədən, ötən ilin payızında Parisdə Ermənistan və Fransa liderləri tərəfindən hazırlanmış plan əsasında ora yerləşdirilir. Bu plan Rusiya sülhməramlılarını regiondan çıxarıb, ora Fransanın simasında Avropa İttifaqını yerləşdirmək məqsədi daşıyır. Fransa bu şəkildə Ermənistanın əsas müttəfiqi olaraq Rusiyadan qisas almaq istəyir. Ona görə ki, Rusiya hərbçiləri bir sıra Afrika ölkələrində - Mali, Burkina-Faso və Mərkəzi Afrika Respublikasında təhlükəsizliyin zəmanəti sahəsində fransızları əvəz edib. Demək olar ki, Fransa bu gün itirdiyi Afrika ölkələrini Ermənistanla əvəz etmək istəyir. Ermənistan isə bununla yanaşı, həm də KTMT-nin regiona missiya göndərməsinə mane olub”.Markov qeyd edib ki, rus cəmiyyəti Qarabağı Ermənistan və Azərbaycanın mübarizəsi kimi tanıyır: “Bu vəziyyətdə İrəvan rus sülhməramlıları fransızlar və ya Aİ-nin təsirində olan başqa ölkələrin hərbçiləri ilə əvəz etmək istəyir. Aydındır ki, Paşinyan bu istəyini reallaşdırmaq üçün çox cəhd edəcək. Amma onların cəhdləri iki ciddi müqavimətlə üzləşəcək. Birincisi, Azərbaycanın müqaviməti ilə. Rəsmi Bakının razılığı olmadan onun suveren ərazisinə - Qarabağa hansısa sülhməramlıların göndərilməsi mümkün deyil. Azərbaycan isə buna razılıq verməyəcək. İkincisi isə, Ermənistan Kremlin müqaviməti ilə üzləşəcək. Rusiya Cənubi Qafqazda, yəni Qarabağda sülhməramlı rolunda Fransa və ya ona düşmən olan digər NATO ölkələri ilə əvəz olunmasını qətiyyən istəmir”.
Nahid SALAYEV
