Son günlərdə Ermənistanda diqqət çəkən məqamlardan biri burada Rusiyaya bağlı qüvvələrin zərərsizləşdirilməsidir. Məsələn, bəllidir ki, sabiq prezidentlər Robert Köçəryan və Serj Sarkisyana bağlı qüvvələr Rusiyanın Ermənistanda əsas dayaqlarıdır. İndi onların inzibati yolla sıradan çıxarılması gedir.
Qeyd edilənlər fonunda Ermənistanda müxalif “Hayastan” fraksiyasının lideri, keçmiş müdafiə naziri Seyran Ohanyanın deputat toxunulmazlığı ləğv edilib. Beləliklə, Ohanyanın təqsirləndirilən qismində məsuliyyətə cəlb olunmasına yol açılıb. Ermənistan Baş Prokurorluğu artıq neçə gün idi ki, Seyran Ohanyan və deputat Armen Çarçyanın deputat toxunulmazlığının ləğv olunması üçün vəsatət təqdim etmişdi. Baş prokuror Anna Vardapetyan fevralın 8-də “Hayastan” fraksiyasının liderinə qarşı üçüncü cinayət işini təqdim edib. Bu cinayət işi barədə məlumatı yalnız iqtidardan olan millət vəkilləri dinləyib. Müxalifət deputatları Milli Məclisin bu iclasında iştirak etməyiblər. Baş prokuror bildirib ki, bu cinayət işinin istintaqı da Seyran Ohanyanın müdafiə naziri olduğu vaxt nazirliyə məxsus binaları aşağı qiymətlə satışa çıxardığını göstərib. Anna Vardapetyanın sözlərinə görə, Ohanyan 2008-ci ilin 14 aprelindən 2008-ci ilin sentyabrınadək olan müddətdə özünün xidməti səlahiyyətlərindən qrup maraqları üçün istifadə edib. Baş prokuror onu da deyib ki, bu dövrdə İrəvanın Erebuni və Şenqavit rayonlarında yerləşən iki bina biznesmen Vahe Yakubyana satılıb və nəticədə dövlətə 5 milyard dram və ya 12.5 milyon dollar ziyan dəyib: “Vahe Yakubyan və cinayətkar qrupun digər üzvləri dəyəri 5 milyard 884 milyon 300 min dram olan binanı 5 milyard 181 milyon 300 min dram ucuzuna almaqla, əslində onun bazar dəyərinin yalnız 12 faizini ödəyiblər”. Bu iş üzrə üçüncü prezident Serj Sarkisyanın da dindirildiyi xəbər verilir. Anna Vardapetyan Seyran Ohanyanın qanun pozuntularına yol verməsi zaman birbaşa Serj Sarkisyanın göstərişi ilə hərəkət etməsinin sübut olunmadığını qeyd edib. Ohanyanla bağlı digər cinayət işi nazirliyin ərazisinin satılması ilə bağlıdır. Üçüncü cinayət işində isə söhbət yararsız raketlərin alınmasından gedir. Həmin iş üzrə daha bir keçmiş müdafiə naziri David Tonoyan həbs edilib. Seyran Ohanyan bu işlər üzrə özünə qarşı ittihamları “yalan” adlandırıb.
Prokurorluq “İzmirliyan” tibb mərkəzinin keçmiş direktoru Armen Çarçyanın da deputat toxunulmazlığının ləğvinə nail olub. O, 2017-ci ildə saxta tibb arayışı verməkdə ittiham olunur. Söhbət 2016-cı ildə polis məntəqəsini zəbt edən silahlı qruplaşma üçün ərzaq gətirən Artur Sarkisyana onun sağlamlığı barədə verilmiş arayışdan gedir. Ermənistan parlamenti gizli səsvermənin nəticələri əsasında “Hayastan” fraksiyasının nümayəndəsi olan Armen Çarçyanı deputat toxunulmazlığından məhrum edib. Səsvermədə 68 deputat iştirak edib ki, onların 67 nəfəri qərarın lehinə səs verib. Qeyd olunub ki, bu addımın atılmasında məqsəd onun barəsində cinayət araşdırmasının başlanmasıdır. Çarçyandan ölkəni tərk etməməsi barədə iltizam alınıb. Çarçyana qarşı tibb mərkəzinin direktoru vəzifəsində çalışdığı müddətdə rüşvətxorluğa və seçicilərə qarşı təzyiqə yol vermə ilə bağlı da ittiham irəli sürülüb. Beləliklə, Köçəryana bağlı siyasi qüvvələr Ermənistanda inzibati yolla sıradan çıxarılır. Bu isə həm də Rusiyanın Ermənistanda zəiflədilməsi deməkdir. İndi hakimiyyətin əsas məqsədlərindən biri Kollektiv Təhlükəsizlik Müqaviləsi Təşkilatından çıxmaq, ölkədəki rus hərbi bazalarını bağlamaqdır. Rusiyalı politoloq Aleksey Tokarev bunların Kreml tərəfindən müvafiq qaydada reaksiya ilə müşayiət olunacağını bildirir: “Hazırda Kreml Ermənistanın nə istədiyini və erməni milli maraqlarının nədən ibarət olduğunu başa düşmür. “Xarici siyasət oriyentasiyanız necədir” sualına müxtəlif ictimai-siyasi qüvvələrə müraciət etsəniz, fərqli cavablar alacaqsınız. “Təhlükəsizliyinizi kim təmin etməlidir” sualına üç cavab alacaqsınız: İran, Fransa və Rusiya. “Qarabağda sülhməramlılar qalmalıdılarmı” sualına da müxtəlif cavablar alacaqsınız. Hətta “İrəvan Qarabağla bundan sonra nə etməyi planlaşdırır” sualına da fərqli cavablar verilir. Ermənistanda proseslərə hakim gücün bir, xalqın başqa, müxalifətin isə tamam başqa baxışı var. Buna görə də İrəvanın nə istədiyi bəlli deyil”. Tokarev qeyd edib ki, bu gün Ermənistanda İrəvanın Qarabağı tərk etmək istəməməsi ilə bağlı dəqiq konsolidə edilmiş mövqe yoxdur: “Üstəlik, Ermənistanda mühüm regional məsələlərlə bağlı fikirləri dövlət aparatının bəzi nümayəndələri və hakimiyyətə birbaşa aidiyyəti olmayan ayrı-ayrı media orqanları təbliğ edir. Amma Moskva onların gündəminin necə formalaşdığını yaxşı başa düşür. Kreml İrəvan hakimiyyətinin Rusiya-Ermənistan dialoqu ilə bağlı sistemli iş görməməsindən çaşqındır. Ermənistan rəhbərliyi səfərləri və sənədləri koordinasiya edir, sonra isə onlar pozulur və ya pislənir ki, bu da ikitərəfli münasibətlərdə müəyyən çətinliklərə səbəb olur. Əminliklə bu suallara cavab almaq istəyirsən: Qarabağda hadisələrin gələcək inkişafını necə görürsünüz? Ermənistan siyasi isteblişmentinin Qərbə üz tutması fonunda Rusiyanı sıxışdırmaq siyasəti davam edərsə, gələcəkdə nə böyük fəlakətlər gözlənilir, başa düşülürmü? Ermənistan cəmiyyəti, indiki siyasət davam etdirilərsə, İrəvanı hansı tarixi və humanitar fəlakətin gözlədiyini anlayırmı?”. O, Kremlin sakit dayanmayacağını da xüsusi olaraq vurğulayır.
Ramil QULİYEV
