Güney Azərbaycanın Xoy şəhərində zəlzələdən zərər çəkən soydaşlarımızın vəziyyəti çox acınacaqlıdır. Zəlzələdən əziyyət çəkən, ev-eşiyini itirən, soyuqda, şaxtada evsiz-eşiksiz, ac-sussuz qalan soydaşlarımızın taleyi ilə molla rejimi qətiyyən maraqlanmır. Zəlzələ nəticəsində evləri tarımar olan soydaşlarımız küçələrdə yaşamağa məcbur olub.
Bəziləri çadırlara sığınsalar da, böyük əksəriyyəti sığınacaqsız vəziyyətdədir. Bir tərəfdən soyuq, bir tərəfdən aclıq soydaşlarımızı əldən salıb, uşaqların vəziyyəti də çox acınacaqlıdır. Soydaşlarımızın molla rejiminə səslənməsinə baxmayaraq heç bir tədbir görmür. Hətta Güney Azərbaycandan olan məşhur kinorejissor Məhəmməd Əlimuradi Xoyda zəlzələdən əziyyət çəkən əhalinin vəziyyəti ilə maraqlanıb və rejim rəsmilərini modul tipli sığınacaqlar quraşdırmağa çağırıb. Azad İran teleqram kanalında yayılan görüntülərə görə, Xoy şəhərinin Var kəndində zəlzələ nəticəsində evsiz-eşiksiz qalan insanların vəziyyəti ürək dağlayır. Hazırda çarəsiz soydaşlarımız şaxtalı qış günlərində küçələrdə qalmağa məhkum olub. Azad İran yazır ki, molla rejimi zəlzələdən əziyyət çəkən soydaşlarımıza ögey münasubət göstərir. Bu azmış kimi mollalar özlərini elə göstərirlər ki, guya soydaşlarımızın “qayğısına” qalırlar, amma heç bir tədbir görmürlər.
Azərbaycan xalqına qarşı düşmən münasibət göstərən molla rejimi soydaşlarımızı acınacaqlı vəziyyətdə qoymaqla onlardan qisas alır. Molla rejimi soydaşlarımızı çörəklə imtahana çəkir, onlardan qisas alır. Hətta Azad İranda belə bir görüntü yayılıb ki, Xoy əhalisi çörək və ərzaqdan ötrü Qızıl Aypara Cəmiyyətinin binasına hücum edib. Təbii, bu, mollaların Azərbaycan türklərinə münasibətinin göstəricisidir.
“İran öz vətəndaşlarına sahiblik hissini itirmişdir”
“Türk Dünyası İnfo” İctimai Birliyinin sədri Dəyanət Osmanlı “Bakı-Xəbər”ə şərhində bildirdi ki, molla rejiminin soydaşlarımıza qarşı tutduğu mövqe qəbuledilməzdir. “Bütün dövrlərdə İran-fars dövlətinin yerli Azərbaycan türklərinə münasibəti həmişə bəlli bir aqressiya, quldarlıq təfəkkürü ilə müşayiət olunub. Eyni zamanda 1828-ci ildən başlayaraq, davamlı şəkildə İran Cənubi Azərbaycanda müstəmləkə siyasəti yürüdür, soydaşlarımıza qul kimi yanaşır. Bu düşmənçilik siyasəti təkcə dil, mədəniyyət, təhsil qadağaları ilə bitməyib, çoxsaylı xüsusi qətliamlarla sonuclanıb. İranda Rza şah Pəhləvi tərəfindən həyata keçirilən 1925-ci il çevrilişindən sonra basqılar daha da güclənib və qanuniləşib. Ölkədə istər rəsmi, istərsə də ictimai həyatda türk dilindən istifadə qadağan edilib. Bütövlükdə, İranda soydaşlarımızın milli kimlik, dil, təhsil və bununla yanaşı sosial haqları işğal olunub. Yəni cənublu soydaşlarımızın daim hərtərəfli təzyiq altında saxlanılması İran siyasətinin təməl prinsiplərindəndir desək, daha doğru olar. Bu gün İranın Azərbaycan xalqına münasibətində faşizm əlamətlərinin olduğu bütün dünyaya bəllidir.
Tarixdən məlumdur ki, İranın bu basqılarının əsasını soydaşlarımızın zaman-zaman alovlanan azadlıq duyğularının yaratdığı qorxu təşkil edir. Və indiki proseslər o istiqamətfdə gedir ki, 40 milyonluq bir türk toplumunun azadlıq arzusu və haqqı mütləq bərpa olunacaq. İranda Azərbaycan milli kimliyinə, dilinə mədəniyyətinə tətbiq edilən qadağaları saxlamaq mümkün deyil. İkinci Qarabağ müharibəsi İranın Azərbaycana qarşı bir sıra gizli planlarının üstünü açdı. Bundan sonra İran düşmənçilik siyasətini aşkar surətdə aparmağa başladı”. D.Osmanlı vurğuladı ki, Azərbaycan torpaqlarını işğaldan azad etdiyi 44 günlük müharibə zamanı da İran Ermənistana dəstəyi ilə əsl riyakar düşmənçilik niyyətini göstərmiş oldu.
“Bu günlərdə Tehranda səfirliyimizə qarşı törədilən terror hadisəsi də İran xüsusi xidmət orqanlarının planları ilə baş tutub. İranda Azərbaycanın diplomatik korpusuna qarşı əvvəllər də müxtəlif xarakterli təhdidlər olub, bu haqda İrana müraciətlər olunub. Buna baxmayaraq, İran dövləti bu təhdidlərin qarşısının alınması istiqamətində heç bir tədbir görməyib. Nəticədə isə növbəti terror aktına imkan yaradılıb.
İranın şimal-qərbində Qərbi Azərbaycan əyalətinin Xoy şəhərində baş verən zəlzələnin nəticələrinə İran fars-molla rejiminin laqeyd münasibəti də məhz soydaşlarımıza qarşı ayrıseçkiliyin təzahürüdür. Dağıntılar zamanı həlak olanlar, xeyli sayda yaralananlar, evsiz-eşiksiz qalanlar vardır. İnsanların durumuna elektrik kəsilməsi və qar yağması da mənfi təsir göstərir. Cənublu soydaşlarımızın media orqanlarına verdikləri məlumatlara görə, güclü zəlzələ nəticəsində dağılan Xoy bölgəsinə dövlət orqanları heç bir yardım göstərmir. Şaxtalı qış günlərində bölgədə baş verən təbii fəlakətdən zərər çəkən əhaliyə yardım edən yoxdur.
Görünür ki, İran öz vətəndaşlarına sahiblik hissini itirmişdir. Ona görə də təbii fəlakətə məruz qalan və öz dövlətindən dəstək əvəzinə yalnız laqeydlik, təhdid və təzyiq görən cənublu soydaşlarımızın ümidləri beynəlxalq aləmdən gözlədiyi yardımlaradır. Baş verən olaylara rəğmən, yenə də İran Azərbaycana, Azərbaycan insanına qarşı məkrini davam etdirməkdədir.
Beynəlxalq aləmdən təcrid şəraitdə yaşayan İran hazırkı şəraitdə öz vətəndaşlarını konstitusion hüquqlarından təcrid olunmuş vəziyyətində saxlayır. Hətta İran hakimiyyəti başqa dövlətlərlə ikitərəfli münasibətlərdə belə səmimiyyət nümayiş etdirə bilmir. Adını müsəlman dövləti adlandırıb, anti-müsəlman, anti-Azərbaycan siyasəti ilə bütün islami dəyərləri tapdamaqla, rüsvay etməklə məşğuldur. Gerçəkdə Ermənistanla işbirliyi qurur, ona hərtərəfli dəstək verir, birgə iqtisadi layihələr həyata keçirir. Qarabağın işğaldan azad edilməsi də onu bərk narahat edir. Vətən müharibəsi dövründə Ermənistanın Azərbaycan ərazilərini işğal altında saxlamasına hər cür yardım göstərdiyini gördük. Qələbəmizdən sonra da İran erməni terrorçu qüvvələrə silah-sursat və başqa yardımları dayandırmadı, əksinə, ölkəmizi hədələyici fəaliyyətlər göstərdi.
Azərbaycanın isə siyasəti bəllidir, həmişə öz soydaşlarına qarşı sahiblik münasibəti göstərib, onların qayğılarını diqqətdə saxlayıb və belə də davam edəcək. Prezident İlham Əliyevin qeyd etdiyi kimi, "Biz hər zaman istənilən anti-Azərbaycan bəyanatına və hərəkətinə cavab vermişik və verəcəyik. Bu səbəbdən biz İran ilə sərhəddə hərbi təlimlər keçirməli olduq ki, onlardan qorxmadığımızı nümayiş etdirək. Biz həyat tərzimizin, Azərbaycanın dünyəvi inkişaf vektorunun və azərbaycanlıların, o cümlədən İranda yaşayan azərbaycanlıların müdafiəsi üçün əlimizdən gələni edəcəyik. Onlar xalqımızın bir hissəsidir” - deyə müsahibimiz bildirdi.
Leyıa QARAXANLI
