Yanvarın 27-də Azərbaycanın Tehrandakı səfirliyinə terror hücumu zamanı qəhrəmancasına şəhid olan səfirliyin mühafizə rəisi, baş leytenant Orxan Əsgərovun yas mərasiminə gələnlər arasında Böyük Britaniyanın Azərbaycandakı səfiri Fergus Auld də olub. Səfir Bakının Yasamal rayonunda qurulmuş yas çadırına gəlib.
O, yas mərasimində iştirak edib və şəhidin atasına başsağlığı verib. Əlbəttə, ingilis səfirin bu addımı təqdirəlayiqdir, həm də İranın Azərbaycandakı səfirinə bir insanlıq örnəyidir. İranın Azərbaycandakı səfiri O.Əsgərovun yas məraiminə gələ bilərdi, amma göründüyü kimi, kənarda qaldı. Halbuki, səfir ölkəsi adına bu addımı atmalı idi və gəlib şəhidin ailəsindən, valideynlərindən üzr istəməli idi. Amma biz bunu görmədik. Bu da ondan xəbər verir ki, molla rejimi öz günahını bilir və üzrünün günahından baha olduğunun da fərqindədir.
“Molla rejimi öz günahlarını yaxşı bilir, görünür bu səbəbdən də səfiri Orxan Əsgərovun yas mərasiminə göndərməkdən ehtiyat edib”
AVCİYA-nın vitse-prezidenti, siyasi şərhçi, professor Məhərrəm Zülfüqarlı “Bakı-Xəbər”ə bildirdi ki, İran səfirinin şəhidimizin yas mərasiminə gəlməməsinin səbəbi aydındır: “İran səfiri burada Tehran rejiminin təmsilçisidir. Səfir rejimin bizə düşmən münasibətini Orxan Əsgərovun yas mərasiminə gəlməməklə də bildirdi. Bu çox səhv mövqedir. Bu hərəkət molla rejiminə, Tehranın siyasi rəhbərliyinə baş ucalığı gətirməyəcək. Sözsüz, molla rejimi öz günahlarını yaxşı bilir, görünür bu səbəbdən də səfiri Orxan Əsgərovun yas mərasiminə göndərməkdən ehtiyat edib. Bu da ola bilər. Bu yasdır, hüzrdür. Bu elə bir məsələdir ki, burada hər kəs iştirak etməlidir. Molla rejiminin səfirinin səsi çıxmadı, burada təəccüblü heç nə yoxdur. Amma Azərbaycanı istəyən dövlətlərin hamısı Azərbaycana başsağlığı verdi, vaxtı-imkanı olanlar da gəlib iştirak etdi”.
M.Zülfüqarlı əlavə etdi ki, səfirlərin hamısı öz dövlətlərinin yeritdiyi siyasətə uyğun hərəkət edirlər. Bu baxımdan molla rejiminin də, İngiltərənin də Azərbaycana münasibəti eyni deyil. Böyük Britaniya dövlətinin hər zaman Azərbaycana dost münasibət bəslədiyini vurğulayan M.Zülfüqarlı qeyd etdi ki, Azərbaycan Xalq Cumhuriyyəti dönəmindən bu ölkə bizə dostdur. “Xalq Cumhuriyyəti dövründən İngiltərə ilə bizim sıx dostluq əlaqələrimiz olub. Hətta Xalq Cumhuriyyətini “ingilispərəst hökumət” də adlandırırdılar. Çünki İngiltərə ilə Azərbaycan arasında çox xoş münasibətlər vardı. Bilirsiz ki, son illər də İngiltərə dövləti bizə taleyüklü məsələlərdə ciddi dəstək olub. 44 günlük müharibə ərzində BMT Təhlükəsizlik Şurasının Azərbaycana qarşı qətnaməsinin əleyhinə səs verən də İngiltərə olub. Hazırda Azərbaycanın haqq işinə dəstək verən ən irəlidə gedən dövlətlərdən biridir.
Ölüm haqdır. Mənə elə gəlir ki, Azərbaycanı istəyən qüvvələr hamısı bu terror hadisəsindən sarsıldı, narahatlıq keçirdi, Azərbaycana öz dəstkələrini ifadə etdilər. Azərbaycan bütün problemləri həll etdiyi kimi, səfirliklərin mühafizəsi məsələsini də layiqincə həll edər. Çünki xaricdə olan səfirliklər bilavasitə dövlətimizin rəmzidir. Onun ərazisi Azərbaycan dövlətidir. Sərhədlər kimi, səfirliklər də ciddi şəkildə qorunmalıdır ki, belə terror halları baş verməsin” - deyə M.Zülfüqarlı qeyd etdi.
Əli TURABOV
