02/06/2020 08:11
728 x 90

Qondarma "DQR"-də seçkini tanımamaq bəyanatı həmsədrlər üçün yetərli sayıla bilərmi…

img

Məlum olduğu kimi, bir sıra ölkələr və nüfuzlu qurumlar erməni separatçılarının Dağlıq Qarabağda keçirdikləri saxta seçkilərlə bağlı etiraz bəayanatları yayıblar. Onların sırasında ATƏT-in Minsk Qrupu həmsədrlərinin də bəyanatı var. Həmsədrlər İqor Popov (Rusiya), Endryu Şefer (ABŞ) və Stefan Viskonti (Fransa) bəyanatlarında bildiriblər ki, martın 31-də Dağlıq Qarabağda keçirilən “seçkilər”in nəticələrini tanımırlar. Vasitəçilər bəyan ediblər ki, Dağlıq Qarabağ münaqişəsinin hərtərəfli həlli kontekstində həmsədrlərin 9 mart tarixli bəyanatında qeyd olunmuş prinsip və elementlərə uyğun olaraq, regionun gələcəyinin həll olunmasında Dağlıq Qarabağ əhalisinin rolunu tanıyırlar.

Həmsədrlər onu da qeyd edirlər ki, Dağlıq Qarabağ heç bir həmsədr ölkə və ya başqa bir ölkə tərəfindən müstəqil və suveren dövlət kimi tanınmır. Həmsədrlər, müvafiq olaraq, bu "seçkilərin" nəticələrini Dağlıq Qarabağın hüquqi statusuna təsir kimi qəbul etmir və nəticələrin heç bir halda Dağlıq Qarabağın son statusuna və ya davam edən danışıqların nəticəsinə, Dağlıq Qarabağ münaqişəsinin davamlı və dinc yolla həllinə təsir göstərməyəcəyini bəyan edirlər. Göründüyü kimi, həmsədrlər yalnız başqa ölkələrin bəyanatlarından məzmun və kəsərlilik baxımından heç nəyi ilə fərqlənməyən bəyanat veriblər. Saxta seçkilərlə bağlı verilən bu məzmunlu bəyanatı yetərli saymaq olarmı?

Akif Nağı:“Bu cür ciddi təzyiqləri etmirlərsə, deməli, bəyanatları vasitəsilə imitasiya edirlər”

Qarabağ Azadlıq Təşkilatının sədri Akif Nağı “Bakı-Xəbər”ə açıqlamasında bildirdi ki, biz saxta seçkilərlə bağlı bir çox ölkələrin bəyanatlarının şahidi olduq: “Bura həm regionu əhatə edən ölkələri, həm də bizdən kənar məsafədəki dövlətlərin verdikləri reaksiyaları aid edə bilərik. Mənə elə gəlir ki, biz kağız parçasından o tərəfə keçməyən bəyanatlarla qurtarmalıyıq. Qarabağ münaqişəsinin həllində bu əsaslı vasitə sayılmır. BMT kimi qurumun 4 qətnaməsi icra edilmirsə, bəyanat nəyi dəyişəcək ki? Minsk Qrupunun həmsədrlərinin mövqeyi belə olmamalıdır. Onların saxta seçkiləri belə pisləmələri bizə lazım deyil. Həmin quruma ciddi mandat verilib. Onlardan soruşmaq lazımdır: siz niyə həmin ərazidə seçkilərin keçirilməsinə imkan verirsiniz ki, sonra da onu pisləyirsiniz? Bəli, həmin mandata sahib olanlar əvvəlcə seçkinin keçirilməsinin qarşısını almalıydılar. Bu məsuliyyət məhz onların üzərinə düşür. Kənarda müşahidəçi kimi qalıb, sonra boş bəyanat vermək bizə lazım deyil. Bir daha sübut olunur ki, bu qurum ləğv edilməlidir. Çünki həmin qurum münaqişənin nizama salınmasında heç bir addım ata bilmir. Onlar işğal altında olan rayonların Ermənistana verilməsinə çalışan kimi görünürlər. ATƏT-in Minsk Qrupu həmsədrləri bilir ki, seçkiləri Ermənistan keçirir. Buna görə də konkret belə məsələ qoymalıydı ki, qondarma seçkilər keçirilsə Ermənistanı danışıqlar prosesindən çıxaracaqlar. Bu cür ciddi təzyiqləri etmirlərsə, deməli, bəyanatları vasitəsilə imitasiya edirlər”.

Məhəmmədəli QƏRİBLİ

 

 

Son xəbərlər