İran Xarici İşlər Nazirliyi (XİN) 31 mart 2020-ci il tarixində qondarma "Dağlıq Qarabağ Respublikasında" təşkil olunması nəzərdə tutulan "prezident" və "parlament" seçkiləri ilə bağlı məlumat yayıb.
İranın Azərbaycandakı səfirliyinin mətbuat xidmətindən verilən məlumata görə, İran XİN-in sözçüsü Seyid Abbas Musəvi bildirib ki, ölkəsi regionda gərginlik və ixtilafın artmasına səbəb olan hər cür addımın əleyhinədir.
"Biz düşünürük ki, iki qonşu ölkə olan Azərbaycan və Ermənistan arasında ixtilafların həllini çətinləşdirən hər cür addımın atılmasından çəkinilməlidir", - deyə İran XİN-in rəsmi nümayəndəsi bildirib.
O, vurğulayıb ki, Dağlıq Qarabağ münaqişəsi sülh yolu ilə beynəlxalq qanun və prinsiplər çərçivəsində həll olunmalıdır.
İtaliya da Dağlıq Qarabağda keçirilən qondarma "prezident və parlament seçkisi"ni tanımır. Bu barədə İtaliya Xarici İşlər Nazirliyinin "Twitter" səhifəsində yer alan paylaşıma Avropa İttifaqının (Aİ) bəyanatını da əlavə edib.
Aİ-nin bəyanatında deyilir ki, qurum işğal olunmuş Dağlıq Qarabağdakı qondarma “seçkilər”in keçirildiyi konstitusion və hüquqi çərçivələri tanımır. Qeyd olunur ki, 31 mart 2020-ci ildə Dağlıq Qarabağda keçirilən qondarma “prezident və parlament seçkiləri” ilə əlaqədar Aİ seçkilərin konstitusion və hüquqi çərçivələrini tanımadığını bir daha bəyan edir: “Bu hadisə Dağlıq Qarabağın gələcək statusunun müəyyən olunmasına və ya davam edən danışıqlar prosesinin nəticəsinə ziyan vura bilər”.
Aİ ATƏT-in Minsk qrupunu, xüsusilə də həmsədrlərin mövcud status-kvonun çərçivələrindən kənara çıxan irəliləyişin nail olunmasına yönəlmiş səylərini və dayanıqlı sülhün əldə olunması üçün substantiv danışıqları qəti şəkildə dəstəklədiyini xatırladıb: “Aİ bundan sonra da Dağlıq Qarabağ münaqişəsinin tez bir zamanda sülh yolu ilə nizamlanmasına yönələn səyləri dəstəkləməyə hazırdır”.
NATO da Dağlıq Qarabağda keçirilən qondarma "seçki"lərə münasibətini açıqlayıb. NATO baş katibinin siyasi məsələlər üzrə müavini və Cənubi Qafqaz ve Mərkəzi Asiya üzrə xüsusi nümayəndəsi Ceyms Appaturay "Facebook" səhifəsində yazır: "Bu gün Dağlıq Qarabağda keçirilən "ümumi seçkilər"ə gəlincə, NATO bu "seçkilərin" nəticələrini Dağlıq Qarabağın hüquqi statusuna təsir kimi qəbul etmir və nəticələrin heç bir halda Dağlıq Qarabağın yekun statusuna və ya Dağlıq Qarabağ münaqişəsinin davamlı və sülh yolu ilə həll edilməsi üçün davam edən danışıqların nəticəsinə xələl gətirməyəcəyini vurğulayır. NATO ATƏT-in Minsk Qrupunu, o cümlədən həmsədrlərin bu məsələ ilə bağlı son bəyanatını dəstəkləyir".
GUAM Azərbaycanın Dağlıq Qarabağ bölgəsində keçirilən qondarma "seçkilər" ilə əlaqədar bəyanat isə deyilir ki, “Dağlıq Qarabağ Azərbaycandır. GUAM 31 mart 2020-ci il tarixində Azərbaycanın işğal olunmuş ərazilərində keçirilmiş qondarma "seçkiləri" qınayır”.
Ukrayna Xarici İşlər Nazirliyi də 31 mart tarixində Azərbaycan Respublikasının Dağlıq Qarabağ ərazisində baş tutumuş qondarma "prezident və parlament seçkilərini" qəti şəkildə qınayır. Ukrayna XİN-in bununla bağlı bəyanatda vurğulanır ki, qondarma seçkilər heç bir hüquqi nəticəyə malik deyil və beynəlxalq hüquq norma və prinsiplərinə ziddir: "Ukrayna növbəti dəfə Azərbaycan Respublikasının suverenliyini və beynəlxalq səviyyədə tanınmış sərhədlər çərçivəsində ərazi bütövlüyünü dəstəkləyir və Dağlıq-Qarabağ münaqişəsinin sülh yolu ilə nizamlanması üçün çıxış edir".
Gürcüstan da Dağlıq Qarabağda qondarma "prezident və parlament seçkiləri"ni tanımır. Gürcüstan Xarici İşlər Nazirliyinin bu barədə bəyanatında qeyd olunub ki, Gürcüstan Azərbaycanın ərazi bütövlüyü və suverenliyini dəstəkləyir və münaqişənin beynəlxalq hüququn norma və prinsiplərinə uyğun şəkildə həllinin tərəfdarıdır: "Gürcüstan Xarici İşlər Nazirliyi Azərbaycan Respublikasının suverenliyini və ərazi bütövlüyünü dəstəklədiyini bir daha təsdiqləyir və 31 mart 2020-ci ildə Dağlıq Qarabağda keçirilmiş qondarma "prezident və parlament seçkiləri"ni tanımır. Gürcüstan Dağlıq Qarabağ münaqişəsinin yalnız beynəlxalq hüququn norma və prinsiplərinə uyğun olaraq sülh yolu ilə həllini dəstəkləyir".
Baki-xeber.com
