Təranə Əlizadə: “Əsas istiqamətlərdən biri xaricdə Azərbaycan mədəniyyətini daha geniş şəkildə təbliğ etmək idi”
Azərbaycan dövlətinin həyata keçirdiyi mədəniyyət siyasəti nəticəsində xalqımızın tarixi mədəniyyəti həm cəmiyyətimizdə, həm də xarici ölkələrdə təbliğ edilir. Dövlətimiz 2018-ci ildə bütün sahələrdə olduğu kimi, mədəniyyət sferasında da bir sıra uğurlara nail olub. Əslində, mədəniyyət siyasətimizin əsas istiqamətlərindən biri xalqımızın və dövlətimizin simasını özündə əks etdirən milli mədəniyyətimizi daha çox ölkələrdə tanıtmaq, təbliğ etmək olub. Humanitar dəyərlərimizin, ədəbiyyatımızın, mədəniyyətimizin təbliği istiqamətində görülən işlər dövlətçiliyə, diplomatiyaya yaxından xidmət edir.
2018-ci ildə Azərbaycan dövləti tərəfindən daha aktiv, daha genişmiqyaslı mədəniyyət siyasəti yürüdülüb desək yanılmarıq. Yuxarıda vurğuladığımız kimi, əsas məqsəd Azərbaycan mədəniyyətinin dünyada tanıdılması olub ki, bu sahədə xeyli iş görülüb.
“2018-ci ildə həm Rusiyada, həm də Avropa ölkələrində Azərbaycanın tanıdılması ilə…”
Sənətşünas Təranə Əlizadənin sözlərinə görə, dövlət tərəfindən görülən işləri təhlil edərkən görürük ki, əsrlər ərzində qazanılmış ənənələrin qorunması və inkişafı, beynəlxalq təbliğat, habelə sahənin mahiyyət etibarilə modernləşməsi və xalqın milli özünəməxsusluğunun qorunub saxlanması Azərbaycanda həyata keçirilən mədəniyyət siyasətinin əsas vəzifələrindəndir. O qeyd etdi ki, dövlət əhəmiyyətli məqsədlərin reallaşmasında mədəniyyət siyasətinin rolu hər zaman özünü göstərir. T.Əlizadə qeyd etdi ki, son 1 ildə Azərbaycanda həyata keçirilən mədəniyyət tədbirlərinin həm yerli, həm də beynəlxalq əhəmiyyəti çoxdur. “Azərbaycan dövlətinin son bir ildə həyata keçirdiyi məqsədyönlü mədəniyyət siyasəti nəticəsində bir sıra uğurlara nail olmuşuq. Əsas istiqamətlərdən biri xaricdə Azərbaycan mədəniyyətini daha geniş şəkildə təbliğ etmək idi və buna nail olduq. Deyim ki, 2018-ci ildə həm Rusiyada, həm də Avropa ölkələrində Azərbaycanın tanıdılması ilə bağlı saysız iş görülüb. Bir sıra dövlətlərin ali məktəblərində, elmi mərkəzlərində dövlətimizin dəstəyilə azərbaycanşünaslıq mərkəzlərinin yaradılması, Azərbaycanın mədəniyyət inciləri ilə bağlı sərgilərin təşkil edilməsi, paytaxtımızda növbəti Ümumdünya Mədəniyyətlərarası Dialoq Forumunun, Humanitar Forum və digər qlobal xarakterli möhtəşəm tədbirlərin təşkil edilməsi Azərbaycanın əldə etdiyi nailiyyətlər sırasına daxildir. Heç şübhəsiz ki, mədəniyyət tarixində iz qoyan incəsənət xadimlərinin, görkəmli sənətkarların yubileylərinin ən yüksək səviyyədə təşkil olunaraq keçirilməsi, bir sıra mədəniyyət adamlarına ödüllərin, təqaüdlərin, mükafatların verilməsi bu sahədə atılan addımlardan biridir. 2018-ci ildə həm də mədəniyyət sahəsində yeni müəssisələrin açılması, təmir olunması, bölgələrdə kino mərkəzlərinin yaradılması uğurlarımızdandır”.
Azərbaycan tarixində xüsusi əhəmiyyətli bir il…
2018-ci ildə Azərbaycan Respublikasının Mədəniyyət Nazirliyi haqqında əsasnamənin təsdiqlənməsi haqqında ölkə başçısının imzaladığı fərmanın da böyük əhəmiyyət daşıdığını deyən müsahibimizin vurğuladığına görə, 2018-ci il ölkəmizin mədəni həyatında əlamətdar hadisələrlə zəngindir. O qeyd etdi ki, Müsəlman Şərqində ilk demokratik cümhuriyyət olan Azərbaycan Xalq Cümhuriyyətinin 100 illiyinin dövlət səviyyəsində qeyd edilməsi bu ilin əlamətdar hadisələrindəndir. O bildirdi ki, Prezident İlham Əliyevin sərəncamı ilə 2018-ci ilin "Azərbaycan Xalq Cümhuriyyəti ili” elan olunması Azərbaycanın dövlətçilik tarixinə, milli yaddaşa dərin ehtiramının bariz nümunəsidir. Cümhuriyyətin 100 illiyi respublikamızla yanaşı, xarici ölkələrdə də qeyd olunur, bu münasibətlə mədəni tədbirlər, təqdimatlar keçirilib. “Bu il may ayının 28-də Müsəlman Şərqində ilk parlamentli respublikanın – Azərbaycan Xalq Cümhuriyyətinin yaranmasının 100 illiyi tamam oldu. Bu səbəbdən də 2018-ci il Azərbaycan tarixində xüsusi əhəmiyyətli bir il kimi yadda qalacaq. Paytaxtın bütün rayonlarında, qəsəbələrində, ali və orta təhsil ocaqlarında, dövlət müəssisələrində müxtəlif adda mədəniyyət tədbirləri, konsert proqramları nümayiş olundu, festivallar, sərgilər keçirildi, çoxsaylı mədəniyyətyönlü layihələr təqdim olundu”-deyə o, qeyd etdi.
Azərbaycanın bir sıra qeyri-maddi mədəni irs nümunələri UNESCO-ya daxil edildi…
T.Əlizadə vurğuladı ki, bu il, həmçinin, Azərbaycan Milli İncəsənət Muzeyinin növbəti korpusunun təntənəli açılış mərasimi də baş tutub. O, həmçinin, qeyd etdi ki, mədəniyyət işçilərinə göstərilən qayğı, bütövlükdə, Azərbaycan mədəniyyətinə diqqətdir. Mədəniyyətimiz bu gün dünyada tanınır, təbliğ edilir, beynəlxalq qurumlar səviyyəsində qəbul olunur. Azərbaycan musiqisi dünyanın məşhur konsert salonlarında səslənir. Bu il Azərbaycanın dahi bəstəkarlarının əsərlərinin xarici ölkələrdə səsləndirildiyini deyən müsahibimiz qeyd etdi ki, 2018-ci ildə mədəniyyət sahəsində qazanılan uğurlardan biri də Mavriki Respublikasının paytaxtı Port Luis şəhərində UNESCO-nun Qeyri-maddi mədəni irsin qorunması üzrə Hökumətlərarası Komitəsinin 13-cü sessiyasında Azərbaycanın təqdim etdiyi “Yallı (Köçəri, Tənzərə), Naxçıvanın ənənəvi qrup rəqsləri”nin UNESCO-nun Təcili qorunma siyahısına, Azərbaycanın Türkiyə və Qazaxıstanla birgə təqdim etdiyi “Dədə Qorqud irsi. Dastan mədəniyyəti, xalq nağılları və musiqisi” nominasiya faylının isə çoxmillətli mədəniyyət nümunəsi kimi təşkilatın Qeyri-maddi mədəni irs siyahısına daxil edilməsidir. O dedi ki, bütün bunlar müstəqilliyimizin bizə bəxş etdiyi imkanlar nəticəsində mümkün olub.
Azərbaycan mədəniyyətinin təbliğinin bununla məhdudlaşmadığını deyən müsahibimiz vurğuladı ki, dekabrın 20-də İçərişəhərdə yerləşən “Kiçik QalArt” qalereyasında “Milli irsimiz” layihəsinin kuratoru Əsli Səmədovanın təşəbbüsü ilə “Kəlağayı: Dünən, bu gün, sabah” adlı sərginin açılması da yaddaqalan mədəniyyət hadisəsidir. O dedi ki, sərgi özündə Azərbaycan və xarici muzeylərdən və şəxsi kolleksiyalardan olan nadir materialları, muzey təcrübəsi sahəsində innovasiyaları birləşdirir. Sərginin əsas diqqət mərkəzində maarifləndirici və interaktiv komponentlər dayanır.
“Bu il Azərbaycanda baş verən ən mühüm mədəniyyət hadisəsi “Naxçıvan İslam Mədəniyyətinin Paytaxtı-2018”in açılışının keçirilməsidir. Bu il Naxçıvanda bir sıra önəmli tədbirlər keçirildi. Naxçıvan şəhərinin 2018-ci il üçün İslam Mədəniyyətinin Paytaxtı elan olunması bir tərəfdən bu qədim türk yurdunun zəngin tarixi-mədəni irsi ilə bağlıdırsa, digər tərəfdən də müasir dövrdə bu dəyərlərin qorunub-yaşadılması sahəsində görülən işlərin nəticəsidir. 2018-ci ildə həyata keçirilən mühüm tədbirlərdən biri də Azərbaycanın 2019-cu ildə UNESCO-nun Ümumdünya İrs Komitəsinin sessiyasına evsahibliyi etməsinə nail olmasıdır” - deyə müsahibimiz bildirdi.
Müashibimiz qeyd etdi ki, bu il Bakı Kitab Mərkəzinin fəaliyyətə başlaması, X Beynəlxalq Musiqi Festivalının keçirilməsi, Nəsimi - seir, sənət və mənəviyyat Festivalının təşkil edilməsi (Bakıda və Moskvada), IX “START” Beynəlxalq Qısa Filmlər Festivalının düzənlənməsi 2018-ci ilin yaddaqalan mədəniyyət hadisələrindəndir.
İradə SARIYEVA
