Azərbaycanın tarixi zəfəri neçə-neçə nəsillərə çatdırılmalı və xalq olaraq qan yaddaşımızda əbədi yaşamalıdır. Gələcək nəsillər 44 günlük Vətən müharibəsində müzəffər ordumuzun, igid oğullarımızın qazandığı qələbənin işığını ürəklərində daşımalıdır. Keçən yazımızda qeyd etdiyimiz kimi, zəfərimiz ədəbiyyat, mədəniyyət və incəsənət əsərləri vasitəsilə gələcək nəsillərə çatdırıla bilər.
Nəzərə alsaq ki, musiqi ən təsirli vasitələrdən biridir və zəfər təntənəmizi musiqi vasitəsilə daha geniş səviyyədə təbliğ etmək mümkündür. Bu baxımdan Azərbaycan bəstəkarlarının, şairlərinin üzərinə böyük məsuliyyət düşür. İkinci Dünya müharibəsi, Birinci Qarabağ müharibəsi dövründə bəstəkarlarımız yüzlərlə musiqi əsəri yazıb, o əsərləri hər birimiz dinləmişik. Amma çox təəssüflər olsun ki, Vətən müharibəsində qazanılan tarixi zəfəri tərənnüm edən musiqi əsərlərinə rast gəlmirik. Biz efirlərdən, sosial mediadan daha çox adına “vətənpərvərlik mahnısı”, “zəfər nəğməsi” qoyulan bayağı musiqiləri eşidirik, sanki onları təbliğ etmək TV-lərin əsas işidir.
Zəfər mövzusunda hansı musiqi əsərləri yazılıb? Vətən müharibəsində qazanılan zəfərə peşəkar bəstəkarlar nə kimi töhfələr verib? Əgər zəfəri tərənnüm edən musiqi əsərləri yaranıbsa bundan bizim xəbərimiz niyə yoxdur?
“Gənc bəstəkar Vüqar Məmmədzadə “Dəmir yumruq” əsərini yazıb...”
Azərbaycan Bəstəkarlar İttifaqının katibi, professor Zemfira Qafarova “Bakı-Xəbər”ə şərhində bildirdi ki, Bəstəkar İttifaqının üzvləri zəfərimizi tərənnüm edən əsərlər yazıb: “Bizim bəstəkarlarımız Birinci Qarabağ müharibəsi dövründə çoxlu əsərlər yazıb, 20 Yanvar, Xocalı faciələri barədə müxtəlif janrlarda bəstələr yaradıblar. Bu öz yerində. Siz o əsərlər haqda eşitmisiniz. 44 günlük Müharibəyə gəlincə, əvvəla, bu müharibə başlayanda baxmayaraq ki, müharibə idi, biz ciddi həyəcan keçirirdik, ürəyimiz cəbhədə qalmışdı, amma Azərbaycan bəstəkarlarının vətənpərvərlik mahnıları, marşları səslənirdi. Hətta musiqisevərlər də bu mövzuda mahnılar yazırdı. Torpaqlarımızın işğaldan azad edilməsi bizi sözün həqiqi mənasında sevindirirdi, ruhlandırırdı, sevinirdik ki, nə yaxşı oldu torpaqlarımız azad edildi. Tarixi zəfərimizlə bağlı Azərbaycan bəstəkarları əsərlər yazıblar. Qələbə bəstəkarlarımızı yeni yaradıcılıq əsərləri yaratmağa ruhlandırıb. Təsəvvür edin ki, yaşından asılı olmayaraq bütün bəstəkarlarımız zəfər mövzusunda əsərlər bəstələyiblər. Qələbədən sonrakı dönəmdə Mədəniyyət Nazirliyinin sifariş verildi ki, bəstəkarlar zəfəri tərənnüm edən əsərlər yazsınlar. Bundan sonra bizim bəstəkarlar qələbəyə həsr olunmuş əsərlər yazmağa başladılar. Yazılan əsərlər bizə təqdim olunurdu, biz onları dinləyirdik, bəzilərini bəyənirdik, bəzilərini yox. Qələbəni tərənnüm edən əsərlər arasından 18-ni seçdik. Bunlar doğrudan da maraqlı əsərlər idi. Bilirsiz ki, Heydər Əliyev Sarayında həmin əsərlərdən ibarət konsert oldu, onlar simfonik orkestrdə səsləndirildilər. 44 günlük müharibədə əsasən mahnı janrı, marşlar səslənirdi. Amma konsertdə bəstəkarların zəfərlə bağlı müxtəlif janrlarda yazdığı, xüsusən də simfonik əsərləri təqdim edilib. Burada simfonik poemalar, xor üçün əsərlər, süitalar vardı. Bu əsərlərin içində Mobil Babayevin, Azər Dadaşovovun, Sərdar Fərəcovun, Firəngz Əlizadənin və başqalarının əsərləri var. Fikrimizcə, bəstəkarlarımızın zəfəri tərənnüm edən əsərləri səsləndiriləcək və dinləyicilərə təqdim ediləcək. Gənclərimiz arasında da yaxşı əsərlər yazanlar var. Məsələn, gənc bəstəkar Vüqar Məmmədzadə “Dəmir yumruq” əsərini yazıb və bu əsər dinləyicilərə xoş təsir göstərib”.
Z.Qafarova bildirdi ki, bəstəkarlar əsərlər yazıb, amma bunların kütləvi təbliğatı, radio və televiziyalarda səslənməsi baxımından problemlər var. O, hesab edir ki, telekanallar, radiolar zəfəri tərənnüm edən əsərləri daha çox təbliğ etməlidir. “Çox təəssüflər olsun ki, bəstəkar yaradıcılığı təbliğat baxımından geridə qalıb. Birbaşa təbliğatla məşğul olmalı olan radio-televiziya kanallarımız bəstəkar yardıcılığını unudub. Təkcə qələbə əsərləri deyil, ümumiyyətlə Azərbaycan bəstəkarlarınarxa plana keçib. Bəstəkarları yubileylərdə yada salırlar, həmin zaman əsərlər səsləndirilir”.
Qarabağ zəfərini tərənnüm edən 18 seçilən əsərin notunun çap olub olmadığına gəlincə, Z.Qafarova bildirdi ki, hələ o əsərlər çap olunmayıb, amma çap olunması, təbliğ edilməsi çox vacibdir. İttifaq katibi həmçinin vurğuladı ki, bəstəkarlarımızın qələbə əsərləri telekanallarda əsas yer tutmalıdır. “Bu əsərlər çap olunamayıb, amma çap olunsa yaxşı olar. O əsərlərdən ibarət konsert lentə alınıb, amma bir dəfə göstərdilər, sonra göstərmədilər. Bir dəfə ilə olmur. Bəstəkarlarımızın Qarabağ zəfərinə həsr etdiyi əsərlər efirlərdə hər gün təbliğ edilməlidir. Amma biz bunu görmürük”- deyə Z.Qafarova qeyd etdi.
İradə SARIYEVA
