Təbriz Musayev: “SSRİ rəhbərliyi məqsədyönlü şəkildə hadisələrin və azərbaycanlıların deportasiyasının qarşısını almadı”
Prezident İlham Əliyev Yeni Azərbaycan Partiyasının (YAP) VIII Qurultayında çıxışı zamanı deyib ki, əgər Heydər Əliyev o vaxt Azərbaycanda olsaydı, Azərbaycan xalqının başına bu oyunlar açılmasına imkan verməzdi:
“Məhz Heydər Əliyev Politbürodan, sovet hakimiyyətindən uzaqlaşdırılandan sonra iki həftə keçməmiş - 1987-ci ilin noyabrında erməni millətçilər Qarabağı Ermənistana birləşdirmək üçün məsələ qaldırmışdılar. Bu təklif sovet rəhbərliyi və Bakı cəlladı Qorbaçov tərəfindən dəstəklənmişdir. Faktiki olaraq sovet rəhbərliyi o vaxt öz qərarını vermişdi. Azərbaycanda isə hakimiyyətdə oturan satqın rəhbərlər və bütövlükdə satqın rəhbərlik, sadəcə olaraq, onların əlində bir alət idi. Təsəvvür edin, əgər Heydər Əliyev o vaxt Azərbaycanda olsaydı, heç vaxt imkan verə bilməzdi ki, Azərbaycan xalqının başına bu oyunlar açılsın. Heç vaxt imkan verməzdi ki, separatizm meyilləri Qarabağda yer alsın”.
Sözügedən məsələ ilə bağlı fikirlərini baki-xeber.com-la bölüşən İrəvan Azadlıq Təşkilatının sədri Təbriz Musayev hesab edir ki, o vaxt məlum hadisələrin başlanması əsla təsadüfü deyildi: “Bəli, Qorbaçov başda olmaqla SSRİ rəhbərliyi erməni fitnəkarlığını dəstəkləmişdi. Belə olmasaydı 1987-ci ilin oktyabrında Heydər Əliyevvi istefa verməyə sövq etməzdilər. Məhz Heydər Əliyevin istefasından sonra noyabrda Abel Aqanbekyan Qorbaçovun köməkçisi qismində Qarabağın Ermənistana verilməsi təklifi ilə Fransa mətbuatında çıxış edərək bölgədəki gərginliyi alovlandırmışdı. Aqanbekyan buna görə cəzalandırılmadı. Niyə? Ona görə ki, o, təsadüfən belə fikir işlətməmişdi. Rəhbərliyin razılığını alaraq Qarabağın Ermənistana birləşdirilməsi tezisini ortaya atdı. Çox vaxt yanlış fikirlər səslənir ki, 1988-ci ildən soydaşlarımız Ermənistandan deportasiya edilməyə başlandı. Bu, belə deyil. Artıq 1987-ci ilin dekabrından başlayaraq azərbaycanlılar Qafan rayonundan deportasiya edilməyə başlandı. SSRİ rəhbərliyi məqsədyönlü şəkildə hadisələrin və azərbaycanlıların deportasiyasının qarşısını almadı. Halbuki, istəsəydilər dərhal önləyici tədbirlər görmək mümkün idi. Sumqayıt hadisələrini törədən də SSRİ DTK-sı idi. Qorbaçov elə bilirdi ki, Azərbaycan xalqı Qarabağın Ermənistana peşkəş edilməsinə müqavimət göstərməyəcək. Ancaq başlanan Xalq Hərəkatı Moskvanın planlarını pozdu. Həqiqətən də Heydər Əliyev SSRİ rəhbərliyindən uzaqlaşdırılmasaydı erməni separatizmini elə beşiyindəcə boğmaq olardı. Məlumfəlakətli hadisələr baş verməzdi”.
Vidadi ORDAHALLI
