Braziliyada 2026-cı il prezident seçkilərinin ilk turunda senator Flavio Bolsonaro hazırkı prezident Luis İnasio Lula da Silvanı qabaqlayıb.
Bülletenlərin 98,72 faizi hesablandıqdan sonra Bolsonaro47,25 faiz, Lula da Silva isə 44,9 faiz səs toplayıb. Digər namizədlər xeyli geridə qalıb.
Heç bir namizəd 50 faizdən çox səs toplamadığı üçün prezident seçkisinin ikinci turu keçiriləcək. İkinci turun 25 oktyabr 2026-cı ildə baş tutması planlaşdırılır.
Qalan bülletenlərin nəticəni əhəmiyyətli dərəcədə dəyişməsinin gözlənilmədiyi bildirilir.
Flavio Bolsonaronun hakimiyyətə gəlməsi halında Braziliyanın xarici siyasətində mümkün dəyişikliklər BRICS-in gələcəyi baxımından da diqqət çəkir. Bolsonaroplatformasının BRICS-ə və xüsusilə Rusiya-Çin istiqamətinə münasibəti nəzərə alınmaqla, onun prezidentliyi dövründə Braziliyanın Moskva və Pekinlə münasibətlərində, eləcə də BRICS çərçivəsində iştirakında hansı dəyişikliklər baş verə bilər? Braziliya BRICS daxilində əvvəlki aktivliyini azalda və Qərblə münasibətlərə daha çox üstünlük verə bilərmi?
Əli Orucov: “Bolsonaro qalib gələcəyi təqdirdə belə, onun yürüdəcəyi xarici siyasətdə kardinal dəyişikliklərin baş verəcəyini gözləmirəm”
Politoloq Əli Orucov məsələ ilə bağlı “Bakı-Xəbər” qəzetinə açıqlamasında bildirib ki, Braziliyada oktyabrın 4-də keçirilən prezident seçkilərinin ilk turunda namizədlərdən heç biri 50 faizlik səs həddini keçə bilmədiyi üçün mübarizə oktyabrın 25-nə təyin olunan ikinci tura qalıb.
Onun sözlərinə görə, ilk turda Flavio Bolsonaro səslərin 47 faizini, hazırkı prezident Luis İnasio Lula da Silva isə 44 faizini qazanıb. Hər iki namizədin mövqelərində sosial yönümlü yanaşmalar olsa da, onların əsas fərqi xarici siyasət kursunda özünü göstərir. Maraqlı məqam ondan ibarətdir ki, seçki kampaniyası zamanı seçicilərə verilən vədlər baxımından onların mövqeləri müəyyən dərəcədə bir-birinə yaxındır.
Əli Orucov qeyd edib ki, xarici siyasət məsələsində isə namizədlərin mövqeləri kəskin şəkildə fərqlənir. Keçmiş prezident Jair Bolsonaronun oğlu Flavio Bolsonaro ABŞ-la daha sıx əlaqələrin qurulmasına, xüsusilə mineral ehtiyatlar sahəsində əməkdaşlığın genişləndirilməsinə üstünlük verir. Lula da Silva isə BRİKS çərçivəsində, o cümlədən Çinlə mövcud əməkdaşlıq formatını məqbul hesab edir. Bu baxımdan seçkilərdə əsas rəqabət daxili siyasətlə yanaşı, Braziliyanın gələcək xarici siyasət istiqaməti ətrafında da gedir.
Politoloqun fikrincə, Flavio Bolsonaronun ikinci turda qalib gəlməsi istisna edilmir. Buna digər namizədlərin seçkidən kənarda qalması və onların tərəfdarlarının ikinci turda hansı namizədə üstünlük verəcəyi də təsir göstərə bilər. Eyni zamanda, ilk turda səsvermədə iştirak etməyən seçicilərindavranışı da nəticələr baxımından mühüm amil olacaq.
Əli Orucov hesab edir ki, Flavio Bolsonaronun ilk turdakı nəticəsində atasının, keçmiş prezident Jair Bolsonaronunsiyasi nüfuzunun da müəyyən rolu olub. Onun sözlərinə görə, Lula da Silvanın hakimiyyəti dövründə Braziliyada cinayətkarlığın artması və ictimai təhlükəsizliyin təmin olunması ilə bağlı problemlər də müxalif namizədin mövqelərinin güclənməsinə şərait yaradıb.
Politoloq hesab edir ki, Flavio Bolsonaro prezident seçiləcəyi təqdirdə Braziliyanın BRİKS-dən imtina etməsi və Çinlə münasibətləri kəskin şəkildə pozması gözlənilmir. Onun fikrincə, ABŞ uzun müddət Braziliyanın həm siyasi, həm də iqtisadi siyasətinə təsir göstərməyə çalışıb və ölkənin Latın Amerikasında ABŞ-ın təsir dairəsində qalmasına üstünlük verib. Çinlə münasibətlərdə isə bu xarakterli yanaşma müşahidə olunmayıb.
“Bolsonaro qalib gələcəyi təqdirdə belə, onun yürüdəcəyi xarici siyasətdə kardinal dəyişikliklərin baş verəcəyini gözləmirəm”, – deyə Əli Orucov bildirib.
Dəniz NƏSİRLİ
