Ermənistan və Cənubi Qafqazdakı vəziyyət oktyabrın 8-də Türkmənistanda keçiriləcək MDB sammitində əsas mövzuya çevrilə bilər. "Kommersant" qəzetinin məlumatına görə, görüşlər xüsusilə İran prezidenti Məsud Pezeşkianın sammitdə ilk iştirakı, eləcə də regional "3+3" formatının daha da inkişaf etdirilməsi ilə bağlı müzakirələr səbəbindən ciddi əhəmiyyət daşıyır.
Sammitə hazırlıq barədə danışan Rusiya Prezidentinin köməkçisi Yuri Uşakovun sözlərinə görə, Ermənistanın Baş naziri Nikol Paşinyan da daxil olmaqla, MDB-nin doqquz dövlət başçısı görüşdə iştirak edəcəklərini təsdiqləyib. Birlik tarixində ilk dəfə olaraq İran Prezidenti Məsud Pezeşkian geniş tərkibli görüşdə iştirak edəcək.
Rusiya prezidenti Putin və Paşinyan arasında Aşqabadda ayrıca görüş keçirilməsi hələ planlaşdırılmır. Lakin Uşakov Rusiya və Ermənistan liderlərinin sammitdəki digər tədbirlər zamanı görüşə biləcəyi ehtimalını da istisna etməyib.
Türkmənistana səfərindən əvvəl İran prezidenti Tehranda Ermənistanın xarici işlər naziri Ararat Mirzoyanı qəbul edib. Tərəflər infrastruktur layihələrinin inkişafı və enerji əməkdaşlığını müzakirə ediblər. Mirzoyan həmçinin İranın xarici işlər naziri Abbas Əraqçi ilə danışıqlar aparıb. Müzakirə olunan məsələlər arasında Ermənistan-İran sərhədində ikinci körpünün tikintisi, üçüncü elektrik xəttinin tamamlanması və iki ölkə arasında yük daşınmasının asanlaşdırılması yer alıb. Tehran Cənubi Qafqazda, o cümlədən "3+3" formatında çoxtərəfli əməkdaşlığı davam etdirməyə hazır olduğunu bir daha təsdiqləyib. Eyni zamanda, Əraqçi "regional olmayan üçüncü tərəflər"in regionun işlərinə müdaxiləsinin qəbuledilməz olduğunu bildirib.
"3+3" formatı Ermənistan, Azərbaycan və Gürcüstanı qonşuları - Rusiya, İran və Türkiyə ilə birləşdirir. Gürcüstan hələlik bu formatda görüşlərdə iştirak etmir. MDB sammiti ərəfəsində Moskva, Cənubi Qafqazda əsas problemlərin region ölkələri və onların qonşuları tərəfindən həll edilməsi gərəkdiyini bildirərək, bu mexanizmin aktivləşdirilməsini gündəmə gətirib.
Eyni zamanda, Ermənistan-Türkiyə əlaqələri genişlənir. Nəşrin məlumatına görə, İrəvanda Elektrik Enerjisi Ötürücü Təşkilatının baş direktoru Mustafa Püstünün rəhbərlik etdiyi Türkiyə nümayəndə heyəti ilə danışıqlar aparılıb. Tərəflər Gümrü-Qars elektrik ötürücü xəttinin bərpası və iki ölkənin enerji sistemlərinin daha da inteqrasiyası imkanlarını müzakirə ediblər.
Bu arada, Moskva Ermənistanla iqtisadi əlaqələrin vacibliyini vurğulamaqda davam edir. Xüsusilə, Rusiya Xarici İşlər Nazirliyi respublikaya Rusiya qazının tədarükünün davam etdirilməsinin vacibliyini bildirir və İrəvanı enerji təchizatı şərtlərində mümkün dəyişikliyin iqtisadi nəticələrini nəzərə almağa çağırıb.
Rusiya tərəfi Azərbaycanın əsas hissəsini Naxçıvanla birləşdirmək üçün nəzərdə tutulan Sünikdən keçən TRIPP nəqliyyat marşrutu layihəsinə xüsusi diqqət yetirir. Moskva layihənin həyata keçirilməsi və gələcək infrastrukturla bağlı bir sıra sualların qaldığını bildirir.
Tahir TAĞIYEV
