ABŞ-ın Rusiyadakı səfirliyi İrkutsk vilayətində şübhəli pnevmoniya ilə bağlı məlumatlar fonunda Amerika vətəndaşlarına potensial sağlamlıq və təhlükəsizlik riskləri barədə xəbərdarlıq edib. ABŞ dipmissiyası, İrkutskda şübhəli pnevmoniyadan bir nəfərin ölümü, karantin tədbirlərinin tətbiqi və xəstəxanaların bağlanması barədə xəbərlərdən sonra vəziyyəti diqqətlə izlədiyini bildirib.
"ABŞ səfirliyi İrkutsk vilayətindən ölümlə nəticələnən şübhəli pnevmonik vəba hadisəsi, eləcə də İrkutskda karantin tədbirləri və xəstəxanaların bağlanması ilə bağlı media xəbərlərindən xəbərdardır. Vəziyyəti yaxından izləməyə davam edirik" – deyə səfirliyin saytında dərc olunmuş açıqlamada bildirilir.
Vurğulanıb ki, ABŞ-ın Rusiyadakı vətəndaşlarına, xüsusən də Moskvadan kənarda yardım göstərmək imkanları məhduddur. Bundan əlavə, ABŞ hökumət işçiləri sağlamlıq və təhlükəsizlik səbəbləri ilə Rusiyanın müəyyən bölgələrinə əlavə səyahət məhdudiyyətlərinə məruz qala bilərlər.
Bölgədəki Amerika vətəndaşlarına yerli səhiyyə orqanlarının göstərişlərinə əməl etmələri və yüksək hərarət və ya tənəffüs yolu simptomları aşkarlandıqda dərhal tibbi yardım almaları tövsiyə olunur. Bu yaxınlarda İrkutsk bölgəsinə səfər edənlərə qayıtdıqdan sonra 14 gün ərzində sağlamlıqlarını diqqətlə izləmələri tövsiyə olunur.
Eyni zamanda, ABŞ Dövlət Departamenti Rusiyaya səyahətlə bağlı ən yüksək səviyyə olan mövcud 4-cü Səviyyəli səyahət xəbərdarlığını qüvvədə saxlayır.
Hazırda Rusiyada olan Amerika vətəndaşlarına bir daha "ölkəni dərhal tərk etmək" tövsiyə olunur. Dövlət Departamenti Rusiyaya səfər etməyi planlaşdıranlara da səyahətlərini ləğv etməyi tövsiyə edir.
Tahir TAĞIYEV
