Ağ Evin Din İşləri İdarəsinin baş müşaviri, həmçinin prezident Donald Trampın mənəvi müəllimi kimi tanınan Paula Uayt-Keyn Ermənistana gəlib. ABŞ-da o, Allahın varlılara olan sevgisi mövzusunda qəribə çıxışları ilə tanınır.
ABŞ prezidentinin sözdə mənəvi müəllimi Nikol Paşinyanın təşkil etdiyi dua səhər yeməyində iştirak etmək üçün İrəvana gəlib. Görüş zamanı Ermənistan lideri Vaşinqtonla mövcud dialoqun vacibliyini vurğulayıb. O, həmçinin, dua səhər yeməyinin müxtəlif ölkələrdən olan iştirakçılar arasında müzakirələr üçün platforma olacağına ümid etdiyini bildirib. Eyni zamanda, Paşinyan Tramp, Ermənistan ruhaniləri və Ermənistanın ABŞ-dakı səfiri arasında keçirilən son görüşü alqışlayıb və onun fikrincə, bu, dünyaya iki ölkənin ortaq xristian irsini xatırlatmaq üçün daha bir fürsət olub. Bundan əlavə, Ermənistan hökumətinin başçısı ölkəsinin 70 il ateist SSRİ-nin tərkibində olmasından şikayətlənib. Onun sözlərinə görə, buna görə də respublikada dindar insanlar hələ də marjinal qruplarla eyniləşdirilir. Eyni zamanda, Paşinyan əmindir ki, Ermənistan vətəndaşları dindar olmalıdırlar, çünki respublikanın özü erməni xalqının "vəd edilmiş torpağıdır".
Qeyd edək ki, Erməni Apostol Kilsəsinin rəhbəri katolikos II Qaregin səhər yeməyində iştirak etməyib. Paşinyan onu müxtəlif cinayətlərdə, o cümlədən subaylıq andını pozmaqda, korrupsiyada və dövlətə xəyanətdə ittiham edir. Lakin bu, Erməni Apostol Kilsəsinin rəhbərinin ABŞ-dan gələn qonaqla görüşməsinə mane olmayıb. Uayt-Keyn və II Qaregin xalqlar üçün təhlükəsiz, firavan və mütərəqqi bir həyat qurmaqda dinin və mənəvi dəyərlərin rolunu vurğulayıblar. Onlar Allaha inamın sevgi, ədalət və qonşuya qayğı ilə ifadə edilməli, universal həmrəyliyi və dinc birgəyaşayışı gücləndirməli olduğu barədə razılığa gəliblər. Uayt-Keyn katolikosa səmimi qarşılanmaya görə təşəkkür edib və Ermənistanın zəngin xristian irsini millətin inancının canlı sübutu kimi qeyd edib. Bu arada, parlament sədri Ruben Rubinyanın bildirdiyinə görə, parlamentdə Erməni Apostol Kilsəsinin bir sıra ruhanilərinin fəaliyyəti nəticəsində kilsədə yaranan böhranı və onun nəticələrini araşdırmaq üçün istintaq komitəsi yaradılıb. Rubinyanın sözlərinə görə, onun üzvləri kilsənin ermənilərin mənəvi həyatında, milli mədəniyyətin inkişafında və milli kimliyin qorunmasında müstəsna missiyasını yerinə yetirməməsinı" araşdıracaqlar. Parlament sədri iddia edir ki, deputatların ən azı dörddə biri bu komitənin yaradılmasını tələb edib. Müxalifət belə bir fəaliyyətdə iştirak etməkdən imtina edib.
Öz növbəsində, Ermənistanın maliyyə naziri Vahe Ovannisyan hökumətin kilsəyə vergi tətbiq etmək istədiyini bildirib. O deyib ki, kilsədən alınan pullar dini proqramların maliyyələşdirilməsinə sərf olunacaq. Xatırladaq ki, Ermənistanla Erməni Apostol Kilsəsi arasında münasibətlər haqqında 2007-ci il qanunu kilsə tərəfindən alınan ianələri və hədiyyələri, eləcə də ritual aksesuarların istehsalı və satışını ƏDV-dən azad edir. Vergi Məcəlləsi həmçinin dini xidmətləri və dini aksesuarların satışını da vergidən azad edir. Bütün digər vergiləri isə kilsə ödəyir. Strateji Araşdırmalar və Təşəbbüslər üzrə Analitik Mərkəzin (ACSSI) direktoru Hayk Xalatyan bildirir: “Paşinyan, çox güman ki, beynəlxalq ictimaiyyətin, o cümlədən dini təşkilatların onun mənəvi siyasətini dəstəklədiyini nümayiş etdirmək istəyir. Lakin Uayt-Keynin katolikosla görüşməsi baş nazir üçün ciddi zərbə oldu. Bu, Paşinyana onun qəzəbli kilsə əleyhinə kampaniyasının Ağ Evin dəstəyini qazanmadığına dair bir siqnal kimi qəbul edilə bilər. Bu halda, o yalnız Rusiya ilə mübarizəsinin qızğın çağında istənilən antidemokratik qərarlara göz yummağa hazır olan Avropanın dəstəyinə güvənərək əməli addımlar atmaq riskini götürəcəkmi, görəcəyik... Ümumilikdə, onun qərarlarının dövlətin kilsə işlərinə müdaxilə etməməsini nəzərdə tutan Konstitusiya ilə açıq şəkildə ziddiyyət təşkil etdiyi aydındır”.
Tahir TAĞIYEV
