Azərbaycanda Kino Agentliyi yaradılacaq. Mədəniyyət naziri Anar Kərimov bildirib ki, Kino Agentliyinin yaradılmasında əsas məqsəd kino sənayesində müasir tələblərə cavab verən şərait yaratmaqdır.
Həmçinin, bu sahəyə investisiyaların, sərmayələrin cəlb olunması, xarici investorları kino sənayemizə cəlb etmək və bununla da Azərbaycan kinosunun inkişafına nail olmaq hədəflənir.
Nazir vurğulayıb ki, Kino Agentliyini yaratmaqda əsas məqsədlərdən biri Azərbaycanda kino industriyasına xarici investorların cəlb edilməsidir.
Yəni xarici investorlar Azərbaycan kinosuna maraq göstərib ona investisiya qoyacaqlar. Təbii ki, burada əsas məsələ onların öz pullarını hansı yollarla çıxarmasıdır. Xarici investorlar Azərbaycan kinosuna qoyduqları pulu, investisiyanı necə çıxaracaqlar? Bunun mexanizmi varmı, yaxud bu mexanizm işlənib hazırlanmalıdır? Onlar bizim kinoya vəsait qoymaqla nə qazanacaqlar ki, bu məsələyə maraq göstərsinlər.
Ekspertlər deyirlər ki, bir sıra ölkələrdə xarici investorların milli kino sənayesinə cəlb edilməsi üçün xüsusi mexanizmlər mövcuddur, bizdə də bu istiqamətdə mexanizmlər hazırlanmalıdır.
“Kino Agentliyində təmsil olunan insanlar tərəfindən müəyyən araşdırmalar...”
Tanınmış kinorejissor Şamil Əliyevin fikrincə, Kino Agentliyinin yaradılması çox müsbət haldır: “Kino Agentliyinin yaradılması çox yaxşı haldır. Bu agentlik yaranacaq, artıq fəaliyyət dairəsi müəyyən olunub. Bunun yaradılması çox müsbətdir. Sual oluna bilər ki, nazirlik özü də xarici investorları cəlb edə bilərdi, bunun yaranmasına nə ehtiyac vardı? Düzdür, nazirlik özü də onları cəlb edə bilərdi. Amma nazirliyin işlək orqanı yox idi. İnvestorun gəlməsi o demək deyil ki, o gətirib pulu qoysun bura və biz də onu 5-6 qat geri qaytaraq. Belə deyil. Xarici investorlar yüksək peşəkar səviyyəsi olan insanlardır. Onlar artıq kino sənayesi formalaşmış, oturuşmuş bir ölkənin nümayəndələri olacaq. Artıq o ölkələrin çoxdan kino sənayesi formalaşıb və onlar investisiyanı hara, necə yatıracaqlarını da bilirlər. İnvestisiyaların müxtəlif məqsədləri ola bilər, tutaq ki, ölkəni ideoloji cəhətdən müəyyən təsir dairəsinə salmaq üçün həmin ölkəyə investisiya yatırılsın. Sonra həmin ölkənin içərisində özünə uyğun, özünə faydalı olan ideologiyaları təbliğ edən filmlər çəkilsin. Yəni investisiya bu məqsədlə yatırılsın. Burada təkcə maliyyə gəliri nəzərdə tutulmur, digər məqsədlər də ola bilər. Digər məqsədlər nədir? İnvestisiya yatırırsan və sən bilirsən ki, bu layihənin prokat, yayım, kinoteatrlarda tamaşaçının cəlb olunması baxımından həm o ölkədə, həm də bu ölkədə müəyyən uğuru ola bilər. Demək istəyirəm ki, hər şeydən əvvəl investorların və onların qoymaq istədiyi investisiyanın məqsədi aydın olmalıdır. Ümid edirəm ki, Kino Agentliyində də yüksək savadlı, Azərbaycan dövlətinin ideologiyasını bilən, dərk edən, Azərbaycanı təhlükəli ideya basqınından qorumağa qadir olan insanlar təmsil olunacaqlar. Hesab edirəm ki, Kino Agentliyində təmsil olunan insanlar tərəfindən müəyyən araşdırmalar, analizlər aparandan sonra xarici investorların Azərbaycan kinosuna investisiya qoymasına razılıq veriləcək. Çünki bu çox ciddi məsələdir. Yoxsa, istənilən adamın bura investisiya qoymasına imkan verilməməlidir ki, kim istəyir gəlib Azərbaycan kinosuna pul qoysun və istədiyi ideologiyanı təbliğ etsin. Onlar burada başqa vasitələrlə öz ideologiyalarını təbliğ etmək istəsələr, milyonlar xərcləyə bilərlər, amma çox az pul xərcləməklə kinematoqraf vasitəsilə o ideoloji basqını edə bilərlər. Bu təhlükə də ola bilər. Kino Agentliyinin yaradılması təkcə maliyyə baxımından gəlir əldə edib-etməmək deyil, burada əsas məsələ ideologiya məsələsidir”.
Ş.Əliyev qeyd etdi ki, burada əsas məsələ maddi-mədəni irsə münasibət, Azərbaycanı öz yolundan sapdırmamaqdır. Onun sözlərinə görə, istənilən xalqı məhv etmək istəyirsənsə, onu kökündən ayır və o yalnız bir maddiyyat dalınca qaçan, maddiyyatı düşünən biokütlə olacaq. “Sözümün canı odur ki, əsas xalqın, dövlətin ideologiyasıdır. Böyük mənada mədəni bir varlığın sahibi olmalıdır millət. Millət özünün keçmişinə baxıb gələcəyə getməlidir.
Ona görə də Kino Agentliyi toplum şəkildə bu məsələnin həlli ilə məşğul olacaq. Sözsüz ki, cənab nazirin rəhbərliyi altında bu iş həyata keçəcək”.
Ş.Əliyev bildirdi ki, Azərbaycan xalqı Azərbaycan dövlətçiliyini, ölkəmizin müstəqilliyini çox böyük çətinliklə, şəhidlərimizin qanı hesabına qazanıb. “Biz müstəqilliyimiz uğrunda saysız şəhid vermişik. 44 günlük müharibədə şəhidlərimiz çox olub, biz torpaqlarımızı işğaldan azad etmişik. Biz parlaq qələbəmizi maddiyyata qurban verə bilmərik. Hər bir ziyalının, hər bir mədəniyyət adamının, hər bir azərbaycanlının borcudur ki, xalqımızın maddi-mədəni irsinə qayğı ilə yanaşsın, onun keşiyində dayansın. Kino Agentliyi də bu vəzifəni yerinə yetirməyə borcludur. Ümid edirəm ki, elə bu məqsəddən də Kino Agentliyi yaranır. Kino Agentliyi yaradılanda orada idarəetmədə, filmlərin, ssenarilərin seçilməsində şəffaflıq öz əksini tapmalıdır. Məsələn, kimlərsə hesab etməməlidir ki, onlar üçün qapı açıq olmalıdır, istədikləri proyektləri gətirib çəkməlidir. Bəzi hallarda görürük ki, bu, uğurla nəticələnmir, orada müəyyən ideoloji sapmalar olur. Yəni heç bir status obyektivlikdən, şəffaflıqdan üstün olmamalıdır. Burada “seçilmişlər” yoxdur. Hamımızın vəzifəsi bərabər şəkildə Azərbaycan mədəniyyətinin keşiyində durmaq və gələcək nəsillərə indiyə qədər əldə olunan yaxşı nə varsa, hamısını çatdırmaq olmalıdır” - deyə Ş.Əliyev qeyd etdi.
İradə SARIYEVA
