Arzuxan Əlizadə: “Azərbaycan bu istiqamətdə özünəməxsus diplomatik təcrübə formalaşdırıb”
Yeni Azərbaycan Partiyasının (YAP) VIII Qurultayında çıxışı zamanı Prezident İlham Əliyev Azərbaycan dövlətinin yürütdüyü xarici siyasətdən danışarkən bildirib ki, xarici siyasətimiz uğurludur, dünyanın bütün qütbləri ilə təmaslar qururuq.
Prezident İlham Əliyev bildirib: “Dediyim kimi, bizim xarici siyasətlə bağlı addımlarımız dünyada böyük təqdirlə qarşılanır. Nüfuzumuz artır. Biz bir çox yeni formatlara qoşuluruq. Bu gün Azərbaycan qədər çoxşaxəli beynəlxalq əlaqələr quran və bir çox ölkələrlə, deyə bilərəm ki, bütün qütblərlə təmasda olan, öz maraqlarını müdafiə edən ikinci ölkə çətin tapılsın, bəlkə də var. Amma hər halda bu bir nadir təcrübədir. Təkcə son ayın hadisələrini xatırlatmaq kifayətdir ki, hər kəs görsün, bir-birinə, deməli, düşmənçilik edən ölkələrin yüksəkvəzifəli nümayəndələri beynəlxalq tədbirlər çərçivəsində Azərbaycanda görüşürlər. O cümlədən Azərbaycanda müəyyən beynəlxalq risklərin azaldılması üçün görüşlər, tədbirlər keçirilir. Nə üçün Azərbaycan seçilir? Çünki birincisi, bizə inam var. Çünki bilirlər ki, Azərbaycan etibarlı tərəfdaşdır. İkincisi, indi bir çox ölkələr müxtəlif düşərgələrə üzv olublar, yaxud da ki, olmaq istəyirlər. Biz isə heç bir düşərgəyə qoşulmuruq və qoşulmayacağıq, bu bizə lazım deyil. Ərazisi və əhalisi o qədər də böyük olmayan ölkə üçün müstəqil bir amil kimi dünya miqyasında dayanmaq və hörmət qazanmaq, əlbəttə ki, asan deyil. Bunun bir çox səbəbləri var, bu barədə çox danışmaq istəməzdim. Sadəcə olaraq, bundan sonra da vəzifələr sırasında xarici siyasətimizin müdafiəyönümlü yox, həm aktiv, daha çox fəalyönümlü olması lazımdır. Əlbəttə ki, ölkəmizin beynəlxalq təşkilatlardakı rolu da danılmazdır. İndi bunu hər kəs yaxşı xatırlayır, BMT-dən sonra ikinci ən böyük təsisata biz 4 il rəhbərlik etmişik, özü də yekdil qərarla seçilmişik. Keçən ilin noyabr ayında artıq çox əlamətdar hadisə baş vermişdi. Azərbaycan Mərkəzi Asiya Məşvərət Görüşlərinə tamhüquqlu üzv kimi qəbul edildi. Biz Mərkəzi Asiyada yerləşmirik, biz Cənubi Qafqazda yerləşirik. Amma görün, Azərbaycan bu ölkələrə nə qədər yaxındır ki, nə qədər ciddi siyasi, iqtisadi, nəqliyyat, enerji və digər layihələr önəmlidir ki, bax, presedenti olmayan bu hadisə də baş verdi”.
Bəlkə də düyada belə ölkə yenə var, ancaq hər halda, bu nadir təcrübədir.
Millət vəkili Arzuxan Əlizadə baki-xeber.com-a bildirdi ki, Azərbaycanın xarici siyasətinin əsas xüsusiyyətlərindən biri müstəqil, balanslaşdırılmış və milli maraqlara əsaslanan siyasət yürütməsidir. “Prezident İlham Əliyevin YAP Qurultayında səsləndirdiyi fikirlər də məhz bu yanaşmanın mahiyyətini ifadə edir. Müasir dünyada geosiyasi gərginliklərin artdığı, böyük güclər arasında rəqabətin kəskinləşdiyi bir şəraitdə müxtəlif siyasi qütblərlə eyni vaxtda əlaqələr qurmaq və bu münasibətləri qoruyub saxlamaq heç də asan məsələ deyil. Azərbaycan bu istiqamətdə özünəməxsus diplomatik təcrübə formalaşdırıb.
Ölkəmizin buna nail olmasının başlıca səbəblərindən biri xarici siyasətdə emosional qərarlardan deyil, praqmatik yanaşmadan çıxış etməsidir”.
Millət vəkili qeyd etdi ki, Azərbaycan həm Qərb dövlətləri, həm Rusiya, həm də Çin və digər regional güclərlə münasibətlərini qarşılıqlı maraqlar əsasında qurmağa çalışır. “Enerji təhlükəsizliyi, nəqliyyat-logistika imkanları, regional təhlükəsizlik və iqtisadi əməkdaşlıq Azərbaycanın beynəlxalq münasibətlər sistemində mövqeyini möhkəmləndirən əsas amillərdəndir. Eyni zamanda, ölkəmizin əlverişli geostrateji mövqeyi və beynəlxalq layihələrdə iştirakı onun müxtəlif tərəfdaşlar üçün əhəmiyyətini artırır.
Digər mühüm məqam Azərbaycanın öz milli maraqlarını xarici siyasətin mərkəzində saxlamasıdır. Hər hansı bir güc mərkəzinin təsiri altına düşmədən, müxtəlif tərəflərlə dialoqu davam etdirmək müstəqil dövlət siyasətinin mühüm göstəricisidir. Təbii ki, bu siyasət davamlı diplomatik fəaliyyət, qarşılıqlı etimadın qorunması və beynəlxalq proseslərin düzgün qiymətləndirilməsini tələb edir. Azərbaycanın təcrübəsi göstərir ki, beynəlxalq münasibətlərdə uğurlu əməkdaşlıq üçün tərəflər arasında seçim etməkdən daha çox, milli maraqları qorumaqla mümkün əməkdaşlıq imkanlarından səmərəli istifadə etmək vacibdir”-deyə A.Əlizadə vurğuladı.
İradə SARIYEVA
