Şou-biznesçilərin döyüş bölgələrinə kütləvi axın etdiyi, əsgərlərlə poz verib şəkillər çəkdirdiyi, sonra isə həmin şəkilləri sosial şəbəkə hesablarında yayımladıqları məlumdur. Bir çox halda, şou-biznesçilər adının, görüntüsünün yayılmasının qadağan olunduğu strateji yerlərdə də fotolar və videollar çəkdirməkdən çəkinmirlər. Dəfələrlə şou-biznesçilərin bu davranışları sosial şəbəkələrdə müzakirə edilib və onların hərəkətləri tənqid olunub. Artıq şou-biznesçilərin bu davranışlarının qarşısı hüquq müstəvidə alınır.
Məlum olduğu kimi, Ermənistan Respublikası silahlı qüvvələrinin beynəlxalq hüququn norma və prinsiplərini, 1949-cu il tarixli Cenevrə Konvensiyaları və onların Əlavə Protokollarını pozaraq, ağır artilleriya və raketlərdən istifadə etməklə bir neçə istiqamətdən Azərbaycan Respublikasının yaşayış məntəqələrini və hərbi mövqelərini atəşə tutduğunu, nəticədə bu hücumların qarşısının alınması məqsədilə Azərbaycan Ordusunun əks-hücum əməliyyatlarına başladığını, həmçinin, ölkəmizdə hərbi vəziyyətin elan edilməsini nəzərə alaraq, dəfələrlə sosial media və digər rəqəmsal platforma istifadəçiləri cəbhəboyu zonada vəziyyət, xüsusilə də hərbi-siyasi və əməliyyat şəraiti, qoşunların dislokasiyası, hərbi texnika və onun hərəkəti haqqında, eləcə də silah-sursat, habelə dövlət təhlükəsizliyinə xələl gətirən digər məlumatların yayılmaması ilə bağlı xəbərdarlıq olunub.
Baş Prokurorluğun Mətbuat xidmətindən mətbuata verilən məlumata görə, aparılmış araşdırmalar zamanı Bakı şəhər sakinləri Nadir Qafarzadə, Kamil Zeynallı və başqa şəxslər tərəfindən internet informasiya ehtiyatında, o cümlədən, informasiya-telekommunikasiya şəbəkəsində yayılması qadağan edilən informasiyaların, foto və vidogörüntülərin yayılması halları müəyyən edilib.
Belə ki, inzibati xətalar haqqında qanunvericiliyin tələblərini pozduğuna görə Kamil Zeynallı barəsində İnzibati Xətalar Məcəlləsinin 388-1.1 (internet informasiya ehtiyatında və ya informasiya-telekommunikasiya şəbəkəsində yayılması qadağan edilən informasiyanın yerləşdirilməsi) və 517-2.6-cı (hərbi vəziyyət rejiminin tələblərinin pozulması) maddəsinə əsasən, Füzuli Rayon Prokurorluğunda inzibati xətalar haqqında işlər üzrə icraat başlanıb və toplanmış material baxılması üçün aidiyyəti üzrə rayon məhkəməsinə göndərilib.
Füzuli Rayon Məhkəməsinin qərarı ilə K.Zeynallı barəsində 10 gün müddətinə inzibati tənbeh növündə həbs seçilib.
Bundan başqa, qeyd edilənlərlə əlaqədar Nadir Qafarzadə Baş Prokurorluğa dəvət edilərək “Prokurorluq haqqında” Azərbaycan Respublikası Qanununa əsasən, qanunvericiliyin tələblərinə zidd məlumatların yayılmasının davam etdiriləcəyi təqdirdə barəsində cinayət məsuliyyəti də daxil olmaqla, qanunvericilikdə nəzərdə tutulmuş daha ciddi tədbirlər görüləcəyi barədə prokuror təsir tədbiri aktı olan xəbərdarlıq elan edilib. Eyni zamanda, bu növ, hərəkətlərə yol vermiş digər şəxslərlə də profilaktik söhbətlər və maarifləndirici işlər aparılıb.
“Azərbaycan Respublikasının Baş Prokurorluğu tərəfindən bir daha əhalinin nəzərinə çatdırırıq ki, “Dövlət sirri haqqında” 2004-cü il 7 sentyabr tarixli Qanuna və Azərbaycan Respublikası Prezidentinin “Azərbaycan Respublikasının Silahlı Qüvvələrinin Ermənistan Respublikası Silahlı Qüvvələri ilə təmas xəttində bəzi təhlükəsizlik tədbirləri haqqında” 2014-cü il 24 sentyabr tarixli Sərəncamına uyğun olaraq, qanunla qadağan olunmuş məlumatların yayılmasına görə müvafiq məsuliyyət nəzərdə tutulur.
Azərbaycan Respublikasının Silahlı Qüvvələri, hərbi obyektlər, onların təyinatı, silahlı birləşmələrin strateji, operativ və səfərbərlik üzrə yerləşdirilməsi, hərbi hissələrin təşkilati strukturu, şəxsi heyətinin sayı barədə fotoşəkillər, audio-videomateriallar və digər informasiyalar yayan şəxslər barədə qanunvericiliyin tələblərinə uyğun olaraq, ən ciddi tədbirlərin görülməsi təmin ediləcək. Hazırda ölkəmiz üçün həssas olan dövrdə hər kəsi vətəndaş məsuliyyətini dərindən dərk etməyə, ayıq-sayıq olmağa, Azərbaycan Respublikasının dövlət təhlükəsizliyinə və cəbhədə əməliyyat şəraitinə xələl gətirə biləcək addımlardan çəkinməyə çağırırıq” - deyə məlumatda qeyd olunur.
Məlum olduğu kimi, hələlik K.Zeynalı həbs edilib, N.Qafarzadəyə isə ciddi xəbərdarlıq olunub. Fikrimizcə, şou-biznesçilərin hərəkətlərinə verilən uyğun qiymət başqalarına dərs olmalıdır.
“Kamil Zeynallının həbs edilməsi, Nadir Qafarzadəyə isə aidiyyəti qurumlar tərəfindən xəbərdarlıq edilməsindən başqa şou-biznesçilər də dərs götürməlidirlər”
Vətəndaş Cəmiyyəti Alyansının rəhbəri, Yeni Yazarlar və Sənətçilər İctimai Birliyinin sədri, yazıçı-kulturoloq Aydın Xan Əbilov bizimlə söhbətində şou-biznesçilərin yol verdiyi bu hərəkətlərin qəbuledilməz olduğunu bildirdi. “Sözsüz ki, hər bir fövqəladə vəziyyət zamanı, o cümlədən də müharibə vaxtı döyüş gedərkən rəsmi dövlət qurumlarının müəyyən etdiyi qayda-qanunlara hər kəs əməl etməlidir. Təəssüflər olsun ki, bizim insanların böyük əksəriyyəti, xüsusən də özünü bloger sayanlar, eləcə də şou-biznes nümayəndələri bu qadağaların nə üçün qoyulduğunun mahiyyətinə varmırlar. Kamil Zeynallı, Nadir Qafarzadə hətta bunu xoş niyyətlə etmiş olsalar da, orduya dəstək məqsədilə oradan şəkillər çəkib yayıblarsa belə, bu, həm fövqəladə vəziyyət, həm də müharibə şəraitilə bağlı Azərbaycan qanunvericiliyini pozurlar. Onların bu davranışı mövcud qanunvericiliyin pozulması deməkdir. Şou-biznesçilər fərqinə varmırlar ki, şəkillərdə görsənən məkanlar, əsgərlərin, zabitlərin üzləri, binalar, ağaclar belə, düşmən üçün, bir növ, siqnal, qaydalı informasiyalar deməkdir. Bilirsiniz ki, Azərbaycanda internet, sosial şəbəkələrə giriş qismən məhdudlaşdırılıb. İstifadəçilər sosial şəbəkələrə girmək üçün VPN və digər xüsusi proqarmlardan istifadə edirlər. Azərbaycan MDB-nin internet məkanına daxil olduğuna görə oradakı VPN-lərin çoxu bizə dost olmayan ölkələrin, xüsusən də Rusiyada yaşayan ermənilərin, Ermənistan xüsusi xidmət orqanlarının yaratdığı VPN-lərdir. Bizim cəbhədə olan əsgərlərimiz, zabitlərimiz, cəbhəyanı, arxa və ön xətdə olan vətəndaşlarımız, orduya dəstək göstərməyə gedən insanlarımız unutmamalıdırlar ki, VPN-ə daxil olduqları andan Ermənistan xüsusi xidmət orqanlarının, düşmən ölkənin Müdafiə Nazirliyinin hakerlərinin, bir növ, “əsgər”lərinə çevrilirlər. Bizim cəbhə bölgəsinə gedən insanlarımızın interneti açılan kimi smartfonların ları işə düşür. Təəssüflər olsun ki, Azərbaycanda internetə cavabdeh olan şəxslər buna diqqət yetirmirlər”.
A.X.Əbilov hesab edir ki, cəbhəyə gedən insanlar VPN proqramını işə salmaqla, orada çəkilişlər etməklə həm özlərinin, həm də əsgər və zabitlərimizin həyatını təhlükəyə atırlar. A.X.Əbilovun sözlərinə görə, ölkəmizin hüquq-mühafizə və prokurorluq orqanlarının K.Zeynallı və N.Qafarzadəyə qarşı sərt addım atmasının səbəbi budur. “Bu adamlar çəkdikləri şəkillərdə məkanları aydın şəkildə göstəriblər. Dəfələrlə xəbərdarlıq edilib ki, müharibə şəraitində qadağan olunmuş məlumatları yaymaq olmaz, bu, düşmənə informasiya verməkdir. Amma bunu bəzi şou-biznesçilər anlamaq istəmirlər. Ona görə də bir ekspert kimi vətəndaşlara müraciət etmək istəyirəm ki, hansısa bir təşkilat, hüquqi-fiziki şəxs, vətəndaş orduya yardım etmək istəyirsə, bunu özbaşına etməsin, Müdafiə Nazirliyinə müraciət etsin. Müdafiə Nazirliyi Silahlı Qüvvələrə yardım fondunun hesab nömrəsini açıqlayıb, ödənişləri ora da edə bilərlər, nazirliyin müvafiq qurumları ilə də əlaqə saxlaya bilərlər. Nazirlik də vətəndaşların etdiyi yardımları lazımi yerlərə yönəltsin. Hesab edirəm ki, nəinki şou-biznesçilərin, eləcə də bütün vətəndaşların cəbhə bölgəsinə getməsi rəsmən qadağan edilməlidir. Bu onların həyatı üçün təhlükəlidir. Qanunun xüsusi bəndi yoxdur ki, ora şou-biznesçilər, Nadir Qafarzadə, Aygün Kazımova, Kamil Zeynallı və başqaları getməsin. Vətəndaşlarımız, xüsusən də şou-biznesçilər bu məsələdə məsuliyyətli olmalıdırlar. Hesab edirəm ki, K.Zeynallının həbs edilməsi, N.Qafarzadəyə isə aidiyyəti qurumlar tərəfindən xəbərdarlıq edilməsindən başqa şou-biznesçilər də dərs götürməlidirlər” - deyə A.X.Əbilov vurğuladı.
İradə SARIYEVA
