Ermənilər Azərbaycana qarşı təxribatların bir istiqamətini də mədəniyyət, xüsusən də kino üzərindən həyata keçirirlər.
Düşmən ölkənin kinorejissorları Ermənistanın işğal altında saxladığı ərazilərimizdə Dağlıq Qarabağ mövzusunda filmlər çəkir, həmin filmlərdə Dağlıq Qarabağı “müstəqil dövlət”, “qədim erməni ərazisi” kimi təqdim edirlər. Ermənilərin son 15-20 ildə bu mövzuda çəkdikləri filmlər kifayət qədərdir. Onlar həmişə çalışırlar ki, bu filmləri daha çox iştirakçı dövləti və daha geniş auditoriyanı əhatə edən beynəlxalq film festivallarına çıxarsınlar. Avropa ölkələrində təşkil edilən bu kimi festivallarda bu üzdəniraq filmlər iştirak edirlər.
Hər dəfə ermənilərin bu mövzuda çəkdikləri filmlərin təqdim edilməsi ilə bağlı cəhdləri baş tutsa da, bu dəfə ciddi təpki ilə qarşılaşıblar. Ermənilər bu yöndə son zərbəni Moskvadan alıblar. Belə ki, erməni filmi Moskva Beynəlxalq Kino Festivalının proqramından çıxarılıb.
Lent.az məlumat verir ki, bu barədə Azərbaycanın Mədəniyyət Nazirliyinin rəsmi sosial şəbəkə hesabında bildirilib. Qeyd edilib ki, 1-8 oktyabr 2020-ci il tarixlərində keçiriləcək 42-ci Moskva Beynəlxalq Kino Festivalının “Dünyadan filmlər” adlı müsabiqədənkənar proqramına erməni rejissor Civan Avetisyanın “Cənnətin qapısı” (“Gate to heaven”) adlı bədii filmi də daxil edilib.
ABŞ, Fransa, İtaliya, Çexiya, Bolqarıstan, Almaniya və Litvadan da kinematoqrafların da cəlb olunduğu bildirilən filmdə erməni rejissor, öz ənənəvi xislətlərinə sadiq qalaraq, Ermənistan-Azərbaycan Dağlıq Qarabağ münaqişəsi ilə bağlı tarixi saxtakarlıq və yalan üzərində qurulan bir kinosüjeti tamaşaçılara təqdim edir. Hadisələri Azərbaycanın işğal altındakı Dağlıq Qarabağ ərazisində cərəyan edən filmin yaradıcıları bununla bir daha kinematoqrafdan məqsədli şəkildə təbliğat müharibəsində alət kimi yararlandıqlarını göstərirlər. Erməni tərəfi əvvəllər də bu qəbildən filmlər çəkərək, xaricdəki lobbisinin dəstəyilə müxtəlif ölkələrdə nümayiş etdirib.
Sözügedən filmin Moskva Beynəlxalq Kino Festivalının müsabiqədənkənar proqramına daxil edilməsi ilə bağlı məlumatlar yayılandan sonra Azərbaycan Mədəniyyət Nazirliyi tərəfindən müvafiq addımlar atılıb. Nəticədə ermənilərin mənfur hərəkətlərinə qarşı vaxtında tədbirlər görülüb və “Cənnətin qapısı” filminin Moskva Beynəlxalq Kino Festivalının “Dünyadan filmlər” proqramından çıxarılması, eləcə də festivalın rəsmi saytından silinməsi ilə bağlı festivalın rəhbərliyi tərəfindən nazirliyə rəsmi müraciət daxil olub.
Tanınmış kinorejissor Şamil Əliyev “Bakı-Xəbər”ə bildirdi ki, erməni rejissorun Qarabağla bağlı çəkdiyi filmin sözügedən festivaldan kənarlaşdırılması Azərbaycanın əlaqədar qurumlarının məqsədyönlü səyləri nəticəsində mümkün olub. “Sözsüz ki, bu film obyektiv situasiyanı, həqiqəti əks etdirmədiyi üçün, bizim aidiyyəti qurumların müraciətindən sonra Moskva Beynəlxalq Kino Festivalının proqramından çıxarılıb. Festival özbaşına onu çıxara bilməzdi. Erməni rejissorun filminin festivaldan çıxarılması həm aidiyyəti dövlət qurumlarımızın, həm də müstəqil kinematoqraflarımızın uzun müddətdir birgə gördüyü işlərin nəticəsidir. Görürsünüz ki, çəkici bir yerə vuranda bu cür nəticəsi olur. Bildiyimə görə, bu film əsas müsabiqə proqramında olmayıb. Bu filmi müsabiqədənkənar proqramdan da olsa çıxarmağa nail olmuşuqsa, bu onu bir daha göstərir ki, aidiyyəti qurumlar öz işi ilə peşəkarcasına məşğul olanda nəticə əldə etmək mümkündür. Sözsüz ki, bu çox vacib bir məsələdir. Çalışmaq lazımdır ki, digər mötəbər beynəlxalq kino festivallarında da Qarabağ həqiqətlərini təhrif edən, həqiqəti əks etdirməyən, yalançı informasiyalar verən bu cür filmləri çıxaraq. Biz çalışmalıyıq bu filmlərin həqiqəti əks etdirmədiyini faktlarla sübut edək ki, onun da nəticəsi olsun. Bir məsələni qeyd edim. Bir neçə il əvvəl erməni əsilli ABŞ rejissoru A.Eqoyanın qondarma “erməni soyqırımı” ilə bağlı “Ararat” adlı bir bədii filmi vardı. Həmin filmi Kann Festivalının əsas müsabiqəsinə daxil etmişdilər. Bu filmi festivalın siyahısından çıxarmaq üçün Türkiyə dövlət səviyyəsində hərəkətə keçdi. Türkiyənin Xarici İşlər naziri Kann Festivalına nota verdi və bundan sonra Kann Festivalı filmi müsabiqədən çıxarmağın bir yolunu seçdi. Rejissora təklif etdilər ki, filmi sən özünü geri götür, bu, bizim tərəfimizdən sənə basqı kimi görsənməsin. Festival da öz simasını saxlamaq istəyir. A.Eqoyan özü bəyanat verdi ki, belə filmlər müəyyən mənada siyasi qarşıdurmanı bir daha qızışdırır, bu məsələnin çözülməsinə kömək etmir, mən özüm festivalın müsabiqəsindən geri çəkilirəm”.
Ş.Əliyev hesab edir ki, Mədəniyyət Nazirliyi, Xarici İşlər Nazirliyi, Azərbaycan Respublikası Kinematoqraflar İttifaqı belə məsələlərlə bağlı birgə bəyanatlar verməlidirlər. “Görünür ki, bu filmlə bağlı bu baş verib ki, Moskva Beynəlxalq Kino Festivalı erməni rejissorun filmini festivaldan çıxarıb. Çox təəssüf ki, biz həqiqətimizi çox çətinliklə həyata keçiririk. Amma bu da bir nəticədir, əlimiz ayağımız soyumamalıdır. Biz Qarabağımız haqqında həqiqətləri filmlərimiz, mədəniyyətimiz vasitəsilə dünyaya çatdırmağa çalışmalıyıq. Biz özümüz də o filmləri çəkdikcə, dünyanın mötəbər festivallarında, ekranlarında, meydanlarında Qarabağ həqiqətlərini dünya ictimaiyyətinə çatdırmalıyıq” - deyə Ş.Əliyev bildirdi.
İradə SARIYEVA
