26/10/2020 02:39
728 x 90

Fəxri adların öhdəlik müqabilində verilməsi mübahisəli qarşılanır…

img

Fəxri ada layiq olan da, olmayan da onu əldə etmək istəyir, bununla da özlərini həmkarlarından bir addım irəlidə göstərməyə səy göstərirlər. Fəxri adların, mükafat və təqaüdlərin verilməsində o qədər neqativlik baş verib ki, bunu bir-bir sadalamaq çətindir.

Artıq ölkəmizdə fəxri adların verilməsi qaydaları dəyişdiriləcək. Belə ki, Azərbaycanda fəxri ad verilən şəxslərin qarşısında öhdəlik qoyulacaq.

Mədəniyyət nazirinin birinci müavini, nazirin vəzifələrini müvəqqəti icra edən Anar Kərimov deyib ki, fəxri adlar və təqaüdlərin verilməsi ilə bağlı Mədəniyyət Nazirliyinə müraciətlər daxil olur. Onun sözlərinə görə, bu sahədə qayda-qanun yaradılmalıdır: “Etiraf etmək lazımdır ki, bu sahədə müəyyən sui-istifadə halları olub. Bu sahənin tənzimlənməsi üçün müəyyən hüquqi mexanizmlər hazırlanmalıdır. Mədəniyyət sahəsində xidmətləri olan şəxslər mükafatlandırılmalıdır.

Fəxri adların verilməsi zamanı öhdəliklərin də olmasını istəyirik. O məramlara zidd olan hərəkətlərin edilməməsi ilə bağlı öhdəliklərin olması vacibdir. Biz gələcəkdə fəxri adlar verən zaman həmin şəxslər öz üzərlərinə müəyyən öhdəliklər götürəcəklər. Bizim məqsədimiz odur ki, cəmiyyəti narahat edən məsələlərlə bağlı vətəndaşlar mövqelərini bildirsinlər”.  

  • Mərahim Fərzəlibəyov: “Fəxri ad alan şəxslərin qarşısında öhdəlik qoyulması çox müsbət hal olardı”

Tanınmış teatr rejissoru, Xalq artisti Mərahim Fərzəlibəyov baki-xeber.com-a bildirdi ki, fəxri ad verilənlərin qarşısında öhdəliklərin qoyulması müsbət haldır. “Mənə elə gəlir ki, fəxri adlar, mükafatlar, təqaüdlər sənətdə xidməti olan şəxslərə verilməlidir. Amma təəssüf ki, biz sənətə heç bir xidməti olmayan şəxslərin adlarını birdən-birə fəxri ad, təqaüd və mükafat alanların siyahısında görürdük. Hesab edirəm ki, fəxri adların verilməsi ilə bağlı gizli komissiya fəaliyyət göstərməli və sənədləri təqdim edilən şəxslərlə bağlı araşdırma aparılmalıdır. Fəxri ad, əlbəttə, insanın çiyinlərinə bir məsuliyyət də qoyur və hər kəs dövlətin ona verdiyi adı doğrultmalıdır. Fəxri ad alan şəxslərin qarşısında öhdəlik qoyulması çox müsbət hal olardı. Bu tətbiq edilərsə, fəxri ada layiq olmayanlar kənarda qalacaqlar. Fikrimcə, yeni təkliflərin hamısı gerçəkləşərsə, bunun müsbət nəticələri olacaq. Yeni qaydaların tətbiq edilməsi yaxşı olardı” - deyə M.Fərzəlibəyov qeyd etdi.

  • Oqtay Əliyev: “Bu məsələlərin fəxr ad verilən insanlar qarşısında hansısa öhdəliklərin qoyulması yolu ilə öz həllini tapacağına inanmıram”

Azərbaycan Rəssamlar İttifaqının üzvü, tanınmış rəssam-dizayner Oqtay Əliyevin fikrincə isə fəxri ad alanların qarşısına hansısa bir öhdəliyin qoyulması düzgün deyil. O.Əliyev hesab edir ki, ümumiyyətlə, hansısa bir şərt və öhdəlik qoymaqla bu sahədə olan neqativləri aradan qaldırmaq mümkün deyil. Onun sözlərinə görə, nə qədər şərtlər ağırlaşdırılsa da, yenə də layiq olmayanlar bu adlara sahiblənməyi bacaracaqlar. “Ümumiyyətlə, Azərbaycanda fəxri adların verilməsi qaydaları əvvəldən düzgün qurulmayıb. Çox təəssüf ki, kimin dostu, qohumu, pulu amili fəxri adlar məsələsində böyük rol oynayıb. Bu gizlin deyil ki, siyahını təqdim edənlər istədikləri adamın adını salır ora. İndi yeni nazir müavini gəlib. O indi deyir ki, bu məsələlər aradan qaldırılmalıdır və bunun üçün filan işlər görüləcək. Bu məsələlərin fəxr ad verilən insanlar qarşısında hansısa öhdəliklərin qoyulması yolu ilə öz həllini tapacağına inanmıram. Çünki fəxri ad, təqaüd, mükafat verilmə sistemi başdan yanlış qurulub, sistem tamamilə yenilənməlidir ki, problem öz həllini tapsın. Yəni fəxri ad alan hansısa bir  şəxsin öz üzərinə öhdəlik götürməsi normal hal deyil. Fikrimcə, bu, yanlış tələbdir. Ümumiyyətlə, fəxri adlar lazımsız bir şeydir. Görürsünüz ki, hər dəfə fəxri ad veriləndə bu məsələ cəmiyyətdə nə qədər narazılıq, etiraz yaradır. Bu səbəbdən də, ümumiyyətlə, fəxri adların verilməsi ləğv edilməlidir” – deyə O.Əliyev bildirdi.

İradə SARIYEVA

Son xəbərlər