“Sönməz Məşəl” Mədəni Əlaqələr İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının və Azərbaycan Respublikası Mədəniyyət Nazirliyinin birgə maliyyə dəstəyi ilə “Dünyanı heyrətləndirən musiqi” adlı layihə həyata keçirib.
Müasir Azərbaycan peşəkar musiqi məktəbinin əsasını qoymuş dahi Üzeyir Hacıbəylinin anadan olmasının 135 illiyinə həsr olunmuş layihə Azərbaycan Milli Konservatoriyası, Azərbaycan-Amerika Musiqi Fondu və Vaşinqton Beynəlxalq Piano İncəsənəti Şurasının tərəfdaşlığı ilə reallaşdırılıb.
Layihə çərçivəsində Üzeyir Hacıbəyli yaradıcılığından seçmələr həm amerikalı, həm də azərbaycanlı musiqiçilər tərəfindən ifa edilərək video lentə alınıb. Dahi bəstəkarın doğum günündə - sentyabrın 18-də layihənin video-konfrans şəklində təqdimatı keçirilib.
Təqdimatda əvvəlcə Azərbaycan Milli Konservatoriyasının tələbə xorunun ifasında Üzeyir bəyin 1996-cı ildə Azərbaycan Respublikasının Dövlət himni kimi qəbul olunan «Azərbaycan marşı» səsləndirilib. İfaçıları Amerikalı pianoçu Krista Miller müşaiyət edib.
Bəstəkarın “Leyli və Məcnun” operasından parçanı muğam ifaçısı, beynəlxalq müsabiqələr laureatları Orxan Hüseynli və Sədəf Budaqova tarzən Toğrul Orucovun və kamança ustası Maşallah İsgəndərovun müşayəti ilə ifa ediblər.
«Sevgili canan» romansını ABŞ-dakı Vaşinqton Beynəlxalq Piano İncəsənəti Şurasının dəstəyi ilə soprano Marina Şinko və pianoçu Frənk Konlon, «Arşın mal alan»dan Vəli ilə Tellinin duetini Azərbaycan-Amerika Musiqi Fondunun təşkilatçılığı ilə Sezar Velez (tenor), Ariel Hernandez (soprano) və Cəmilə Cavadova Spitzberq (piano) səsləndiriblər.
Dahi bəstəkarın "Aşıqsayağı" musiqi nömrəsini Azərbaycan-Amerika Musiqi Fondunun təşkilatçılığı ilə Aleksandr Snytkin (skripka), Andrey Ponoçevny (piano) və Oliver Şlafferdən (violonçel), «O olmasın, bu olsun» musiqili komediyasından “Sərvərin ariyası”nı Emin Zeynallı, “Sənsiz” romansını Nyu Yorkda yaşayan həmvətənimiz, pianoçu professor və Milli Musiqi Qlobal Mədəniyyət Cəmiyyətinin (Natıonal Musıc & Global Culture Society) yaradıcısı Nərgiz Əliyarova və kontr-Tenor İlham Nəzərov, “Cəngi" rəqs musiqisini Doqni Şiye, “Koroğlu”operasından “Çənlibel” xorunu Azərbaycan Milli Konservatoriyasının tələbə xoru ifa edib.
Musiqili proqramda rəssam Nərminə Vəliyevanın bəstəkarın personajlarına çəkdiyi illüstrasiyalar nümayiş olunub.
Video-konfransda Azərbaycan Milli Konservatoriyasının elmi işlər üzrə prorektoru, sənətşünaslıq üzrə fəlsəfə doktoru, professor Lalə Hüseynova, Vaşinqton Beynəlxalq Piano İncəsənəti Şurasının təsisçisi Şato Qardetski, Azərbaycan-Amerika Musiqi Fondunun direktoru Cəmilə Cavadova-Spitzberq, Konservatoriyanın Tələbə xorunun rəhbəri Təranə Yusifova və rəssam Nərminə Vəliyeva bəstəkarın yaradıcılığı haqqında danışıblar.
Tədbirin sonunda layihə rəhbəri “Sönməz Məşəl” Mədəni Əlaqələr İctimai Birliyinin sədri Şəhla Nağıyeva layihəyni maliyyələşdirmiş sponsor təşkilatlara, azərbaycanlı və amerikalı tərəfdaşlara, musiqiçilərə layihənin gerçəkləşməsi üçün göstərdikləri böyük dəstəyə görə dərin minnətdarlığını bildirmişdir.
Baki-xeber.com
