“Azərbaycanda “Qeyri-maddi mədəni irsin qorunması haqqında” qanun layihəsinin hazırlanmasına ehtiyac var”. Bunu Milli Məclisin Mədəniyyət komitəsinin iclasında Mədəniyyət nazirinin birinci müavini, Mədəniyyət nazirinin vəzifələrini müvəqqəti icra edən Anar Kərimov bildirib.
Nazir müavini qeyd edib ki, nazirlik bu sahədə Milli Məclislə əməkdaşlıq etməyə hazırdır.
Qeyd edək ki, millət vəkilləri də dəfələrlə “Qeyri-maddi mədəni irsin qorunması haqqında” qanunun qəbul edilməsinin vacibliyi barədə fikirlər səsləndiriblər.
“…xüsusi qanunun qəbul olunmasına ciddi ehtiyac var”
Kulturoloq Nəriman İsmayılov bildirdi ki, hər xalqın milli özünəməxsusluğu, təkrarsızlığı, tarixən formalaşmış zövq səviyyəsi, ilk növbədə və ən qabarıq şəkildə onun qeyri-maddi mədəni irsində əksini tapır: qeyri-maddi mədəni irs də elə xalqın milli dili kimidir. Azərbaycan zəngin qeyri-maddi irsə sahibdir. O nümunələrin də artıq bir qismi UNESCO-nun müvafiq siyahılarına salınıb: “Belə sərvətlərsiz xalqın mənəvi dünyası çox kasıb olardı. Azərbaycan qeyri-maddi mədəni irs baxımından zəngin sərvətə malikdir. Danılmaz faktdır ki, UNESCO ilə sıx əməkdaşlıq çərçivəsində Azərbaycanın qeyri-maddi mədəni irsinin təbliği və qorunması istiqamətində çoxlu və faydalı iş görülüb. 2008-ci ildə Azərbaycan muğamı, 2009-cu ildə Azərbaycan aşıq sənəti və Novruz bayramı, 2010-cu ildə Azərbaycan xalça toxuculuğu ənənəvi sənəti, 2012-ci ildə Azərbaycan tar ifaçılıq sənəti və onun hazırlanma ustalığı, 2013-cü ildə Qarabağ atı ilə oynanılan Çövkən atüstü oyunu, 2014-cü ildə Qadın baş örtüyü kəlağayının düzəldilməsi və geyinməsi ənənəvi incəsənəti və onun simvolizmi, 2015-ci ildə Azərbaycanın ucqar bir dağ kəndinə məxsus Lahıc misgərlik sənəti, 2016-cı ildə isə Azərbaycan lavaşı UNESCO-nun siyahısına düşüb. Lakin, eyni zamanda, UNESCO-nun daha üç – “Ümumdünya yaddaşı”, “Dünyanın yaddaşı”, “Təhlükə altında hesab edilən dillər” siyahıları üzrə Azərbaycan mədəni və mənəvi irs nümunələri qorunmaqdadır. Lakin bu siyahılardan kənarda da mənim ölkəmin yüzlərlə qeyri-maddi irs örnəyi mövcuddur ki, onların yaşamaq və qorunmaq haqqı var”.
Həmsöhbətimiz hesab edir ki, Azərbaycanın qeyri-maddi mədəni irsinin qorunması ilə bağlı xüsusi qanunun qəbul olunmasına ciddi ehtiyac var.
Günel CƏLİLOVA
