Pandemiya ilə əlaqədar olaraq respublikamızda bütün kütləvi yerlər kimi muzeylər də qapılarını tamaşaçıların üzünə bağladı. Lakin ölkəmizdə karantin qaydalarının yumşaldılmasından sonra muzeylərin və sərgi zallarının fəaliyyətinə icazə verilib.
Qeyd edək ki, bəzi vətəndaşlar sosial şəbəkələrdə muzey və sərgi salonlarının açılmasına bir qədər tənqidi yanaşıblar.
Sentyabrın 1-dən öz fəaliyyətini bərpa edən muzey və sərgi salonları (zalları) fəaliyyət göstərməyə tam hazırdılarmı?
Sorğumuza cavab olaraq, muzeylərdən bildirdilər ki, yoluxma dinamikası nəzərə alınaraq, muzey və sərgi zallarının da fəaliyyətinin bərpa olunması onları çox sevindirir. Lakin sentybarın ilk günü muzey və sərgi salonları fəaliyyət göstərməyib, onlar dezinfeksiya və təmizlik işləri ilə məşğul olublar. Əlaqə saxladığımız muzey və sərgi zallarından bildirdilər ki, sentyabrın 2-dən muzeylər artıq öz ziyarətçilərini qəbul edəcəklər. Pandemiya dövründə ölkəyə turistlərin gələ bilməməsini də nəzərə alaraq, muzeylərin rəsmi saytlarında olan videoturlar da yenilənib. Yəni xüsusən də ölkə xaricində yaşayan insanlar muzeyləri virtual formada səyahət edərək yeniliklərlə tanış ola biləcəklər.
Sədi Mirseyibli: “Muzeyimiz artıq seyrçilərə, qonaqlara xidmət etməyə tam hazırdır”
Azərbaycan İstiqlal Muzeyinin şöbə müdiri Sədi Mirseyibli “Bakı-Xəbər”ə bildirdi ki, muzey tamamilə karantin qaydalarına uyğun şəkildə fəaliyyət göstərməyə hazırdır. Muzeydə dezinfeksiya işlərinin aparıldığını, bütün vasitələrin uyğun təmizləyici maddələrlə silindiyini deyən S.Mirseyiblinin sözlərinə görə, muzeyə gələn seyrçilər sosial məsafə gözlənilməklə, 10 nəfərlik qrup şəklində buraxılacaq. “Bizim muzeyimiz qonaqları qarşılamağa tam hazırdır. Muzeyimiz daimi olaraq dezinfeksiya edilir, burada bütün sanitar-gigeyenik tələblər yerinə yetirilir. Qeyd edim ki, muzey karantin dövründə seyrçilərə xidmət etməsə də, işçilərimiz məhdud sayda işə gəlib, fəaliyyətlərini davam etdiriblər ki, ekspozisiyamız açılışa tam hazır vəziyyətdə olsun. Muzeyimiz açıqdır, istənilən tamaşaçı gəlib muzeyimizi ziyarət edə bilər. Bütün təhlükəsizlik tədbirləri görülüb, dezinfeksiya işləri aparılıb və hər gün də seyrçiləri qəbul etməzdən əvvəl dezinfeksiya işləri aparılacaq. Muzeyimiz artıq seyrçilərə, qonaqlara xidmət etməyə tam hazırdır” - deyə S.Mirseyibli bildirdi.
Ülvina Fərzəliyeva: “Muzeyin fəaliyyəti mövcud qaydalara, sanitar normalara və metodiki göstərişlərin tələblərinə uyğun təşkil olunacaq”
Milli Xalça Muzeyinin mətbuat xidmətinin rəhbəri Ülvina Fərzəliyeva “Bakı-Xəbər”ə bildirdi ki, muzeydə karantin qaydalarına uyğun olaraq bütün tədbirlər görülüb, Operativ Qərargahın bütün təlimatlarına riayət etməklə muzey tamaşaçılara xidmət göstərməyə tam hazırdır. Muzeydə dezinfeksiya və digər uyğun tərdbirlərin görüldüyünü və hər gün də davam etdiriləcəyini deyən Ü.Fərzəliyeva hesab edir ki, tamaşaçılar onların xidmətindən narazı qalmayacaqlar. “Ölkəmizdə koronavirus (COVID-19) infeksiyasının yarada biləcəyi təhlükənin qarşısının alınması istiqamətində həyata keçirilən preventiv tədbirlər, həmçinin, əhalinin tətbiq olunan karantin və gigiyena qaydalarına əməl etməsi nəticəsində yoluxma hallarının azalmasına nail olunub, sanitar-epidemioloji vəziyyət stabilləşib. Nazirlər Kabineti yanında Operativ Qərargahın qərarına əsasən, sanitar-epidemioloji vəziyyətə uyğun olaraq, ölkə üzrə bəzi məhdudiyyətlər aradan qaldırılıb, yumşalmalar təmin edilib, o cümlədən, muzey və sərgi zallarının fəaliyyəti bərpa olunub.
Azərbaycan Milli Xalça Muzeyi də öz fəaliyyətini 2 sentyabr 2020-ci il tarixindən bərpa edir. Muzey həftəiçi çərşənbə axşamı – cümə günləri, saat 10.00-dan 19.00-dək açıq olacaq. Muzeyin fəaliyyəti mövcud qaydalara, sanitar normalara və metodiki göstərişlərin tələblərinə uyğun təşkil olunacaq, muzeyə 10 nəfərdən çox olmayan qruplar buraxılacaq. Şənbə-bazar günləri dezinfeksiya işləri ilə əlaqədar muzey ictimaiyyət üçün bağlı olacaq.
Beləliklə, asudə vaxtınızı maraqlı və səmərəli keçirmək istəyirsinizsə, 2 sentyabr tarixindən etibarən sizi Azərbaycan Milli Xalça Muzeyində gözləyirik!” - deyə müsahibimiz bildirdi.
İradə SARIYEVA
