Muzeylər mədəniyyətimizin, tariximizin, arxeologiya və etnoqrafiyamızın, bir sözlə, düşüncəmizin ünvanlarından biridir.
Bildiyimiz kimi, ölkəmizdə karantin qaydalarının yumşaldılması ilə əlaqədar olaraq müəyyən sahələrdə açılımlar baş verdi. Sentyabrın 1-dən Nazirlər Kabineti yanında Operativ Qərargah tərəfindən açılmasına qərar verilən sahələrdən biri də muzey və sərgi salonlarıdır. Muzey və sərgi salonlarının açılması ilə bağlı qərar qəbul edilər-edilməz, bəzi KİV-də və sosial şəbəkələrdə müəyyən vətəndaşlar tərəfindən dözümsüz yanaşmalar özünü göstərməyə başlayıb. Bəziləri deyirlər ki, pandemiya ilə əlaqədar olaraq Azərbaycana xarici turistlərin gəlmədiyi, yaxud təsadüfi hallarda gəldiyi bir vaxtda muzey və sərgi zallarının açılması düzgün deyil, bunun əvəzinə başqa istiqamətlərdə açılımlar olsaydı, daha yaxşı olardı. Məsələn, idman zallarının açılmasının, rayonlara gediş-gəlişin bərpa edilməsinin və sairin daha çox arzulanan olduğunu deyən bəzi vətəndaşlar unudurlar ki, hazırda bu məsələlərin gerçəkləşdirilməsi məqsədəuyğun deyil, zamanı gələndə qapalı idman zallarında da məşqlər bərpa ediləcək, rayonların yolu açılacaq.
Amma bilmək lazımdır ki, muzey və sərgi zallarının, salonlarının açılması təkcə turistlərlə bağlı deyil, turistin gəlib-gəlməməsindən asılı olmayaraq, muzeylər fəaliyyət göstərməlidirlər. Çünki muzeylər və sərgi salonlarının fəaliyyətinin bərpa edilməsi tariximizin, mədəniyyətimizin təbliği deməkdir. Bu qurumlar gənclərin vətənpərvərlik tərbiyəsinin, milli şüurunun formalaşmasında, onlarda bu hisslərin bərkiməsində rol oynayan məkanlardır. Bu baxımdan, muzey və sərgi zallarının açılmasında hər hansı bir mənfi hal yoxdur.
Bilirik ki, Sovet dövründə Azərbaycan muzeylərinə elə də güclü turist axını yox idi, amma muzeylər, sərgi zalları işləyirdi, gənclərimizə mədəniyyətimizi, tariximizi, incəsənətimizi, maddi və qeyri-maddi dəyərlərimizi tanıdırdı. Sözümüzün canı odur ki, muzey və sərgi salonları yalnız turistlər üçün deyil. Bu gün ölkəmizdə uşaqların, xüsusən də gənc nəslin vətənpərvərlik ruhunda tərbiyə alması üçün vacib təsirlərdən birinin muzey və sərgi salonlarının olduğu danılmazdır. Ona görə də karantin qaydalarının yumşaldılmasından sonra ilk açılan məkanlardan birinin muzeylər və sərgi salonları olması müsbət haldır. Yəni imkan olan kimi ilk muzeylərin açılması vacib idi və açılmasına da qərar verildi. Muzeylərin sentyabrın 1-dən fəaliyyətə başlamasının müsbət cəhətləri çoxdur, onlardan biri də yeni tədris ilində şagirdlərin muzeylərlə əlaqəsinin gücləndirilməsidir. Muzeylərimizin çoxunun virtual xidmət imkanları var və şagirdlər, gənclər 10 nəfərlik qrup şəklində muzeyləri əyani şəkildə ziyarət edə biləcəklər. Odur ki, muzey və sərgi salonlarının sentyabrın 1-dən fəaliyyətə başlamasına ancaq sevinmək və bu qərarı təqdir etmək lazımdır.
İradə SARIYEVA
