Son dövrlər Mədəniyyət Nazirliyinin strukturuna daxil olan təşkilatlarda əlaqədar qurumların apardıqları araşdırmalar zamanı bir sıra cinayət faktları üzə çıxarılıb.
Baş Prokurorluq yanında Korrupsiyaya Qarşı Mübarizə Baş İdarəsi əməkdaşlarının keçirdikləri əməliyyat zamanı Mədəniyyət Nazirliyi nəzdində Azərbaycan Dövlət Nəfəs Alətləri Orkestrının bədii rəhbəri Lütfi Qədirov ifşa edilərlərək saxlanılıb. L.Qədirov törətdikləri cinayətləri etiraf edib və Binəqədi rayon Məhkəməsinin qərarı ilə L.Qədirov barəsində həbs qətimkan tədbiri seçilib.
L.Qədirovun 2010-2020-ci illərdə Azərbaycan Dövlət Nəfəs alətləri orkestrinin bədii rəhbəri işləyərkən xidməti vəzifələrinin icrası ilə əlaqədar tabeçiliyində olan əməkdaşlara ümumi himayədarlıq və laqeydlik müqabilində onlardan külli miqdarda rüşvət almasına dair kifayət qədər dəlillər aşkar edilib.
“Mədəniyyət Nazirliyinin strukturlarında olan rüşvətxorluq, korrupsiya halları ansambl və orkestrlərdə də müşahidə edilir”
Azərbaycan Dövlət Nəfəs Alətləri Orkestrinin bədii rəhbərinin həbsi nazirliyin nəzdində olan digər ansambl və orkestrlərdə, musiqi kollektivlərində araşdırmalar aparılmasına əsas verirmi?
İctimai Nəzarət Koalisiyasının baş katibi, Yeni Yazarlar və Sənətçilər İctimai Birliyinin sədri, yazıçı-kulturoloq, Prezident təqaüdçüsü Aydın Xan Əbilov “Bakı-Xəbər”ə bildirdi ki, ümumiyyələ, bütün musiqi kollektivlərində aidiyyatı qurumların araşdırma aparmasına ciddi əsaslar var. A.X.Əbilovun sözlərinə görə, müsbət haldır ki, ölkəmizdə həyata keçirilən davamlı iqtisadi inkişafın mühüm şərtlərindən biri kimi şəffaflığın və maliyyə intizamının təmin edilməsi, aparılan iqtisadi islahatların korrupsiyaya qarşı mübarizə tədbirləri ilə dəstəklənməsi prokurorluq orqanları tərəfindən daim diqqət mərkəzində saxlanılır və bu qurum korrupsiya hüquqpozmalarına qarşı kəskin mübarizə aparır.
“Prezident İlham Əliyev və ölkəmizin Birinci vitse-prezidenti, Heydər Əliyev Fondunun prezidenti, Azərbaycan mədəniyyətinin himayədarı Mehriban Əliyeva hər zaman mədəniyyət və incəsənət xadimlərinə, yaradıcı şəxslərə, bu sahəsinin müxtəlif istiqamətlərinə böyük həssaslıqla yanaşıblar. Son illərə qədər mədəniyyət və incəsənət sahəsində çalışanların, musiqi kollektivlərinin əməkdaşlarının əməkhaqqları az olsa da, cənab Prezidentin sərəncamı ilə onların maaşları bir neçə dəfə qaldırılıb. Hazırda onlar ölkəmizdə yüksək əməkhaqqı alanlar sırasındadır. Bundan əlavə, onlara mükafatlar da verilir. Ola bilsin, əvvəllər bu qurumlarda maaş az olduğundan baş verən neqativ hallara, “ölü canlar”ın ştatda saxlanılmasına, rüşvət müqabilində insanların işə götürülməsinə və sairə “göz yumulub”. Ancaq bu gün də bu proseslərin davam etdirilməsi yol verilməzdir. Azərbaycan xalqının bədii-estetik zövqünü təmin etməli olan rəsmi dövlət qurumu olan Mədəniyyət Nazirliyinin strukturlarında olan rüşvətxorluq, korrupsiya halları ansambl və orkestrlərdə də müşahidə edilir. Bu ansambl və orkestrlərdə xüsusən də, yaşlı nəsilin nümayəndələrini müəyyən şirinlik müqabilində ştatda saxlanılması, onlara və digərilərinə işə gəlmədikləri halda əməkhaqqı yazılması, eləcə də digər cinayət faktları get-gedə aşkarlanır, bu cinayəti işləyənlər hüquq-mühafizə orqanları tərəfindən ifşa edilərək məsuliyyətə cəlb edilirlər. Bilirsiz ki, musiqi kollektivlərinin, orkestrlərin çoxuna “akademik” status verilib. Bu da orada çalışanların məvaciblərinin bir neçə qat artırılmasına, xərclərin çoxalmasına gətirib çıxıb. Bu kollektivlərin müasir dövrdə dünyaya çıxaracağı samballı bir sənət nümunələri olmadığı halda, onlara bu qədər vəsait xərclənməsi, eyni zamanda da alınan rüşvətlər, silinən pullar, plastik kartlara edilən qanunsuz köçürmələr dövlət büdcəsinə böyük zərbədir. Hesab edirəm ki, Mədəniyyət Nazirli strukturlarında baş verən neqativ halların aşkarlanması üçün dövlət səviyyəsində müxtəlif strukturların iştirakı ilə bir komissiya yaradılmalıdır. Azərbaycan Dövlət Nəfəs Alətləri Orkestrının bədii rəhbərinin həbsi digər ansambl və orkestrlərdə də araşdırmaların başlanmasına, əgər varsa, cinayət faktlarının üzə çıxarılmasına əsas verir. Hesab edirəm ki, digər bu kimi qurumlarda da bu proses həyata keçirilməlidir” - deyə A.X.Əbilov vurğuladı.
Ekspertin fikirlərindən belə qənaətə gəldik ki, digər ansambl və orkestrlərdə də araşdırmalar aparılsa analoji korrupsiya cinayətləri üzə çıxa bilər.
İradə SARIYEVA
