Pandemiya ilə mübarizə şəraitində başqa ölkələrdən fərqli olaraq Azərbaycanda müxtəlif profilli muzeylərin yaradılmasına, onlar üçün yeni binalar inşa edilməsinə böyük əhəmiyyət verilir.
Prezident İlham Əliyevin Sərəncamı ilə müxtəlif rayonlarda yaradılan Dövlət Rəmzləri Muzeylərinin son aylar bir neçəsinin Prezidentin iştirakı ilə açılışları olub.
Ölkəmizin pandemiya ilə mübarizə apardığı şəraitdə dövlətin muzeylər şəbəkəsinin genişləndirilməsinə böyük əhəmiyyət verməsi mütəxəssislər tərəfindən müsbət qarşılanır. Respublikamızın muzeylər şəbəkəsinə Bakı Xan Sarayında muzeyi də əlavə olunur. Bu barədə “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Əsgər Ələkbərov “PREZİDENT. Müstəqillik. Təhlükəsizlik. Rifah” adlı videolayihəyə açıqlamasında məlumat verib. ““İçərişəhər” Dövlət Tarix-Memarlıq Qoruğunda yerləşən Bakı Xan Sarayında muzeyin yaradılması ilə bağlı qərar verilib və biz gələn il ərzində bu muzeyin açlışını etməyi planlaşdırırıq”.
Ə.Ələkbərov bildirib ki, Azərbaycan mədəni irsinin qorunmasına Prezident İlham Əliyev və birinci xanım Mehriban Əliyeva tərəfindən yüksək diqqət göstərilir. Bu diqqət və qayğının nəticəsidir ki, İçərişəhərdə də iri miqyaslı xüsusi təmir-bərpa işləri görülür: “Mehriban xanımın və cənab Prezidentin tapşırığı ilə 2 il əvvəl biz Bakı Xan Sarayının əsaslı təmir-bərpa işlərinə və 2016-cı ildə “Qoşa Qala” qapıları yaxınlığında aparılan arxeoloji qazıntılar zamanı aşkar edilən XVII əsrə aid yeraltı hamamın da restarvasiya işlərinə start vermişdik”.
Mütəxəssislər hesab edirlər ki, ölkəmizin muzeylər şəbəkəsinin genişləndirilməsi, Prezident tərəfindən yeni muzeylərin inşası ilə bağlı qərarlar qəbul edilməsi bizə postpandemiya dövründə respublikamıza daha çox turist cəlb etmək imkanı yaradır.
“Dövlət tərəfindən muzeylər şəbəkəsinin genişləndirilməsi, yeni muzeylərin yaradılması postpandemiya dövrünə ciddi hazırlıqdır”
Tanınmış tarixçi-etnoqraf Ənvər Çingizoğlu bizimlə söhbətində bildirdi ki, yeni muzeylərin yaradılması ölkəmizin maddi-mədəni, arxeoloji-etnoqrafik irsinin təbliğində mühüm rol oynamaqla yanaşı, həm də onlara yeni peşəkar münasibət formalaşdıracaq. “Azərbaycan yalnız sosil – iqtisadi, hərbi cəhətdən güclü deyil, həm də tükənməz, zəngin maddi-mədəni irsə sahibdir. Dövlətimizi güclü edəndə bu və digər amillərdir. Prezident İlham Əliyev və ölkəmizin Birinci vitse-prezidenti Mehriban Əliyeva tərəfindən maddi-mədəni irsimizə həssas münasibət bəslənilməsi, regionlar üzrə maddi-mədəni sərvətimizin yeni yaradılan muzeylərə itkisiz toplanması müsbət haldır. Hər bölgənin, şəhərin özünəməxsusu spesifik maddi-mədəni materialları var. Məhz həmin nümunələr, eksponatlar o bölgələrin tarixini, etnoqrafiyasını, arxeologiyasını, qədim insanların yaşam tərzini, məşğuliyyətini özündə ehtiva edir. Dövlət Rəmzləri Muzeylərinin açılışından sonra “İçərişəhər”də Bakı Xan Sarayında Muzeyin yaradılması barədə qərarın verilməsi çox müsbət bir haldır. Postpandemiya dövründə Bakıya gələcək turistlər üçün bu muzey Bakı və Bakı xanları, onların tarixi, həyatı, yaşam tərzi, ordusu və sair haqqında geniş bilgi verəcək. Bu baxımdan, hesab edirəm ki, dövlət tərəfindən muzeylər şəbəkəsinin genişləndirilməsi, yeni muzeylərin yaradılması post pandemiya dövrünə ciddi hazırlıqdır. Pandemiyadan əvvəl şəhərimizdə və ölkəmizin digər yerlərində olan muzeyləri ziyarət edən turistlər postpandemiya dövründə həmçinin yeniliklərlə qarşılaşacaq”-deyə Ə.Çingizoğlu bildirdi.
Mütəxəsis pandemiya şəraitində yaşadığımız və bu prosesə qarşı mübarizə apardığımız bir vaxtda ölkəmizdə yeni muzeylərin yaradılmasını postpandemiya dövrünə hazırlıq kimi dəyərləndir və hesab edir ki, biz bununla turistlərə Azərbaycanın zəngin maddi-mədəni isrsini daha yüksək səviyyədə təqdim edə, Bakı xanlarını onlara tanıda biləcəyik.
İradə SARIYEVA
