İnsan bu fani dünyaya özü istəmədən gəlir. Onun gələcəkdə necə bir insan olmağı addımladığı yolda, ucaldığı mərtəbələrdə bəlli olur. Təbii ki, burada genetik amillərin də rolu danılmazdır.
Fransız filosofu Anre Estenin gözəl bir fikri var “yaxşı ol və yaxşılığı özünə mələk seç, çünki başqa xilaskarın olmayacaq”.
Mən də yaxşılardan biri haqqında yazmaq istədim. Keçdiyi həyat yolunda, qazandığı uğurlarında Allah ona dayaq durub, onu sınmağa, yıxılmağa qoymayıb. O həm də özünə, ağlına, dərrakəsinə inanıb. Öz üzərində daim çalışıb, zəhmətə, sınaqlara qatlaşıb, həyatın heç bir çətinliyi onu ruhdan salmayıb. Söhbət Əməkdar mədəniyyət işçisi, incəsənət xadimi, “Audiokitab” layihəsinin rəhbəri, sevilən insan, dəyərli ziyalı Həsən Həsənovdan gedir. Həsən müəllim sözündə bütöv, getdiyi yolda dönməz bir insandır. Sözünün sanbalını, dəyərini hər zaman bilir, heç vaxt boş yerə söz demir, ağır oturub batman gəlir. Ailədən, kökdən, nəsildən, qandan, candan gələn saflıq Həsən müəllimin də canına hopub. Xeyirxahlıq, halallıq, dürüstlük, ləyaqət kimi mənəvi keyfiyyətlər onun həyat kredosuna çevrilib.
Həsən Nəsib oğlu Həsənov 1950-ci il iyulun 7-də Gürcüstanın Bolnisi rayonunun (Borçalı mahalının) Faxralı kəndində dünyaya gəlib. 1957-ci ildə öz kəndlərində orta məktəbə gedib. 1968-ci ildə orta məktəbi bitirən Həsən bir il sonra isə Bakı şəhər 1 nömrəli texniki peşə məktəbinə daxil olub. 1970-ci ildə peşə məktəbini fərqlənmə diplomu ilə bitirib, öz istəklərinin, arzularının axınına düşərək Kitabxanaçılıq texnikumunun mədəni-maarif şöbəsinin “özfəaliyyət teatr kollektivinin rəhbəri” ixtisasına yiyələnib.
Texnikumda oxuduğu illərdə Əbilov adına mədəniyyət evinin xalq teatrının truppasına daxil olan istedadlı aktyor burada bir neçə əsərdə baş rolları ifa edir. Sabit Rəhmanın “Toy” komediyasında Surxay, Həsən Seyidbəylinin “Sən nə üçün yaşayırsan?” pyesində professor Səməd və sair rolları özünəməxsus canlandırır.
Həsən Həsənovun 40 illik fəaliyyəti müxtəlif sənət ocaqlarında davam edir. 1977-1983-cü illərdə Faxralı kənd orta məktəbində müsiqi müəllimliyi ilə fəaliyyətə başlayan gənc Həsən daha sonra 1981-1986-cı ilərdə A.S.Puşkin adına Tiflis Pedaqojı İnstitutunda Azərbaycan dili və ədəbiyyatı kafedrasında incəsənət tarixindən mühazirələr oxuyur.
Sonrakı illərdə o, Cəfərli kənd mədəniyyət evində direktor, Marneuli şəhər mədəniyyər evində bədii rəhbər kimi müxtəlif vəzifələrdə çalışır.
Həsən Həsənovun həyatının ən məhsuldar dövrü onun teatr fəaliyyəti ilə bağlıdır. 1992-ci ildən 2017-ci ilə qədər müxtəlif teatrlarda – Dövlət Gənclər Teatrında, Gənc Tamaşaçılar Teatrında, Mingəçevir Dövlət Teatrında, Cəfər Cəbbarlı adına İrəvan Dövlət Azərbaycan Dram Teatrında müxtəlif vəzifələrdə (direktor müavini, direktor) səmərəli və məhsuldar bir sənət yolu keçir. İşlədiyi kollektivlərdə Həsən müəllim ali keyfiyyətlərinə görə həmişə sevilir, hörmətlə, ehtiramla qarşılanır.
Əsl insan odur ki, yaşadığı zamanda, işlədiyi məkanda başqasının təsirinə düşməsin, əqidəsində, məsləyində dürüst olsun. Həsən müəllimin də sənət insanları tərəfindən sevilməsinin səbəbi onun ən çətin məqamlarda özü olması, başqasının qəlbinə sığmamasıdır. Bu sənət fədaisi ömrünün bu çağında da “Audikitab” layihəsinin rəhbəri olaraq bir çox istedadlı gənci başını yığaraq, yenə həmin eşqlə, şövqlə çalışır mədəniyyətimizə, ədəbiyyatımıza, incəsənətimizə xidmət edir. Həmçinin, yeni yaradılmış “1 səhnə” prodüsser mərkəzində yaradıcı heyətə öz məsləhətlərini, tövsiyələrini əsirgəmir, gənclərin yaradıcı işlərində onlara mənəvi dəstək olur. Dövlətimiz də onun bu xidmətlərini dəyərləndirərək, 2011-ci ildə Azərbaycan Respublikası Prezidentinin sərəncamı ilə “Əməkdar mədəniyyət işçısı” kimi fəxri ada layiq görüb.
Bu günlərdə Həsən Həsənovun 70 yaşı tamam olur. Təəsüf ki, bu yubiley məmləkətimizin çox ağır dönəm yaşadığı, koronavirus bəlası ilə üz-üzə qaldığı bir vaxta təsadüf edir. Amma deyirlər ki, pis günün ömrü az olar. Xalqımız yenə də öz əvvəlki xoş günlərinə qayıdacaq. Ümid edirik ki, o xoş günlərdə Həsən müəllimin doğum gününü bir daha qeyd edəcəyik. 70 yaş insanın müdrik yaşıdır. Ömrün həm də qızılı payızıdır 70 yaş. Qoy, bu yaşınız Sizə xoş günlər, nəvəli-nəticəli sevincli anlar nəsib etsin. Yubileyiniz mübarək!
Zülfiyyə Eldarqızı Sənətşünaslıq üzrə fəlsəfə doktoru
