Erməni rejissoru Nora Matrosyanıın Qarabağ mövzusunda çəkdiyi “Əgər külək olsa” filmi Kann Festivalının əsas proqramına düşüb.
Qeyd edək ki, iyunun ortalarına yaxın dövrdə gündəmə gələn bu məsələyə ilk reaksiyanı Dağlıq Qarabağ bölgəsinin azərbaycanlı icması verdi və qurum tərəfindən Kann Festivalının təşkilatçılarına etiraz məktubu göndərildi. Məktubda Dağlıq Qarabağın azərbaycanlı icmasının ermənilərin Kann Festivalına təqdim olunmaq üçün çəkdikləri “Əgər külək olsa” filminin yayımlanmasına etirazı yer almışdı. Etiraz məktubunda sözügedən filmin Ermənistanın işğal etdiyi Azərbaycan ərazilərində qanunsuz olaraq çəkildiyi vurğulanmışdı.
Amma sözügedən etiraz məktubunun nəticəsi olmadı. Kann Festivalının təşkilatçıları beynəlxalq konvensiyalara uyğun olaraq, məktubda qoyulan tələbi təxirə salmadan icra etməli və N.Matrosyanın filmini festivala buraxmamalı idilər. Lakin onlar nəinki filmi festivala buraxdılar, hətta əsas siyahıya daxil etdilər.
Ekspertlər hesab edirlər ki, bu gün Xarici İşlər Nazirliyi, eləcə də Azərbaycanın Fransadakı səfirliyi məsələyə müdaxilə etməlidir.
“Xarici İşlər Nazirliyi festivalın təşkilat komitəsinə nota göndərməlidir”
Qarabağ mövzusunda çəkdiyi “Nabat” filmi ilə bir sıra nüfuzlu beynəlxalq festivallarda iştirak edən, Venesiya, Çikaqo, Tokio və “Bəyaz gecələr” (Estoniya) kimi “A” kateqoriyalı festivallara qatılan tanınmış rejissor Elçin Musaoğlu baki-xeber.com-a bildirdi ki, N.Matrosyanın sözügedən filminin Kann Festivalının əsas proqramına düşməsi sinema işi deyil, bu, sırf siyasi məsələlərlə bağlıdır. “Bilirsiniz, mənə elə gəlir ki, biz o filmdən yazmaqla və onun haqqında daha çox danışmaqla onu daha çox reklam edirik. Bu filmin Kann Festivalının əsas proqramına düşməsi birbaşa siyasi amillərlə bağlıdır. Yəni burada kinodan, onun məziyyətlərindən söhbət getmir. Mən hesab etmirəm ki, o film bədii cəhətdən hər hansı bir dəyərə malikdir. Onun kökündə çirkli siyasət, erməni məkri dayanır. Erməni diasporu əlinə fürsət keçdikcə belə təxribatlar edir, hətta onlar kino sahəsində də bu çirkinliyə əl atırlar. Fikrimcə, Xarici İşlər Nazirliyi festivalın təşkilat komitəsinə nota göndərməli və qeyd etməlidir ki, film Azərbaycanın işğal altında olan ərazilərində çəkilib və qanunsuz olaraq Qarabağ “erməni torpağı” kimi təqdim edilib. Qarabağ haqqında ATƏT-in qətnamələrini təqdim etmək lazımdır və s.
Nəticədə həmin filmi anında o festivaldan yığışdıracaqlar. Çünki böyük festivalların nizamnaməsində siyasi məsələlərə qarışmamaq haqqında müddəalar var. Bunu ermənilərin gələcəkdə edə biləcəkləri növbəti təxribatların qarşısını almaq üçün etməliyik” - deyə E.Musaoğlu vurğuladı.
E.Musaoğlu bildirdi ki, bu gün Azərbaycan kinosunun beynəlxalq aləmdə heç bir iş görmədiyini, uğurlara imza atmadığını demək düzgün deyil. Rejissoru olduğu “Nabat” filiminin bir çox ölkədə nümayiş etdirildiyini, onun barəsində Avropa mətbuatının və digər ölkələrin KİV-nin maraqlı yazılar dərc etdiyini qeyd edən E.Musaoğlunun sözlərinə görə, biz ermənilərin qarşısına əliyalın çıxmırıq, sənət əsərləri ilə çıxırıq.
İradə SARIYEVA
