Mədəniyyət Nazirliyində baş verən son proseslər bu qurumda və onun nəzdində fəaliyyət göstərən təşkilatlarda bir sıra neqativ halları, qanun pozuntularını üzə çıxarıb. Əlaqədar qurumların apardığı araşdırmalar nəticəsində nazirliyin bəzi qurumlarında vergidən yayınma halları müəyyən edilib. “Report”un Hesablama Palatasına istinadən yaydığı məlumata görə, Palata Mədəniyyət Nazirliyinin nəzdindəki Dövlət Filarmoniyasında vergidən yayınma halları aşkar edib. Bu, Palatanın Filarmoniyada apardığı yoxlamalar nəticəsində məlum olub.
Belə ki, mədəniyyət ocağı 2017-2018-ci illərə aid maliyyə hesabatlarında xərclərini müvafiq olaraq 59 759 manat və 64 259 manat artıq göstərib. Son nəticədə qurum dövlət büdcəsinə mənfəət vergisi kimi müvafiq olaraq 11 952 manat və 12 848 manat az ödəniş edib. Bundan başqa, Palata Mədəniyyət Nazirliyinin Cəfər Cabbarlı adına "Azərbaycanfilm" kinostudiyasının da 2017-ci ildə 2 760 manat, 2018-ci ildə isə 14 580 manat az mənfəət vergisi ödədiyini üzə çıxarıb.
Müşahidəçilərin fikrincə, həm Dövlət Filarmoniyası, həm də “Azərbaycanfilm” kinostudiyasının dövlət büdcəsindən maliyyələşməsi ilə bağlı heç bir problem olmayıb. Bundan başqa, kinostudiyaya ayrılan dövlət dotasiyasından əlavə, qurumun digər gəlirlərinin də olduğunu deyən ekspertlər hesab edirlər ki, kinostudiyanın vergidən yayınma hallarına yol verməsi qeyri-rəsmi formada məlum idi. Filarmoniyaya gəlincə, ekspertlər qeyd edirlər ki, pandemiyaya qədərki dövrdə Filarmoniya ən çox gəlir əldə edən bir təşkilat olub. Məlumatlara görə, ayrı-ayrı konsertlərin, tədbirlərin keçirilməsi üçün mütəmadi olaraq Filarmoniya səhnəsi çox baha qiymətə icarəyə verilib. Filarmoniyanın il ərzində icarədən əldə etdiyi gəlirin məbləği milyonlarla ölçülür. Ekspertlər qeyd edirlər ki, burada ən ucuz icarə haqqı 2000-3000 manat civarında olub.
Hesablama Palatasının hər iki təşkilatda vergidən yayınma hallarını aşkar etməsi Mədəniyyət Nazirliyi strukturunda baş verən neqativ halların üzə çıxarılması baxımından diqqətçəkəndir. Ekspertlərin fikrincə, Hesablama Palatası nazirliyin digər strukturlarında da araşdırmalar aparsa, analoji hadisə ilə üzləşəcək.
Cəmil Quliyev: “Mən kinostudiyadan çoxdan ayrılmışam”
Məsələ ilə bağlı “Azərbaycanfilm” kinostudiyasının sabiq direktoru, professor Cəmil Quliyevlə əlaqə saxladıq. C.Quliyev bildirdi ki, o, kinostudiyadan çoxdan ayrılıb və heç nədən xəbəri yoxdur. “Mən kinostudiyadan çoxdan ayrılmışam. Hazırda xəstəxanadayam, müalicə alıram. Ona görə də heç nədən xəbərim yoxdur”.
Ayaz Salayev: “Bilmirəm, bu necə baş verib?”
Kinostudiyanın baş redaktoru, tanınmış kinorejissor, kinoşünas Ayaz Salayev isə “Bakı-Xəbər”ə bildirdi ki, vergidən yayınma halının necə baş verdiyini anlaya bilmir: “Mən on ildən artıqdır kinostudiyada baş redaktor vəzifəsində işləyirəm. Vergidən yayınma halı haqda məlumatı mən də eşitmişəm. Bilmirəm, bu necə baş verib? Amma, bildiyim qədər, bu elə də böyük məbləğ deyil, kiçik məbləğdir. Bütün hallarda, diqqətəlayiq məlumat deyil”.
Məsələ ilə bağlı Mədəniyyət Nazirliyinin nəzdindəki Dövlət Filarmoniyasından cavab ala bilmədik...
İradə SARIYEVA
