Ermənilər işğal altında olan Azərbaycan ərazilərində özbaşnalıqlarını davam etdirirlər. Torpaqlarımızı işğal etdikdən sonra burada yaratdıqları qondarma “DQR”i “müstəqil respublika” kimi beynəlxalq aləmə tanıtmaq üçün xarici dövlətrdəki erməni diasporunun dəstəyilə müxtəlif təbliğat işləri həyata keçirirlər. Əlbəttə, saxtakarlıq, yalan, riya üzərində köklənən bu təbliğata dünyanı inandırmaq mümkün olmasa da, onlar öz saxtakarlıqlarını davam etdirirlər.
Bildiyimiz kimi, son illər xaricdəki erməni diasporunun maliyyə yardımı ilə bəzi xarici kino şirkətləri, eləcə də erməni rejissorlar işğal altında olan Azərbaycan torpaqlarında bədii və sənədli filmlər çəkir, onu ayrı-ayrı beynəlxalq film festivallarına təqdim edirlər. Çox təəssüf ki, ermənilər bizim ərazilərimizdə, qədim şəhərlərimizdə çəkdikləri filmləri ən nüfuzlu beynəlxalq kino festivallarının qapısına qədər daşıya bilirlər. Hətta Kann Kino Festivalına da film təqdim etmək iddialarını gizlətmirlər. Ermənilər bu filmləri xüsusi plan əsasında çəkirlər.
Bilirik ki, ermənilərin Kann Festivalına təqdim olunmaq üçün çəkdikləri “Əgər külək olsa” (Si le vent tombe) filmi də bu qəbildəndir, onların çirkli təbliğatına hesablanıb.
Qeyd edək ki, Dağlıq Qarabağ bölgəsinin azərbaycanlı icması Kann Festivalının təşkilatçılarına etiraz məktubu göndərib. Məktubda Dağlıq Qarabağın azərbaycanlı icması ermənilərin Kann Festivalına təqdim olunmaq üçün çəkdikləri “Əgər külək olsa” filminin yayımlanmasına etirazı yer alıb. Qeyd olunub ki, sözügedən film Ermənistanın işğal etdiyi Azərbaycan ərazilərində qanunsuz olaraq çəkilib.
Məktubda vurğulanıb ki, filmdə göstərilən Xocalı aeroportu Azərbaycana məxsusdur və işğaldan sonra Ermənistan tərəfindən qanunsuz olaraq bərpa olunub. Eyni zamanda, festival təşkilatçılarına Azərbaycan torpaqlarının bir hissəsinin Ermənistan tərəfindən işğal edilməsi, bir milyondan çox insanın öz yurdundan didərgin düşməsi və bu insanların 30 ilə yaxındır öz evlərinə qayıda bilməməsi haqqında da məlumatlar yer alıb.
Sonda ədalətin bərpa olunmasına, münaqişənin həllində sülhyönümlü nəticə əldə etmək üçün festival təşkilatçıları tərəfindən səy göstəriləcəyinə ümid ifadə olunub.
Yeri gəlmişkən, Mədəniyyət Nazirliyi dəfələrlə Kann Festivalında Azərbaycan pavilyonu açıb, amma indiyədək bir dənə də olsun Qarabağ mövzusunda film təqdim etməyib. Ermənilərin bu qanunsuz hərəkətlərinin qarşısının alınmasında nazirliyin rolu böyük olmalı olduğu halda, təəssüf ki, biz bunu görə bilmirik. Halbuki, beynəlxalq qanunvericilik var və burada işğal altında olan ərazilərdə görülən istənilən işin qəbuledilməzliyi barədə aktlar var. Amma bizim nazirlik bu aktları rəhbər tutub beynəlxalq qurumlar qarşısında ermənilərin “kino oyunlarını” ifşa edə bilməyib. Kann Festivalına urvatlı bir film təqdim etməklə ermənilərin iç üzünü tamamilə açmaq olardı.
Bəzi hallarda, kinoya rəhbərlik edən adamlar deyirlər ki, mədəniyyət festivallarında siyasi mövzuda çəkilən filmlər qəbul edilmir. Belədisə, bəs onda ermənilərin saxtakarlıqla çəkdikləri filmlər o tədbirlərdə necə qəbul olunur? Əslində, suallar çoxdur, cavabını verməli olanlar isə susurlar.
Dağlıq Qarabağ bölgəsinin azərbaycanlı icması ermənilərin çəkdikləri məlum filmlə bağlı Kann Festivalına etiraz məktubu göndərib, bəs əlaqədar qurumlar və kino ictimaiyyəti nə etməlidir ki, işğal altında olan ərazilərimizdə çəkilən o mənfur film Kann Festivalında yayımlanmasın?
“Mədəniyyət vacib ideoloji silahdır və biz bundan istifadə etməliyik”
Tanınmış kinorejissor Elxan Cəfərov “Bakı-Xəbər”ə bildirdi ki, ermənilər tərəfindən işğal altında olan ərazilərimizdə film çəkilməsinə və onun Kann Festivalına təqdim edilməsinə münasibəti çox mənfidir. Bu halı pislədiyini bildirən E.Cəfərovun sözlərinə görə, Azərbaycan haqlı tərəfdir və biz erməni təbliğatının qarşısını almaq üçün çox yüksək səviyyədə bədii filmlər çəkib dünyada yaymalı, nüfuzlu beynəlxalq kino festivallarında iştirak etməliyik. Bunun yalançı, saxta erməni təbliğatına böyük zərbə ola biləcəyini deyən E.Cəfərov hesab edir ki, bunsuz erməni təbliğatının qarşısını almaq mümkün deyil. “Ermənilər birinci dəfə deyil ki, bizim işğal altında olan ərazilərimizdə bu cür filmlər çəkirlər. Bu gün ermənilər dünya qarşısına saxta “mədəniyyət faktoru” ilə çıxırlar. Halbuki, onların özünün heç bir mədəniyyəti yoxdur, musiqiləri də, təqdim etdikləri başqa mədəniyyət nümunələri də başqa xalqlardan oğurluqdur. Bilirsiniz ki, erməni diasporunun əlaqələri çox geniş inkişaf edib, onlar bundan istifadə edərək həyasızlıq göstərirlər və bu cür işlər görürlər. Onlar dünyada hər şeyə yalanla, yaltaqlıqla, riyakarlıqla, satqınçılıqla nail olurlar. Bizim bu məsələdə çıxış yolumuz dünyaya mədəniyyət faktoru ilə çıxmaq, yüksək səviyyəli filmlər çəkərək təbliğ etməkdir. Təəssüf ki, biz bunsuz nə qədər çalışsaq da, heç nəyə nail ola bilmərik. Ermənilər bizim düşmənimizdir və düşməni susdurmaq üçün dünyaya dəyərli filmlərlə çıxmalıyıq. Əlbəttə, ermənilərin bu şəkildə təbliğ edilməsini himayə edən dövlətlərin xüsusi siyasi maraqları var və onlar bir çox halda öz siyasi maraqlarını mədəniyyətlə təmin edir, öz mesajlarını mədəniyyət, kino vasitəsilə verirlər. Bizim güclü ordumuz var və bizə mane olan dövlətlər olmasa, tezliklə öz torpaqlarımızı işğaldan azad edə bilərik. Amma dünyanın müxtəlif dövlətlərinin bu məsələdə öz maraqları var və onlar bizə mane olurlar.
Dünya mədəni maraqlar yox, siyasi məqsədlər, maraqlar güdür. Biz bu gün çalışmalıyıq ki, Azərbaycanı böyük mədəniyyətə malik bir ölkə kimi tanıdaq. Dünya bizi tanımalıdır. Ermənilər az-çox özlərini pis mənada da olsa tanıdıblar. Amma biz ermənilər kimi xain, aldadıcı planlar quran xalq deyilik, bizim böyük mədəniyyətimiz var, daxili mədəniyyətə sahib olan qədim xalqıq. Dünya bilir ki, ermənilər xəyanətkardırlar. Biz öz mədəni dəyərlərimizi kino vasitəsilə təbliğ etməliyik. Öz xalqımızın mədəni dəyərlərini təbliğ etməliyik”.
E.Cəfərov qeyd etdi ki, kino, mədəniyyət böyük ideoloji silahdır, biz bu silahdan istifadə etməyi bacarmalıyıq və dünyaya çıxıb ermənilərin yalançı təbliğatının qarşısını mədəniyyət faktoru ilə almalıyıq. “Bilirsiniz, bunun üçün gərək ölkəmizdə mədəniyyətə yalnz əyləncə vasitəsi kimi baxılmasın. Təəssüf ki, bizdə hələ də mədəniyyətə əyləncə vasitəsi kimi yanaşılır. Biz əvvəlcə daxilimizdə mədəniyyətimizi əyləncəlikdən çıxarmalıyıq ki, sonra o mədəniyyəti dünyaya çıxara bilək. Mədəniyyət vacib ideoloji silahdır və biz bundan istifadə etməliyik. Sözümün canı odur ki, ermənilərin hərəkətini pisləmək, onlara etirazımızı bildirmək kifayət deyil. Çıxış yolumuz bizim öz yüksək səviyyəli filmlərimizi dünyaya çıxarmaqdır. Mütləq deyil ki, o filmlər Dağlıq Qarabağ mövzusunda olsun, başqa mövzularda da ola bilər. Bizim bu gün iqtisadiyyatımız inkişaf edib, gözəl xarici siyasət aparırıq. Bunlar çox gözəldir. Amma mədəniyyət faktorunu da yüksək səviyyədə təbliğ etməliyik. Bu gün bizim Kann Festivalına təcili film çəkib çıxarmağımız mümkün deyil, amma bu istiqamətdə köklü, fundamental işlər görməliyik. Dünya üçün Azərbaycan vətən deyil, bizim üçün vətəndir. Biz isə vətənimizin adını daha yüksək səviyyədə mədəniyyətlə, kino ilə ucaltmalıyıq” - deyə E.Cəfərov vurğuladı.
İradə SARIYEVA
