Rəşad Həsənov: “Kənd təsərrüfatı sektoruna ilk olaraq elmi fəaliyyət sahəsi kimi baxılmalıdır”
Azərbaycanda fermerlərin təhsil səviyyəsinin qənaətbəxş olmadığı bildirilir. Belə bir fikri "Kənd yerlərinin inkişafı və kənd təsərrüfatı" mövzusunda müzakirələrdə Dünya Bankının nümayəndəsi Julian Lampetti deyib.
O qeyd edib ki, Azərbaycanda kənd təsərrüfatında interfeyslərdən daha az istifadə olunur: “Kənd təsərrüfatında interfeyslər çox sadə olmalıdır. Biz Azərbaycandan xeyli aşağı səviyyəli ölkələrə baxanda görürük ki, onların texnologiyaya çıxışı daha asandır. Mən düşünürəm ki, onlar Avropa səviyyəsinə daha tez çatacaqlar. Azərbaycanda güman edirəm ki, fermerlərin təhsilinin aşağı olması interfeyslərdən daha az istifadə ilə nəticələnir”.
Fermerlərin təhsil səviyyəsinin qənaətbəxş olması üçün nə kimi işlərin görülməsinin vacibliyini öyrənmək məqsədilə iqtisadçı-ekspert Rəşad Həsənova müraciət etdik. O, “Bakı-Xəbər”ə açıqlamasında qeyd etdi ki, kənd təsərrüfatı sektoruna ilk olaraq elmi fəaliyyət sahəsi kimi baxılmalıdır: “Bu istiqamətdə dövlət tədbirləri həyata keçirilməlidir. Təhsil sahəsində aqrar sferanın payı artırılmalıdır. Kənd təsərrüfatı üzrə mütəxəssislərin hazırlanması istiqamətində tədbirlərin maliyyələşdirilməsi dövlət tərəfindən həyata keçirilməlidir. Bununla bağlı universitetlər təşviq oluna bilər. Həmin universitetlərə aqrar sahə ilə bağlı mütəxəssislərin yetişdirilməsi üzrə, qəbula uyğun olaraq, müəyyən subsidiyalar verilə bilər.
Eyni zamanda, xarici təcrübənin öyrənilməsinə geniş ehtiyac var. Çox təəssüf ki, aqrar sektora ənənəvi sahə kimi yanaşılır. Təsərrüfat subyektləri adətən ənənəvi üsuldan istifadə edirlər. Nəticədə məhsuldarlıq istənilən səviyyədə olmur. Bu onu göstərir ki, yerli fermerlər istehsalat prosesinə elmi yanaşmırlar və müasir texnoloji avadanlıqların tətbiqinə laqeyd münasibət bəsləyirlər. Nəticədə isə aqrar sektor gəlirsiz sahə hesab olunur. Bu sahə üzrə məşğul olan insanların orta aylıq gəliri aşağıdır”.
Həmsöhbətimiz hesab edir ki, kənd təsərrüfatının inkişafı üçün intensiv təsərrüfata keçidin vaxtı çatıb. Çünki bu istiqamətdə dövlət tərəfindən müəyyən işlər görülür. Müxtəlif maliyyələşmə və təşviq mexanizmləri hazırlanır: “Ancaq onu da deyim ki, bu işdə tək dövlətin deyil, fermerin də üzərinə böyük iş düşür. Və öz təsərrüfatında müasir yanaşmalardan istifadə etməlidir. Ən azı fermerlərin özlərini qısamüddətli proqramlar vasitəsilə maarifləndirmək lazımdır. Təsərrüfatda elmi yanaşmanın əhəmiyyətini fermerlərə başa salmaq lazımdır”.
R.Həsənov onu da bildirdi ki, xarici təcrübəni öyrənmək lazımdır.
Günel CƏLİLOVA
