Elşad Həsənov: “Saakaşvilinin bu söylədikləri hazırkı dövrdə real deyil, Azərbaycan və Gürcüstan münasibətlərinə heç bir mənfi təsiri də ola bilməz”
Gürcüstanın üçüncü prezidenti Mixeil Saakaşvili bildirib ki, hakim partiya olan “Gürcü Arzusu” ölkənin xarici siyasətində əhəmiyyətli dəyişikliklərə səbəb ola biləcək bir sıra addımlara hazırlaşır.
Onun sözlərinə görə, bu addımlar Rusiya ilə diplomatik münasibətlərin bərpasını, Abxaziya və Cənubi Osetiya ilə güc tətbiq etməmək barədə müqavilələrin imzalanmasını, Abxaziya dəmir yolunun açılmasını və Gürcüstanın neytrallığının elan edilməsini əhatə edir.
Saakaşvili bu barədə Facebook-da yazıb və məlumatı ölkə rəhbərliyinə yaxın mənbələrdən aldığını iddia edib. Keçmiş prezidentin sözlərinə görə, Moskva “Gürcü Arzusu”nun təsisçisi və fəxri sədri Bidzina İvanişvilidən daha konkret addımlar tələb edir, çünki Saakaşvilinin fikrincə, açıqlamalar, müxaliflərin həbsi və Qərbə qarşı tənqidlər artıq Rusiya tərəfi üçün kifayət deyil.
Deyildiyi kimi, Gürcüstan Rusiya ilə diplomatik münasibətlər qurarsa, Abxaziya ilə dəmir yolunu açarsa, separatçı qurumları tanıyarsa, neytalğını elan edərsə bunun Azərbaycan Gürcüstanın münasibətlərində nə kimi izləri qalacaq? Saakaşvilinin dedikləri nə qədır realdır? Bu Gürcüstan Azərbaycan münasibətilərində necə rol oynayacaq?
Siyasi ekspert Elşad Həsənov baki-xeber.com-a bildirdi ki, hazırda Gürcüstanda müxalifət çox zəif görünür, müxalifət liderlərinin bir çoxu həbsdədir, bəziləri xarici ölkələrə qaçıb, əsasən də üçüncü prezidentləri Saakaşvili həbsdədir. “Hesab edirəm ki, Saakaşvili öz arzu və istəklərini müxalifətə çatdırır və onları payızda daha ciddi mübarizəyə səsləyir. Hazırkı dövrdə Gürcüstanın Rusiya ilə diplomatik münasibətlər qurması real deyil. Çünki “Gürcü arzusu” partiyası dəfələrlə bildirib ki, Cənubi Osetya və Abxaziya işğal altında qaldığı üçün Gürcüstanın Rusiya ilə heç bir diplomatik münasibəti qurula bilməz, bu münasibətlər o zaman qurulacaq ki, həmin torpaqlar Gürcüstana qaytarılacaq. Bu gün Rusiya bu haqda heç fikirləşmir də. Yaxud da Abxaziya və Cənubi Osetiya ilə güc tətbiq etməmək barədə müqavilə imzalamaq barədə deyilənlər absurd bir iddiadır. Belə bir iddianı edən hakim partiya sanki özü-özünə quyu qazmaq kimi görünə bilər”.
E.Həsənovun sözlərinə görə, doğrudur, hazırkı dövrdə Rusiya ilə Gürcüstan arasında diplomatik əlaqələr olmasa da, ticari və turistik əlaqələr genişdir. “Baxmayaraq ki, Gürcüstanda ruslara qarşı müəyyən təxribatçı hadisələr baş verir, onlara rusca cavab verilmir. Ancaq buna baxmayaraq, Gürcüstanda ənb çox xarici turist ruslardır. Bu gün Gürcüstana ən çox valyuta rus turistlərindən daxil olur. Eyni zamanda müharibədən qaçıb gəlib orada yaşayanlar və İT sahəsində çalışanlar da var. Yəni bunlar bir qədər absurd görünür. Həmçinin Abxaziyaya dəmir yolunun açılması və Gürcüstanın öz neytrallığını elan etməsi, Qərb əleyhinə pakt yaratması gün real görümür. Hesab edirəm ki, bu Saakaşvilinin iddiasıdır ki, indiki hakimiyyət belə edə bilər və belə olarsa xalq ayağa qalxar və bu hakimiyyət devirə bilər. Amma indiki halda bu real görünmür. Bu yaxınlarda Abxaziyada yaranan ciddi problemlərlə bağlı Gürcüstan hakimiyyəti ora göndərdiyi bir maşın yanacaq müxalifət tərəfindən ciddi tənqid olundu. Hətta onları rus silahlı qüvvələrinə kömək etməkdə ittiham etdilər. Yəni bu gürcü mediasında çox ciddi qalmaqala səbəb oldu. Ancaq Gürcüstanın baş naziri bildirdi ki, biz orada yaşayan vətəndaşlarımıza ciddi problemləri olduğu üçün kömək etdik ki, sosial məsələləri həll olunsun. Yəni fikrimcə, Saakaşvilinin bu söylədikləri hazırkı dövrdə real deyil, Azərbaycan və Gürcüstan münasibətlərinə heç bir mənfi təsiri də ola bilməz.
İctimaiyyət arasında İvanaşvilinin Rusiyanın adamı olduğu, onun “Qazprom”un səhmdarlarından biri və milyarder olduğu deyilir. Onun hakimiyyətə gəlməsində və Saakaşvilinin devrilməsində də Rusiyanın böyük rolunun olduğunu Gürcüstan ictimaiyyəti bilir. Ancaq İvanaşvili Rusiyaya yönəlik hər hansı bir dəstək nümayiş etdirmir. Gürcüstanın neytral, müharibədən kənar qalmasını, digər ölkələrin əlində vasitə olmasını istəməyib Gürcüstanı inkişaf etdirmək planını ortaya qoyublar. Bu gün “Gürcü arzusu” məhz xalqı bununla öz ətrafına toplaya bilib. Hesab edirəm ki, Saakaşvilinin bu bəyanatı, iddiaları tam əsaslı deyil, onun məqsədi məhz payızda müxalifəti daha sərfərbər formada indiki hakimiyyətə qarşı mübarizəyə qaldırmaq istəyindən irəli gəlir”-deyə E.Həsənov vurğuladı.
İradə SARIYEVA
